Read Thado Chin 1 Corinth 14 Bible Online

1 Corinth 14 - Thado Chin bible

1 Corinth 14

¹Ngailut chu delun; ahin lhagaolam thilpehho chengse chan ding ponpanun, adeh setnin lhagao thu naseidoh theina dingun.

²Paochom dangkhat tho-a thuseija chu mi jah-a seidoh hilouva, Pathen jah-a seijoh ahi; ajeh chu koiman ahetpehpoi, ahinla aman lhagaova thugil chengse chu asei ahi.

³Lhagao thu seidoh vang chun miho khan tousah nale, tilkhouna, chule lungmon sahna thu asei ahi.

⁴Paochom dangkhat tho-a thuseija vang chu ama changa khantouna-a anei ahi; lhagao thu seidoh vang chun houbung chu akhantou sah ahi.

⁵Nanghon nabon chaovin paochomin thu seileu chun kalung ahi; ahivangin chusang jong chun lhagao thu seidohleu chun kalung ahijoi; chule paochom tho-a thuseija chun houbung khantou sahna dinga, athusei chu aledoh louva ahile, chusanga chu lhagao thu seidoh chu chungnungjo ahi.

⁶Tun, sopite, keiman naheng uvah hunging ting paochom hung tholeng; thu phondoh ahim, hetna ahim, lhagao thu seidoh ahim, thuhilna lam ahim, kasei loule ipi phatchomna nanei ding uham?

⁷Thil gingthei lah jenga jong kuli ahim, selangdah ahim, aginteng a-aw akikhel loule; kuli ahi, selangdah ahi kon ahetkhen dingham?

⁸Ahiloule sumkon gin akichet loule, koiham gal kon dinga kigothei dinga?

⁹Chutobangma chun nanghon mihet bai ding pao natho louvule, ipi naseiju ahi iti kihet dingham? Nangho huijah-a thu sei tobang nahiu ahi.

¹⁰Ija kihem, vannoi'a hin paochom paochom tamtah aume, ahivangin ikhat kiseina hilou khatcha jong aumpoi.

¹¹Chuti ahijeh chun chuche pao chu ipi kiseina ahi kahet louva ahile, athusei ngaija keima chu ama dinga paomah kahiding, thuseipa jongchu keima dinga paomah tobang hiding ahi.

¹²Chuti chun nangho jong, lhagao thilpeh chan chom chom nei ding naha lunggulu ahin, hichu houbung in khantou na-a aneina dingin aletsetna nanei theina dingun holun.

¹³Hiche jeh chun paochom tho-a chun athu jong ale theina dingin taohen.

¹⁴Paochomin taoleng, kalhagao chu taova ahinan, ahinla kahetna hin ga aso jipon ahi.

¹⁵Chuti ahile apipen iham? Keima lhagaovin taovingting, hetna-a jong taovinge; lhagaovin jong la sangting hetna-in jong la sange.

¹⁶Achuti loule nangman lhagaovin thangvahna seile chun, amuna tou ima he loulaiho chun nathang vahna chu, Amen, iti ati thei dingham? Nathusei chengla he louva?

¹⁷Nangma vang chun phate tah-a thangvahna nanei ahin, ahivangin midang akhantou sahpoi.

¹⁸Nangho nabonchao sanga paochoma thu kasei tamjoh jeh hin, Pathen kathangvah-e;

¹⁹Ahivangin houbung sunga midangho kahil theina dingin, paochoma thu cheng sangsom kasei sangin, hetna-a thu cheng nga seidoh ding kadeijoi.

²⁰Sopite, nangho hetna-a chapang hihih-un; amavang nunsetna lama chapang hiuvinlang, hetna lama pilhingun.

²¹ Dan lekhabua hitin akisune, keiman hetphah lou paochom thohole gamdang miho kama, hiche mite jah-a hi thu kasei ding ahi, hiti chun bol jongleng amahon kathu angaideh lou dingu ahi, tin Pakaiyin aseije.

²²Hiche jeh chun paochom tho hi atahsan dinga hilouvin, atahsan louho dinga melchihna ahi; lhagao thu seidoh ho vang chu atahsan louho dinga hilouvin, atahsanho dinga melchihna ahi.

²³Hiche jeh chun houbung chengse kikhom henlang, chule ami takipmin paochom thohen, chu-a chun mi maimaile tahsanna neilouho khattou hung lutle, Nangho chu angola ahi, ati lou dinguham?

²⁴Amavang nabonchaovin lhagao thu seidoh sohkeileu chun, atahsanlou ahim, milham ima helou khattou hung lutle, hichengpi chun asetna sosal intin, hichengpi chun oimo achan ding;

²⁵Chule chutia chun alunggila thuguh jouse chu kiphong doh sohkei ding; chule chutia chu akhupbo-a lhu-a Pathen ahou ding, nangho lah-a Pathen aum chu aphonjal ding ahi.

²⁶Achutile, sopite, iti danham? Nangho nakikhop tengule khat cheh-in la ahim, thuhil ahim, thuphondoh khat ahim, paochom tho ahim, chule khatnin athu aledoh ding nanei chehjiove. Hitiho jouse chu khantouna dinga kibol hihen.

²⁷Khattouvin paochoma thu aseija ahile, ni hijongle atampena thumin, kilhah lhah-in seijuhen, chule khatnin athu ledoh hen.

²⁸Athu ledoh ding aum lou vangle, ama chu houbung'a thipbeh chan umhen, ama chang jahle Pathen jah ding maijin thu seihen.

²⁹Lhagao thu seidoh nile thumin thu seihen, chule adang chengse ngaitohen;

³⁰Ahivangin akoma touho khatpen pen henga thu kiphong aumle, amasapa chu umthim hen.

³¹Ijeh-inem itile mi jouse athep theina dingle mi jouse alungmon theina dinga, khatchenga kilha kilha-a lhagao thu naseidoh theiju ahi.

³²Themgaoho lhagao chu themgaohobou thua nung ahi.

³³Ijeh-inem itile Pathen chu thunoh lungjin kona ahipoi, mithengte houbung ho jouse-a ahi banga, lungmon kona ahibouve.

³⁴Na numei hou chu houbung kikhop na-ah thipbeh chan umthim uhen; ijeh-inem itile amaho chu thusei kipe-a ahipouve, chusang chun danthua kisei bangin, thu noija umuhen.

³⁵Amahon ikhat het nom aneijule, a-inmun uvah ajite cheh kidoh uhen, ajeh chu houbung kikhopna-a numei dinga thusei hi jachat umtah ahi.

³⁶Iham? Pathen thuhi nangho-a kona hung sohdoh ham? Ahiloule nangho changseh heng jengabou hungaham?

³⁷Khattou ama themgaova akingaitoa ahiloule lhagao mi-a kingaito aumle, naheng uva kalekhasut chengse chu Pakai thupeh ahi ti hehen.

³⁸Amavang khattouvin ahet loutah-a ahile, ahe louvin um jenghen.

³⁹Hiche jeh chun, kasopite, Pathen lhagao thu seidoh guttenin ponpanun, paochoma thusei jong kham hih-un.

⁴⁰Amavang imajouse hoitahle kituptah-in bolcheh-un.