Read Thado Chin 1 Corinth 3 Bible Online

1 Corinth 3 - Thado Chin bible

1 Corinth 3

¹Sopite, keiman lhagao lam mite henga sei bangin nangho henga kasei theipon, tahsa lam mite henga sei banga, Christa lama naosen ho jah-a seibanga kasei ahi.

² Keiman nangho an guma vah louva noitwija kavah-bou nahiuve, ajehchu tuchan hin nane thei hih-un, tu jengin jong nane thei hih laijuve;

³Nangho tu geijin tahsa mi nahi nalaijui. Ijeh-inem itile nalah uva kithangset to, kinah kiphun kikhentel aum nalaije; ahile, natahsa chonu hilouham? chule mi chon chona chon nahi lou uham?

⁴ Ijeh inem itile khatnin, Keima Paul'a kahi, nati uva; adang khatnin, Keima Apollo'a kahi, nati laiseuva chu; tahsa-a nahi lou uham?

⁵Apollos chu koiham? Chule Paul chu koiham? Pakaiyin mijouse apeh dungjuija, alhacha-a pang, amani-a kona nanghon natahsanu ahibouve.

⁶ Keiman kaphu ahin, Apollon twi achap ahi, Pathen bouvin akhansah ahi.

⁷Chuti ahin aphutpa jong ima ahipon, atwi chappa jong ima ahidehpoi; akhansah-a Pathen chubou ahipen ahi.

⁸Tun aphutpa le atwi chappa chu thakhat ahi lhone, ahivangin atohgim lhon dungjui juija tohman asan gel lhon ding ahi.

⁹Ajehchu keini Pathen tohkhompi kahi lhonin, nangho Pathen lou nahiuve, Pathen in-sah nahiuve.

¹⁰Pathen lungset vanga eikipeh dungjuija insa themtah banga abul kaphu ahitai, achunga chu midangin asah ahi. Amavang chuche chunga sa ding chengsen asah danje ding chu chingthei chehhen.

¹¹Ijeh inem itile abul phudohsa tailou chu abul dang koiman aphutdoh theitapoi, chuche abul kiphut chu Jesu Christa ahi.

¹²Chuche bul kiphut chunga chun koi hijongle sana-a sanoman sahen, dangka-a sanoman sahen, song mantama sanoman sahen, thinga sanoman sahen, bi-a sanoman sahen, pola sanoman sahen;

¹³Atoh cheh-u chu hung kiphongdoh cheh ding ahi; ijeh-inem itile nikho chun aphondoh ding, hiche ni chule meija kiphongdoh ding ahijeh chun, meijin mijouse anatoh aset aphat apatep ding ahi.

¹⁴Achunga insaho chu koi koi hile a-insah chu adin jinga ahile, ama chun toh phatman asan ding ahi.

¹⁵Chule koi hile a-insah akahvama ahile, ama chu hakam ding; amatah vang huhhing-a umding ahi, ahivangin meikong lah pal galkaija bang ding ahi.

¹⁶ Pathen in theng nahiuva chule nasunguva Pathen Lhagao achen chu nahet lou uham?

¹⁷Pathen in theng suhboh-a chu Pathen'in ama chu asuhmang ding ahi. Ijeh-inem itile Pathen in chu thengtah ahi, nangho jong chutichu nahiuve.

¹⁸Koimacha amale ama kilhemlha hihhen. Nalah uva khattou, tulai khang thua hi kachinge, ti aumle, ama chu achihna ding chun ngol hen.

¹⁹ Ajeh chu hiche vannoi leiset chihna hi Pathen dinga ngolna ahi. Ajehchu, aman michingho chu ajonchih naovah amanjie, tin akisune.

²⁰ Chujongle, Pakaiyin michingho lunggel le thil ngaito chu moh ahi ahenai, ati kitleuve.

²¹Hijeh chun koima mihem'a kisong hihhen. Ijeh-inem itile thiljouse nangho-a ahi;

²²Paul hihen, Apollos hihen, Cephas hihen, vannoi leiset hijongle, hinna hihen, thina hihen, tupetle khonung hijongle, aboncha nangho-a ahi;

²³Nangho jong Christa-a nahiuve, Christa chu Pathen'a ahi.