Read Thado Chin 1 Corinth 4 Bible Online

1 Corinth 4 - Thado Chin bible

1 Corinth 4

¹Keiho hi Christa lhacha le Pathen thuguh chingin min eingaitou hen.

²Gou ching jenga jonghi, tahsan umtah mi ngaija ahi.

³Ahivangin, nanghon kaumchan nakhol diu, ahiloule mihem thutan na-in akhol ding chu keima dinga thilneocha bou ahi. Henge keiman jong kaumchan kaki kholpoi.

⁴Ajeh chu keiman kachungah imacha kakihetpoi, ahinla hichea hin them eichanpoi; ajeh chu kaumchan khola Pakai joh ahibouve.

⁵Chuti ahi jeh chun Pakai hung kahsen aphat masangin thu tanloi hih-un; aman muthima thilsel chu khovah-a ahinphondoh ding, chule mihem lung sungin ipi agelem hi jong chu aphondoh ding ahinai. Hiche teng chule amitakipmin pachatna achan ding dol cheh Pathen'a kona asan ding ahi.

⁶Sopite, akisun chengse kalvala koiman angaito louding; chutia chu nalah uva khatnin khat asona, achomkhat chunga hoithona aneilou ding ti thuhil hi keinia kona nahetdoh nadiuva, keima le Apollos hi tekah na-a kahinsei ahi.

⁷Ajeh chu koiham midanga kon nachom khenuva? chule nakisan louvu thil ipi nanei juvem? Nasan uva ahile ibola asang lou banga hoithoa nahiu vem?

⁸Nangho tun nava taove, tun nahautaove, keiho beija lengho banga vai nahomu ahitai. Keiho jong nang hotoh thakhatna vai ihomkhom theina dinguvin, vai hom tahtah hileu chun kati.

⁹Pathen'in keiho solchah ho hi, athi dinga kigo-a banga anukhah pena eikoiju hinte tin kangaitoi; hijeh-a chu vannoi le, vantil teho, chule mihem vetchah-a um kahiuve.

¹⁰Keiho vang Christa jala angola kahiuvin, nangho vang Christa-a achinga nahiuve; keiho kadoijun, nangho vang nahatnui; nangho mi jatah nahiuvin, keiho vang mi nahsahmo kahiuve.

¹¹Tugei jong hin kagilkel, kadang chah-un, ponsil nihchen bei kahiuvin, jepmin ka-umuvin, chennabih neilou kahiuvin;

¹² Kakhut uvin na kakitoh uvin; eihouseuva phatthei kabohjiuvin, eikibolset tengule kathoh hamhamun;

¹³Eikihehset tengule kalhem lungdamjiuvin ahi; keiho vannoi bohsele thil jouse nen bangin tu geijin kaum nalai uve.

¹⁴Nangho jachat sahna dinga hicheng thuhi kahinsut ahipoi, kacha deitahte banga hilchahnajoh-a kasut ahibouve.

¹⁵Ajeh chu nanghon Christa-a chun nahiluva sangsom nei jeng jongleu chun, pa khat kal naneipouve; ajeh chu Kipana Thupha vanga Christa Jesu'a kahinsa kachate nahiuve.

¹⁶ Hijeh chun kangeh nahiuve, keima dungsun hiuvin.

¹⁷Hiche dinga chu Pakaiya tahsantah kachapa deitah Timothy naheng uva kahinsol ahi; keiman muntina houbung tina kahil banga, Christa-a kaum thudol aman nangho nageldohsah dingu ahi.

¹⁸Tun nangho lah-a kimkhat keima hi naheng uva hungponte, tin nahoitho taovin ahi.

¹⁹Ahivangin Pakai lunglam ahile naheng uva hung vahnange; chutengle chuche ahoitho cheng thu hilouvin athaneinao henang kate.

²⁰Pathen lenggam chu thua hilouvin, thanei na-a ahibouve.

²¹Hoiche ham nadeijoh-u? Naheng uva mol kachoija kahung dingha, ngailut neija lungnempu-a lhagaova kahung dingham?