Read Thado Chin 1 Corinth 6 Bible Online

1 Corinth 6 - Thado Chin bible

1 Corinth 6

¹Nangho khatnin khat chunga boina thu naneijule, mithengho anga hehta louva michonpha lou anga gaheh ji nangam um?

²Mithengten vannoi thu atan dingu hi nahet louvu ham? Chule vannoi thu nangho tanding ahile, thu neopen tan dinga kilom lou nahiu ham?

³Eiho hin vantil teho thu kisan itan dingu ahi hi helou nahiuvem? Achutile tulai hinkho chungchang thuhi itanda dingu ham?

⁴Chutia chu tu hinlai thudola thu tan ding nahiule, houbung in imacha-a asimlouho chu thutan na mun'a itousah dinguham?

⁵Najachatna dinguva hiche thuhi kahinsei ahi. Sopicha kah-a thu tanlha thei nalah uva miching khatcha beh jong umlou hellaham?

⁶Ahinla nangho asopin asopi chunga thuboi neija heh-an jong atahsan louho angabou nahehjiuve.

⁷Nangho khatle khat nakiheh tou chu nangho dingin losamna lentah ahitai. Themmo nakichan joh jenguva pha hilouham? Lheplhah-a naum joh jenguva phajo hilouham?

⁸Achutipoi, nangho mama-in aphalou nabolun chule mi nalhem uvin, chule hicheho chu nasopi hou chunga nabol uve.

⁹Ole michonpha lou hon Pathen lenggam alo lou dingu ahi, ti hi nahet lou uham? Nangho lheplhah-in um hih-un; mijong, milim hou, mijigem, mihuh, palepa kikoi,

¹⁰Gucha, neipap kilose, jukham, mihanse, minambol; hiteho chun Pathen lenggam alo louhel dingu ahi.

¹¹Nangho abang hiti chu nahiuvin, ahivangin Pakai Jesu Christa minle Pathen Lhagaova kisil ngim nahitaovin, akisuthenga, them changa nahitaove.

¹² Keima dingin ijakai bol ngai ahi, ahivangin ijakai aphasohkei poi; imajouse keima dingin bolngai ahi, ahivangin imacha noija umponge.

¹³Oisung dinga an, an dinga oisung ahi; ahivangin Pathen'in agoma beihela ahinlha ding ahi. Chule itahsao hi jonna ding ahipoi, Pakaiya ding joh ahin, chule Pakai jong tahsa-a ding ahi;

¹⁴Chule Pathen'in athahatna-a Pakai chu akaithou ahin, eiho jong eikaithou dingu ahi.

¹⁵Natahsao chu Christa tibah ahi ti nahet lou uham? Chuti chu ahile Christa tibah ho chu kalah manga noti tibah ho-a kasem dingham? Chutiponte.

¹⁶ Chule noti'a beh chu amanu chutoh ti khat ahi ti hi nahet lou uham? ajehchu Pathen'in, amani chu tikhat hilhon ding ahi, ati ahi.

¹⁷Ahin Pakaiya beh-a vang chu amatoh lhagaova khat hia ahitai.

¹⁸Jon thanhoija konin jamun. Mihem chonsetna jouse hi atahsa polama ahi; jonthanhoi bol vang chu koi hile ama tahsa chunga chonsea ahi.

¹⁹ Ahilou jongle Pathen'a kona naneiju Lhagao Theng nalung sunguva chenga chu natahsao hi a-in theng ahi ti nahet lou uham? Nangho nangho-a tum nahipouve;

²⁰Nangho man kipe-a kicho dohsa nahitaove, hijeh chun natahsao le na lhagao un Pathen choi-an nun, hichu Pathen na ahi.