Read Thado Chin 1 Corinth 13 Bible Online

1 Corinth 13 - Thado Chin bible

1 Corinth 13

¹Keiman mihemho paole vantil ho paovin thu sei jeng jongleng, ngailutna kanei loule, sum-eng kivogingle khutbeh kibeng bangbou kahi ding ahi.

² Lhagao thu seidoh theina thilpeh neijingting, thugil jouse hettohna le hetna jouse nei jongleng, chule mol tolmang theina tahsan nei jongleng, ngailutna kanei loule imacha kahilou ahi.

³Chule mivaicha gentheiho vahna dingin kanei jouse toh jeng jongleng, govam jeng dingin katahsa pumpi toh jeng jongleng, ngailutna kanei loule imacha phatchomna aumpoi.

⁴Ngailutna hin ni sottah athohjin, he jong ahepin ahi; ngailutna hin thangset abolpoi; ngailutna hin kichang vahchoi abolpoi, hoi jong ahoithopoi,

⁵Nunset abolpoi, amachang phatchomna abolpoi, alungsa baipoi, setna agelpoi;

⁶Chonsetna kipah louhelin thutah akipapiji;

⁷Ima jouse-a athoh hatnin, imajouse atahsanin, imajousea akinemin, imajouse athoh hatjin ahi.

⁸Ngailutna hi imatih chana mangthah lou ding ahi; lhagao thu seidoh vang chu mangthah ding ahi; paochom het jong chu mang ding ahi; hetthemna jong chu mang ding ahi.

⁹Ijeh-inem itile eihon kim louva ihetnu ahin, kim louma lhagao thu iseidohjiu ahi.

¹⁰Abulhing chamkim ahung tengle, akim lou chengse hi kisubeisoh ding ahitai.

¹¹Kachapan laijin chapang paovin kapaojin, chapang lunggelin kageljin, chapang thu ngaiton kangaiton ahi; kakhanlhit phat vangin chapang thu jouse chu kapailhatai.

¹²Ijeh-inem itile tu-a hi eihon phatvet sunga kichen louva imu-u ahi; chuteng vangle kimaito-a imu dingu ahi. Tunvang kahet akimpoi, chuteng vangle eihet kimsoh banga hi kahet kimsoh ding ahi.

¹³Tun tahsan, kinep, ngailut hicheng thum hi aumin; ahin hicheng lah-a hin ngailut achungnung pene.