Read Thado Chin 1 Corinth 11 Bible Online

1 Corinth 11 - Thado Chin bible

1 Corinth 11

¹ Keima Christa dungsuna kaum bang hin nangho keima dungsuna umun.

²Tun sopite, nanghon imajousea keima neigeldoh jinguva, chonna ding thugou kapeh bang banga dettah-a nachin uva nanit jeh-un kapahchauve.

³Ahivangin Christa chu pasal jouse luchang ahia, pasal chengse numei luchang ahi, chule Christa luchang Pathen ahi chu, heleu chun kalung ahi.

⁴Koi hile pasal lukhuh khuhpuma taova ahim, lhagaova thu seidoh ahim chun alu ajabol lou ahi.

⁵Ahin numei lukhuh khuh louva taole lhagaova thu seidoh chun alu ajabol lou ahin, alu chu akiveltol tobang ahi.

⁶Numei lukhuh khuh lou aumle kivomui ngal hen; alu veltol le asam kivomui chu numei dinga jachatna ahile, lukhuh kikhuh hen.

⁷ Pasal vang chu Pathen lim bangle aloupina ahi jeh chun lukhuh khuh lou dingdol mong ahi. Numei vang chu pasal loupina ahi.

⁸ Ajeh chu pasal hi numeija kona ahipoi; numei joh hi pasal'a kona jo ahibouve.

⁹Chujongle pasal hi numei dinga kisem ahipoi; numei bou pasal dinga kisemjoh ahi.

¹⁰Chuti ahi jeh chun vantil teho jala numei jin thaneina alua achin ding dol thu ahi.

¹¹Ahivangin Pakaiyah pasal beijin numei aumpon, numei beijin pasal aumpoi.

¹²Pasal'a kona numei ahi banga chu numeija kona pasal uma ahi; ahivangin thil jouse Pathen'a kon ahi.

¹³Nalungin gelunlang ngaitouvin, numei jin lukhuh khuh louva Pathen henga atao hi kilomnam?

¹⁴Pasal'in asam akihoisaova ahile, ama dingin minah sahmo aume, ti hi chonna ngaimong jongin nahil lou uham?

¹⁵Numei vang asam asaole ama dingin hichu aloupina ahi; ajehchu asam chu akhu dinga kipe-a ahi.

¹⁶Ahivangin anela aumle, eihon hitobang dan mong chu ineipouve; Pathen houbung miten jong aneipoi.

¹⁷Amavang hiche thu kahilchah naova hin kapahcha pouve; nangho phatcheh nadinga kikhomji nahipouvin setna cheh joh dinga kikhomji nahiuve.

¹⁸Ajeh chu amasa penin, nangho houbung'a nahung kikhop tengule, nalah uva loitum tumin nakikhen jiuve ti kajan, chule tah jong katahsan thim thime.

¹⁹Nalah uva mikitahtah ho ahung kiphondoh theina dinga, ginchat chom chom nei jong umding mong ahi.

²⁰Chuti ahi jeh chun nangho mun khatna nakikhop tengule, Pakai jan anjon nehna hoi ahijipoi;

²¹Amikipmin adang neh masangin ajan an akineh masahjiuvin, chule khat gilkelin aumin, khat ju akhamjin ahi.

²²Nanehna dingule nadonna dingu na-in'u um louham? Ole Pathen houbung chu nahsahmo-a bola chule ima neiloute chu jachatsah nahiuvem? Ipi kaseipeh ding nahiuvem? Hiche thua hin nangho pahchau vingem? Pahcha pong kate.

²³Pakaiya kona kalah nangho kapehsonu thuhil chu hiche ahi, Pakai Jesu amatsah ding jan-u chun, hiche janlele chun aman changlhah alan,

²⁴Athangvah jouvin ahehbal balin, kilah-un, neuvin, Hiche hi katahsa nangho dinga kihehbal chu ahi; keima neigeldoh jingna dingun hichehi bolun, ati.

²⁵ Chutima chun, a-anneh jouvun khon jong chu alan, Hiche khon hi kathisana kitepna thah ahi; nanghon nadon chanuva keima neigeldoh na dingun bolun, ati.

²⁶Ajehchu hiche changlhah naneh uva, hiche khona nadon lai chanuva, ahung kit kahse-a Pakai thina chu naphondoh jingu ahi.

²⁷Hijeh chun koi hile anehoi hilouva changlhah chu ne-a ahim, khona chu dona ahim chu, ama chu Pakai tahsale athisana themmo chang ding ahi.

²⁸Amavang mi ama kikholtoh chehhen, chule changlhah chu nehen, khona jong chun donhen.

²⁹Chuche Pakai tahsa chu geltoh lou hella, chule lomlou hella ne-a donna chun, oimo achana dinga adonna, aneh ahi.

³⁰Hiche jeh chu ahi, nalah uva mi tamtah lhasama chule veise-a ahin, chule nena nen a-imumil tapouve.

³¹Eimale eima kikholtoh cheh vangleu hen oimo ichan lou dingu ahi.

³²Oimo ichan tengule, vannoi toh themmo ichantha louna dingun, Pakaiya konin engbolin iumjiuve,

³³Hiche jeh chun, kasopite, ane dinga nahung kikhop tengule khatle khat kingah kimun.

³⁴Nahung kikhopnau chu oimo-a aum louna dingin, khattou agilkela aumle a-in'a hin nehen. Adang chengse vang kahung tengle sujang soh nange.