Read Thado Chin 1 Corinth 9 Bible Online

1 Corinth 9 - Thado Chin bible

1 Corinth 9

¹Solchah khat hilou kahim? Chamlhat hilou kahim? I-Pakaiyu Jesu Christa mulou kahim? Nangho jong Pakaiya kanatoh nahi lou uham?

²Adang dangin solchah hilou jongleng, nangho dingbeh-in kahi; Pakaiya solchah kahi het kichetna mohor nangho nahiuve.

³Hiche hi kathem kathemlou eikholtohho lekalna kihonna-a kasei ahi.

⁴Nehna ding le donna dinga thuneina neilou kahiuvem?

⁵Solchah danghole, Pakai sopite, chule Cephas banga khu sopinu khattou ji-a neija kipuile mo kahiuvem?

⁶Ahiloule Barnabas le kei bouhi kanatoh lhonna-a kon haimo kahi lhonem?

⁷Koiham ama sum kineh-a sepai na tonga? Lengpithei hon sema aga nelou koiham? Gancha honpi vula anoi ne lou koiham?

⁸Chucheng chu mihem ngaidan jenga kasei ham? Danthun jong hicheng chu asei hilouham?

⁹ Mosi danthua, Bongchal chang chil pet amuh kan hih-un, tin akisune. Pathen'in bongchalho ding jengbou agel ham?

¹⁰Ahiloule eiho dinga jong asei ham? Eiho ding monga hiche thuhi kisuna ahi; lou kaija chun kinepna neija akai ding; chule kinepna neija chang vo-a chun akinepna banga amu ding ahi.

¹¹ Keihon nangho dinga lhagao muchi katu uva ahile, na tahsalam thilu ga kalo dingu chu thil lentah hajaham?

¹²Midanghon nachung uva thuneina chu aneija ahile, keihon kahanei chehjoh lou uham? Hijongle hiche thuneina chu kamang pouve; Christa Kipana Thupha thu kadoudal louna dingun, ijakai abonchan kathoh hamham jovin ahi.

¹³ Thiltheng lhacha-a panghon houin'a thilho chu anehjiuva, chule maichama lhachahon maichama kitoh chan aneijiu khu nahet lou uham?

¹⁴ Chutobangma chu, Kipana Thupha lhangsama panghon, Kipana Thupha-a kona aneh dingu ahi, tia Pakaiyin chonnadan asem ahi.

¹⁵Ahivangin keiman hicheng chu khatcha jong kamangchapoi; chule chutia chu eikibolna dinga hicheng thuhi kahinsut jong ahipoi; kakisonna hi khattouvin ahomkeo asosah sangin, keima thimaleng keima dingin aphajoi.

¹⁶Keiman Kipana Thupha thu kahille vangin kisonna ding ima kaneipoi; bollou theilou kinkhoh kachunga eikisekhum ahijeh-in; Kipana Thupha lhangsamle lou hileng kachung gih ding ahi.

¹⁷Keima lungchama bola kahile tohphat man kasan ding ahi; keima lungchama bola kahilou vangle, Kipana Thupha gouchinga eikipansah hinte.

¹⁸Achutile tohphat man kasan ding chu iham? Kipana Thupha kalhangsap leteng Kipana Thupha-a hi kathuneina kamanchah khel louna dinga, Christa Kipana Thupha man beija kahopjal hi ahi.

¹⁹Keima mi jouse-a kona ongthola kahi vangin, mi tamcheh kalah lut theina dinga, mi jouse soh-a kakisem ahi.

²⁰Chutichun Juda te kalah lut theinan, Juda te henga Juda mi um bangin kaumjin: danthu noijate kaloi lut theinan, danthu noija umte hengah, danthu noija um bangin kaumjin ahi.

²¹Dan neiloute kaloi lut theinan, dan neiloute hengah, dan neilou bangin kaumjin, ahin Pathen dan mang louva um kahipoi, Christa danthu noija um kahi.

²²Ahatmote kaloi lut theina dingin, ahatmote henga ahatmo kahi: itilam hijongle themkhat beh kahuhhing thei teina dinga, mi jouse dinga ijakai kasoji ahi.

²³Kabolchan hi Kipana Thupha khohsah na-a kabol ahin, nangho toh chan kaneikhom theina ding ahi.

²⁴Lhaitet golsehna-a khu mi jouse lhaicheh ji-a ahi, ahivangin khatbouvin hatman asangjin ahi, hichu nanghon nahet lou uham? Nasan theina dingun lhaijun.

²⁵Chule koi hijongle golseh jouving tia guttena chu, ijakaija akitim hatjin ahi. Amaho chun lallukhuh kem mangthei lona-a abolu ahin, eihovang kemmang theilou lallukhuh lo-a ihiuve.

²⁶Hijeh-a chu hitia chu lhaija kahi, abidoi kichen nei louva lhaija kahipoi; hitia chu chuma kahi, onghom lai chuma kahipoi,

²⁷Kati hi kachup kachupjia kathua kanunsah ahi; achuti loule midangho thu kahille nungin, keimatah ijemtin paidoh-in um khange.