Read Thado Chin 1 Corinth 2 Bible Online

1 Corinth 2 - Thado Chin bible

1 Corinth 2

¹Chule, sopite, keima vang naheng uva Pathen thu hettohsah seiphonga kahung chun, thusei themna le chihna toh thon kahungpoi.

²Jesu Christa thu le thingpel chunga akikhetbeh thu tailou, nalah uva thudang hehih helinge tia kangaito ahi.

³ Chule keima nalah uva hatmotah, kichatah, chule kihot hot jinga kana um ahi.

⁴Kathusei le kathu lhangsap chu mihem chihna-a jollhah themna ahipon, amavang Lhagao le athahatna-a phot tohna ahijon ahi:

⁵Chutia chu natahsan naochu mihem chihna-a dinga hilouva, Pathen thahatna joh-a ding ahina ding ahi.

⁶Amavang apilhing saho jah-a vang chihna thun jong kaseiji naove, ahivangin hiche vannoi leiset chihna thu ahipoi, hiche vannoi leiset vaipo mangthah dingho chih thu jong ahipoi.

⁷Ahin Pathen chihna thuguh, iloupina dinguva Pathen'in vannoi leiset um masanga agot masah chihna thu ki-im chu, kaseijoh-u ahi.

⁸Hichu hiche vannoi leiset vaipoho him himin ahetoh pouve, heleu loupina Pakai chu thingpel'a akhetbeh louhel dingu ahi. Hijongle,

⁹ Ahin mit mukhah lou, na jahkhah lou, Mihem lunga lutkha lou, Pathen'in angailuho dinga agotsa chengse chu, tin akisune.

¹⁰Ahivangin Pathen'in eiho hengah Lhagaovin aphongdoh tai, Ajehchu Lhagaovin imajouse akholdoh jia, Pathen thuguh jong akholdohji ahi.

¹¹Mi lung sunga thu um mihem'a um lhagao tailou adang mihem koiham ahea? Chuche bang chun Pathen thu jong Pathen Lhagao tailou koima dangin ahepoi.

¹²Tun Pathen'in manbeija eipeh chengseu hi hetna dinga, eiho vannoi leiset lhagao changa hilouva Pathen'a hungkon Lhagao changa ihiuve.

¹³Hitiho chu mihem chihna-in ahil thua sei louva, Lhagao Thengin ahil thu chu, lhagao le lhagao tekah-a kahilu ahi.

¹⁴Tahsa lam mihem ten Pathen Lhagao thuhi alajipouve; ajehchu amaho dinga ngol thu ahi, chule hichu lhagaova hetkhenbou ahi jeh chun athudol chu ahekhen thei himhim pouve.

¹⁵Lhagao mi vang chun thil ijakai ahekhenjin, ama chula koiman ahekhen jipoi.

¹⁶ Ajehchu Pakai lungthim he-a, ama hil thei dinga koiham? Eiho vang chu Christa lung pu-a ihiuve.