Read Thado Chin 1 Corinth 10 Bible Online

1 Corinth 10 - Thado Chin bible

1 Corinth 10

¹ Vo sopite, hiche hi helouva naum dingu kalung anompoi, Ipute Ipateu chu abonchauva meibol noija ana umuva, chule twikhanglen apal galkaiju ahi.

²Abon chaovin Mosi-a chun meibol le twikhanglen'ah baptize achangun,

³ Chule abon chaovin lhagao an thakhat aneuvin;

⁴ Abonchauvin lhagao twi thakhat anadonun ahi. Hichu anungsang chenguva chea lhagao songpi-a kona chu amahon adonu ahi; chule hiche songpi chu Christa ahi.

⁵ Ahivangin amaho atamjo chunga chun Pathen alunglhaipon ahi; ajeh chu gamthip gama chun alhukam gamtaovin ahi.

⁶ Thilphalou alunggot banguva chu eihon jong thilphalou ilunggot louna dinguva, chuti chu eivetsah nau ahi.

⁷ Chule amaho lah-a kimkhat milim hou ahi bangu chun nangho um hih-un; hiche thudol chu hitin akisune, Miho chu an neding le don dingin atouvun, chuin alam dingin akipatdoh taovin ahi.

⁸ Chule amaho lah-a kimkhatnin jon apat uva, nikhat sunga sangsomni le sangthum athilo bangu chun, eihon jong jon pan pouhite.

⁹ Chule amaho lah-a kimkhatnin apatep jeh uva gul'in asumang bangun; eihon jong Christa patep pouhite.

¹⁰ Alah uva kimkhat aphunchel jeh-un, suhmang na-in asumangun ahi; chutobang chun phunchel hih-un.

¹¹Tu-a thil hicheng hi avetsahna dinga achunguva soh-a ahi; chule vannoi leiset kichaina hung lhun nading eiho, kithuhilna dinga kisuna ahi.

¹²Hiche jeh chun koi hile adinga kingaito-a chu alhuh louna dingin chingtheihen.

¹³Mihem dou thei kalval lhepna nachung uva achukhapoi; Pathen tahsan umtah ahin, nathan adou jou kalvalin lhepna nachung uva chuhsah ponte; hijeh chun nathoh jouna dingun, lhepna chutoh kilhona nakihuhdohna dingu lampi jong nasempeh dingu ahi.

¹⁴Hijeh chun, kasopi ngaiteho, milim hou jamsanun.

¹⁵Keiman nangho mi lungching nahiu kahetna kasei ahi, kathusei hi nanghon kikhollun.

¹⁶ Phatthei channa khon phatthei iboh-u khu, Christa thisan ikiloi khompi nau hilouham? Chule changlhah ihebaljiu khu Christa tahsa ikiloi khompi nau hilouham?

¹⁷Ijeh-inem itile eiho mi tamtah hi changlhah lum khat ihiuvin, ti khat ihiuve; ajeh chu changlhah lum khatna chu ibon chaova chan ineiju ahi.

¹⁸ Tahsa lama Israelte khu veuvin, kithoina sa neho khu maicham toh chan neikhom hilouham?

¹⁹Achutile ipi kaseijem? Milim houna an chu ikhat ahi, ahiloule milim hou jong hi ikhat ahi, katim?

²⁰ Chuti ahipoi, chidang namdang ten akithoinao chu Pathen lama atou hilouvin, thilha dingjoh-a atou ahibouve; nangho thilha toh nakiloikhom dingu chu kalung nahipeh pouve.

²¹Nanghon Pakai khon le thilha khona nadonkop thei lou dingu ahi, Pakai ankong le thilha ankong na-umkop thei lou dingu ahi.

²² Ole thangset sahna dinga Pakai chu isuh lunghangu ham? Ama sanga hatjobeh ihiuvem?

²³ Thil ijakai keima din bol ngai ahin, ahivangin ijakai phatna ahipoi; ijakai keima din bol ngai ahin, ahivangin ijakai phattouna ahipoi.

²⁴Koiman ama chang phatna hol louvin, aheng akoma dingjoh hol-hen.

²⁵Kailhanga kijoh thiljouse chu ne jengun, sele pha hetna jeh-in ima dong hih-un;

²⁶Ijeh-inem itile leiset le asunga umjouse hi aboncha Pakaiya ahi.

²⁷Atahsan louho khattouvin an ne-a nakouva nache nomle, sele pha hetna jeh-in ima dong hih-un, na-anga alui chan chu ne jengun.

²⁸Amavang khattouvin, hiche hi milimho henga kithoina kitoh ahi, tia naseipeh-a ahivangle, ahetsahpa jeh le sele pha hetna jeh chun nehdaovin, ijeh-inem itile leiset le asunga thil um jouse hi Pakaiya ahi.

²⁹Nangma sele pha hetna kati hilouvin ama-a joh chu kati ahi. Kacham lhatna chu midang sele pha hetna-in ibola ei-oimo dingham?

³⁰Ajehchu thangvahna neija kaneh leh, ibola thangvahna kanei chunga chu oimo-a um kahim?

³¹Chuti ahi jeh chun naneh jongule, nadon jongule, nabol jouseu Pathen loupina ding jengin bolun.

³²Juda mi hihen, Greek mi hitale, Pathen houbung mite hitale, akipal lhuhna dingun ima bolhih helun,

³³Keiman keichang phatchomna ding hol louva, huhhing-a aum theina dinguva mi tamtah phatchomna holnajoh-a, thil jouse-a mi jouse kalung lhaisah banghin, nanghon jong bollun.