Read Thado Chin 1 Corinth 5 Bible Online

1 Corinth 5 - Thado Chin bible

1 Corinth 5

¹ Nalah uva jon thanhoi aume, ti kichentah-in akijan ahi, chidang namdangte lah jenga jong kiminphah khalou jon thanhoi aume; mikhatnin apa ji jin aneije.

²Chutobanga chonpa chu nalah uva kona nodoh-a aum ding lhadaina-a neitah sangin, hoithonan naneijo taove.

³Keimatah katahsa alhah lou vangin kalhagao nalah uva alhan, chutobanga chonpa thu chu katanin, hitihin kaki chaisah tai;

⁴I-Pakaiyu Jesu Christa mina, keima lhagaotoh, I-Pakaiyu Jesu Christa thaneina toh nakikhop tengule,

⁵Chutia chon mi chu atahsa manna dinga Satan khutna pedoh-un, I-Pakaiyu Jesu nikho nileh alhagao huhhing-a aum theina dingin.

⁶ Nangho nakisonnao chu aphapoi; chol themchan changbong lum apumpin achansohjin ahi ti nahet lou uham?

⁷ Tu-a nangho cholsolou nahi bangu chun, changbong lum thah nahina dingun chol lui chu then ngimun paidoh-un. Ijeh-inem itile ikalchuh kut satha dingun Christa tah chu akithat tan ahi.

⁸ Hijeh chun chol lui mang louvin kut boluhite, engsetle khan gitlou chola kut bol louvin lung thengselle kitahna-in cholsolou changlhah-in kut boluhite.

⁹Keiman nangho kahinthot lekha-a chun jon panhotoh kivopkhom hih-un, tin kahin suntan ahi.

¹⁰Achutinai tin vannoi'a jon panho neipap kiloseho, misumang ho, thilha houho toh nakivop khom louhel dingu ahipoi, chutile vannoi leiset hi nachanhel dingu ahitai.

¹¹Amavang sopi-a kisimsa khattou ajona, neipap kiloset abola, thilha ahouva, ataitoma, ju akhama, mi anam bola ahile, ama chu kivoppi hih-un, hitobang mi chu an jeng jong neh khompi hih-un, tia kahinsut ahibouve.

¹²Polamaho thu tanding ka-ikin tahham? Houbung sunga mite thu natanji hih-um?

¹³ Polama miho thu vang chu Pathen'in bou atan ahi. Hijeh chun nalah uva konin chuche michonse chu paidoh-un.