Read Thado Chin 1 Corinth 8 Bible Online

1 Corinth 8 - Thado Chin bible

1 Corinth 8

¹Milim houna-a kikatdoh thilho thudola chun: ibon chaovin hetna inei cheh uve ti iheuve. Hetna-in mi ahoitho sahjin, ngailutna hin mi akhantou sahjin ahi.

²Mi khat tou, ijakai he-a akingaitoa ahileh, ama chun ahet ding dol imacha ahetlou ahi.

³Amavang khat touvin Pathen angailut le, amatah chu Pathen het ahi.

⁴Milim houna-a kikatdoh thil nehding thudol vang chu, vannoi'a hin milim hi imacha ahipon, chule Pathen khatseh tailou chu Pathen dang aumpoi, ti iheuve.

⁵Ijeh-inem itile vanlaijola jong, leiset chunga jong, Pathen tia kiminvoho uma ahi, (chutia chu pathen tamtah uma, pakai tamtah uma ahi;)

⁶Eiho ding vangin thil jouse kona, eiho jong ama-a ihiu, Pa, Pathen khatbou aumin, chule thil jouse kona, chule eiho jong ama vanga ihinu, Pakai Jesu Christa khat bou aume.

⁷Ahivangin mi jousen chuche hetna chu aneipoi, chuti chun akimkhatnin tu geija masanga achonnau milim hou thu chu achin jeh-un, amaho chun milim houna-a kitohdoh thil ahi tin anejiuvin; chua chun ase apha hetkhenna alungu ahat lou jeh chun, akisubohji taove.

⁸Ahin an neh hin Pathen to eikinaisah dingu ahipoi; eihon ineh uleh aphajep ihi pouvin, ineh louvule jong aphamopen ihideh pouve.

⁹Ahivangin chingtheijun, nachamlhatnao hi ijem itile ahatmo ding chun kipal lhuhna higet ninte.

¹⁰Hetna neija nangma milim houna-a ankong naum chu khat touvin muhen lang hileh, sele pha hetkhenna-a lhasam ama chun milim houna-a kikatdoh thilchu neh ngam nadinga hansanna aneilo louding ham?

¹¹Chutile ajala Christa thia chuche sopi hatmo chu, nangma hetna nei jeh-a manthah lo louding ham?

¹²Ahinla sopite chunga nangho chutia nachonset uva, ase le pha hetkhennau hatmo chu namavo tengule, nangho Christa douna-a chonse nahiuve.

¹³Hijeh chun an neh-in kasopi akipal lhuhsah-a ahile, kasopi lhuh louna dingin, a-imatih chanin sa-a san nehdange.