Read Thado Chin 1 Corinth 7 Bible Online

1 Corinth 7 - Thado Chin bible

1 Corinth 7

¹Tun imama thudola kahenga dinga nahin lekha sutnu chu kahindon butna hiche ahi, Pasal'in numei atohkhah louvin aphai;

²Ahivangin jon louna dingin pasal'in numei khat cheh jin neihen, chule numei khatcheh injong pasal khatcheh jin neihen.

³Ajipan ajinu chu achan dingdol chansahhen, chutobang machun ajinun jong ajipa chansah hen.

⁴Numei chun ama tahsa chunga imacha thu aneipoi, apasal'in bou aneije; chutobangma chun pasal jong ama tahsa chunga thu aneipoi, anumeijin bou anei ahi.

⁵An ngolla taona-a nakipeh theina dinguva, chomcha khat kikhena chule kivop khomloi kit dinga nakiphasah geluva ahi tailouvin, kikhen kah hih-un; achuti loule kitimlel jeh-in Satan'in lhemlha getnun nate.

⁶Ahivangin hiche hi thupeh bangtah-a kasei ahipoi, kaphatsah thua kaseijoh ahibouve.

⁷Mi jouse keima tobang cheh hile kati; ahivangin mikhatnin achom, khatnin achom dang, hitobanga chu min Pathen'a kona Phattheina chom cheh anei ahi.

⁸Jinei louva umho dingle, meithaiho dinga hiche hi kahinsei ahi, amaho chu keima banghin umleu phante.

⁹Amavang akitim jou lou ule ji neiju hen; ajehchu huh-a jon sangin jinei aphajoi.

¹⁰ Ji neisaho vang hiche thuhi kapeh ahi, keima kahipon Pakaiyin apeh ahi, numei jin ajipa dalha hihhen.

¹¹Adalhah tahjongle jinei louvin umhen, ahiloule ajipatoh kihoucham kit hen. Chule pasal'in ajinu da hihhen.

¹²Chule adangho thu dingdol vang chu Pakai hilouvin, keima sei ahi: Sopi khat touvin numei atahsanlou ji aneija, a-inneipu chutoh umkhom anople, ama chu a-inneipun da hihhen;

¹³Chule numei khattouvin pasal atahsanlou aneija, ajipan amanutoh chenkhom ding anople, ama chun a-inneipu chu da hihhen.

¹⁴Ijeh-inem itile chuche tahsanlou pasal chu ajinu jala chu kisuthenga ahitai; chule numei tahsanlou jong chu ajipa jala chu kisuthenga ahi; chutilou hile nachateo jong aboh ding ahiuve, tunla amaho athenguve.

¹⁵Hijongle atahsanlou chun adalhahtah-a ahile achele chetante; sopipa ahin ahiloule sopinu ahin hitobang thudola hin kikana aumtapoi; hijongle Pathen'in lungmonga umdinga eikouvu ahi.

¹⁶Ajehchu, Vo numei, nangman na-inneipu huhhing-a naumsah jou ding iti nahetnam? Ahiloule pasal, nangman jong na-inneipi huhhing-a naumsah jou ding iti nahetnam?

¹⁷Ahivangin Pathen'in mijouse ahoppeh bangle, Pakaiyin mijouse akou bang cheh-in, chon cheh-u hen. Chule hitobanga chu houbung jouse-a kathupeh ahi.

¹⁸Cheptansa kikou umam? cheptan chun chuti umhen. Cheptan louva kikou umam? Cheptan louvin chuti umhen.

¹⁹Cheptan chu imacha ahipon chule cheptanlou jong ima ahidehpoi; Pathen thupeh nitbou hi thupipen ahi.

²⁰Mijouse akikouva aum bang bang cheh-in um chehhen.

²¹Soh nahi puma kikou nahim? hichu khohsa hih-in; amavang ongthol nahung hithei ding vangle, hichu mangchajon.

²²Ijeh inem itile soh hipuma Pakaiya kikou chu, Pakaiya dinga ongthol ahi; chutobang chun a-ongthola kikou chu Christa soh ahi.

²³Nangho aman kipe-a kichoa nahitaove; miho soh hihih-un.

²⁴Sopite, mijouse akikou uva aum bang cheh-un, Pathen to umkhom cheh uhen.

²⁵Nungah thengho thudol vang, keiman Pakaiya kon thupeh mong kaneipoi; hijongle tahsan umtah hidinga Pakaiya kona lungsetna mu-a kahi dungjuija, kangaito danje kasei ahi.

²⁶Chutichu ahin tu laija hesohna jeh hin, hiche hi phante tin kagingchai, mi aum ngaijin um chehhen.

²⁷Numeitoh kicheng nahim? Ondoh ding ngaito hih-in. Numeija kona ongdoh nahim? Jinei lung gul hih-in.

²⁸Ahivangin jinei jongle chun achonsea nahipoi, nungah theng jong chun ji neijongle achonsea ahipoi. Amavang chutobang miho chu tahsa lama hesoh genthei athoh dingu ahi; hijongleh thohda leuchun kati ahi.

²⁹Ahivangin, sopite, hiche phat chu kisuchoma ahitai; tu-a kalin jineija chu jineilou bangin,

³⁰Akapte akap lou bangin, akipahte akipah lou bangin, thil cho-a anei lou bangin umuhen,

³¹Chule leiset chonna mangcha-a chun avala mang lou bangin umuhen. Ijeh-inem itile hiche leiset umchan danhi achemang jinge.

³²Ahin ima khohsah louhelin umleu chun kalung ahi. Jineilou chun itile Pakai chu kalung lhaidem tin, Pakai lam thil jengbou akhohsah-in ahi.

³³Ahin jineija vang chun hiche leiset thil, itile ka-inneipi kalunglhai theidem, ti jengbou akhohsah-in ahi.

³⁴Numei jinei le nungah theng kikah-a jong akikhehna aume. Numei jineilou chun tahsale lhagao agoma thengsela um theina dingin Pakai lam thil jengbou akhohsah jin ahi; jinei vang chun leiset lam thil, itile ka-inneipu kalunglhai sah theidem, ti jengbou ageljin ahi.

³⁵Hichu nangho thangkola khina dinga kasei hilouvin, naphatchomna dinguva kaseijoh ahi, umchan phakeicha naum uva, baotamna beija Pakai kin nabol theinajoh dinguva kasei ahi.

³⁶Amavang mi khat touvin acha nungah theng khat kathilbol hi adihpoi tia agela, amanu chu akul ahitah-a, aji neilou akhohsah-a ahile, alung got gotnin bol jenghen; hichea chun setna aumpoi; jineisah jeng hen.

³⁷Amavang koi hile lung dettah po-a, khohsahna neilouva, alungthim aki thunun jouva, achanu thenna tuhdet peh jingdinga gelha-a chun, thilpha abol ahi.

³⁸Hijeh chun achanu jineisah-a chun apha abol ahin; ahivangin jineisah loujo chun aphajo cheh abol ahi.

³⁹A-inneipu ahin lai chansea a-inneipi chu danna kihen jinga ahi, a-inneipu athi teng vangle amanu a-onga ahitan, Pakai tahsan ahipou le anop nop napa chutoh kicheng thei ahi.

⁴⁰Amavang keima ngaito danin, achuti um jeng theija ahile, amanu chu minun nomjo ahi, kei jong Pathen Lhagao changin kakingaitoi.