Read Thado Chin 1 Corinth 15 Bible Online

1 Corinth 15 - Thado Chin bible

1 Corinth 15

¹Vo sopite, kahetsah nahiuve, najah uva kalhangsap Kipana Thupha chu san jong nasanu ahitan, chujongle hia chu nadinu ahitai;

²Najah uva kathu lhangsap chu nachin jingule, hichea chu huhhing-a um nahitaove; chuti ahi lou vangle natahsanu chu moh ahi.

³ Ajeh chu amasapena Pathen lekhabu dungjuija eiho chonset jala Christa thia ahitai, ti thuhil pipen kamu chu nangho kapehdoh ahitai;

⁴ Chule ama avuijun, ani thumnin Pathen lekhabua kisei dungjuijin athoudoh kittan ahi.

⁵ Chuin ama Cephas henga akilah masapenin, chuin somleni ho henga.

⁶Chujouvin mi janga valjen sopiteho henga khatvei lah-in akilah-in ahi; amaho atamjo tu gei hin aum nalaijui, akimkhat vang a-imu taove.

⁷Chuin Jacob henga akilah-in, chujouvin solchah ho chengse henga akilah-in ahi.

⁸ Akhonna-in aphat louva peng tobang keima henga ahung kilah-in ahi.

⁹ Keima solchah ho lah-a alhumpen kahin, chule Pathen houbung kabolset jeh chun solchah min pu dinga jong kilom kahipoi.

¹⁰Ahivangin Pathen lungset vangin kahibep chu kahinai; chule ama lungsetna eitona chu moh-in aumpoi, amaho chengse sangin katong gim jon ahi; ahivangin keima kahipoi eiumpia, Pathen lungsetna chu ahibouve.

¹¹Ahinla keima kahin, amaho ahiuvin, hitia chu thupha chu samphong cheh kahiuvin, nanghon chutia chu natahsanu ahitai.

¹²Ahin tu-a, Christa chu athi lah-a konin kaithouvin aumtai tia kilhangsama ahile, nalah uva mi kimkhat chun, athi thokit himhim aumpoi, iti nati uham?

¹³Athi thokitna himhim aum loule, Christa jong chu kaithouva umlou hinte;

¹⁴Chule Christa chu kaithouva umlou ahile, kathu hil lhangleu jong hi moh ahin, natahsanu jong moh ahi.

¹⁵Mithi thokitna umlou ahileh, keiho hi Pathen lama jouthu hettohsah-in kakilangui; ajehchu keihon Pathen'in akaithoulou Christa chu akaithouve tin, kahettoh sah-un ahi.

¹⁶Ijeh-inem itile mithi thoukit lou ahile, Christa jong chu thoukitlou ahi;

¹⁷Christa chu thoukit lou ahile, nanghon natahsanu jong moh ahi; nangho tu-a jong chonsetna umjing nalai nahi dingu ahi;

¹⁸Chuti chu ahile Christa-a imu milteho chu amangthahgam ahitaove.

¹⁹Tu hinlai sung ding jenga Christa chu kinepna ineiju ahile, mi jouse sanga khoto umpentah ihi dingu ahi.

²⁰Ahivangin tun Christa chu a-imuho lah-a aga masapenin apangin, athiho lah-a konin athoudoh tan ahi.

²¹Mihem'a kona thina aum jeh chun, Mihem'a kon maman thokitna aumtan ahi.

²²Ijeh-inem itile Adam'a mi jouse athi banga chu, Christa-a mi jouse hinsah-a umding ahi.

²³Ahivangin, mijouse ama phatdol cheh-a umding ahi, Christa agamasa hintin, chu joule Christa ahung teng amite hidiu ahi.

²⁴Chujoutah chule kichai ding ahi; chutengle aman vaipoh, thuneina, thahatna jouse asuhmang sohkeija, Pa Pathen khutna gam apehdoh ding ahi.

²⁵ Aman agalte jouse akengto noija akoi masangse-a, aman vai apoh ding ahi.

²⁶Gal nukhah pen thina ahi, hi jong chu asuhmang ding ahi.

²⁷ Ajeh chu aman, imajouse akengto noija akoi ahitai. Ahin, imajouse athu noijah akoije, atia hin, athu noija koipa chu chucheho lah-a chu kisimthalou ahi, ti kichenin akilange.

²⁸Imajouse ama thu noija aum phat chule, Pathen chu ijakaija ijakai ahi theina dinga, ijakai athu noija umsahpa thu noija chu Chapa jong umding ahi.

²⁹Chutobang chu ahiloule athiho dinga baptize changho iti taovintem? Athiho kaithouva aum louhel uva ahile, chuteho chu amaho dinga ibola baptize changji hiuvintem?

³⁰Chule keiho jeng jong ibola nidan takipma settoh-a kaum jinguham?

³¹Sopite, Pakai Jesu Christa-a nangho chungchanga kakisonna kapatna kanela kasei ahi, keima niseh-in kathi jinge.

³² Keiman mihem ngai banga Ephesia gamsaho toh kisat kahile, phat chomna-a kanei dingham? Athiho kaithouva aum loule, hungun, neuhite donuhite; jingle kithita dingan.

³³Lheplhah-in um hih-un: kivoppi phalouvin mi nunphat asusen ahi.

³⁴Chonphatna lama khangun lang, chonse hih-un; ijeh-inem itile abang khat Pathen hetna nei lou ahi. Hiche hi jahcha naovin nate tia kasei ahi.

³⁵Ahin mi khat touvin, Athiho kaithouva iti umham? Itobang tahsa vou po-a hungji aham, tinte.

³⁶Vo lungthimbei, nangman muchi natu chu athi loule akehpoi;

³⁷Khonunga akung abah ahung umding chu nangma tu ahipoi; kolbu hihen, chang dang hijongle, nangman achangbou natu ahi.

³⁸Pathen'in alung chama tahsa apeh ahibouve; achang takip chu ama dol cheh tahsa apehji ahi.

³⁹Amavang sa jouse akithakhat poi, mi-a hihen, sa-a hijongle, vachale nga-a hijongle, got chomcheh ahi.

⁴⁰Van vou aumin, leiset vou jong aume; ahivangin van tipum loupina achom ahin, leiset vou loupina achom ahi.

⁴¹Nisa loupina achom ahin, lhathah loupina achom ahi; chule ahsi loupina jong achom ahi, ahsi le ahsi jong aloupina achom chom ahi.

⁴²Chutobangma chu athiho thokit jong hi ding ahi. Monmang theija kitu-a ahin, monmang thei louva kikaithou ahi;

⁴³Manmo-a kitu-a ahin, loupia kikaithou ahi, hatmoa kitu-a ahin, thahat tah-a kikaithou ahi;

⁴⁴Tahsa vou kitu-a ahin, lhagao vou kikaithou ahi. Tahsa vou uma, lhagao vou jong uma ahi.

⁴⁵ Chule hitihin akisune, mi masa Adam chu mi hing anahi; Adam nunung joh vang chu hinna pe-a lhagao ahi.

⁴⁶Ahivangin lhagao lam chu amasajopoi, mihing joh chubou aum masai; chujouvin bou lhagao lam chu aume.

⁴⁷Mihem masa chu leija kisem leija kon ahin, mihem nina vang chu van'a hungkon Pakai ahi.

⁴⁸Leija kisem mite jong hi leija kisem mipa chutoh bang cheh ahi; van mite chu van'a Pa tobang cheh ahiuve.

⁴⁹Chule leija kisempa lim ilo banguva chu, van'a Pa lim jong ilo dingu ahi.

⁵⁰Ahivangin, sopite, Tahsale thisan hin Pathen lenggam alo theipoi, monmang thei hin monmang thei lou chu alo theipoi, tia kasei ahi.

⁵¹ Veuvin, keiman nangho thugil khat kaseipeh nahiuve, ibon chaova ina-imut lou dingu ahi;

⁵²Ahinla sumkon gin nunung pena chu, hai khat sunga, mitphet kah louva, ibon chaova ikikhel sohkei dingu ahi; ajeh chu sumkon hung ging ding, chule athiho chu monmang thei louva kaithouva umding, chule eiho ikikhel dingu ahi.

⁵³Ijeh-inem itile hiche monmang thei hin monmang thei lou chu akivona, thi thei hin thi thei lou chu akivon ding ahi.

⁵⁴ Chutia chu monmang theijin monmang thei lou chu akivona, thi theijin thi thei lou chu akivon tengtah chule, jona-in thina chu aval lhumtai, tia kisun thu chu guilhung ding ahi.

⁵⁵ Vo thina, namidena hoiham? Vo lhankhuh, na jona hoiham?

⁵⁶Thina mide-na chu chonset ahi, chonset thaneina chu dan thupeh ahi.

⁵⁷Ahinla I-Pakaiyu Jesu Christa vanga jona eipeuva Pathen chu thangvah-in umhen.

⁵⁸Hijeh chun, sopi deitahte, dettah-in suhlong hoi hilouhelin pangun, gunchu tah-in Pakai na tong jingun; natohgimnao chu Pakaiya moh ahipoi ti naheuve.