Read Thado Chin 2 Corinth 10 Bible Online

2 Corinth 10 - Thado Chin bible

2 Corinth 10

¹Keima, Paul, naum naova lungnem chule naum lounaova nangho lama hakat chun, Christa chonnemna le nunnem na-a keimatah-in katem nahiuve.

²Hijongle keiho hi tahsa lam thua chon ahi tia eingaitoho mi koi koiham chunga, hakat tah-a chon dingdol ahi tia kageltoh chu, kaum tengle hiche hakat chu kamanchah louna dinga, naheng uva katao ahi.

³Ijeh-inem itile keiho tahsa-a chonle kahivangun, tahsa lam thudolin gal kasatpouve;

⁴(Ajeh chu kagalsatnau manchah hi tahsa-a ahipoi, ahivanga, kulpi suhjalna dinga Pathen lama hattah);

⁵Keihon, lungsuhto-a mi nel na, chule Pathen lam hetna douna-a kigel thil sangtah tah kasuh chim jiuva, lungthim ngaito jouse gal hinga kamat jiuva, Christa thua kanunsah jiu ahi.

⁶Chule nangho thua nanun bulhin tengule, thua nunglouho phula dinga jong kigosa jing kahiuve.

⁷Nanghon namaikoh uva um thil chu navet uvam? Koi hile mi khattou ama, Christa-a kahi tia amachang kitahsana aumle, ama chun hiche hi ngaito kit-hen; ama Christa-a ahi bang chun keiho jong kahiuve.

⁸Ajeh chu nangho phet lhahna hilouva sahphatna dingjoh-a Pakaiyin eipeh-u kathuneinao hi hatah-in song jongleng, kajachat lou ding ahi.

⁹Lekhaho-a chun nangho tijatsah tobang hidange.

¹⁰Ajeh chu alekhaho athu agihsan, hat jong ahat ngeije, ahinla amunah atahsa ahatmon, athusei taimo aume, atiuve.

¹¹Chutobang miho chun heuhen, keiho kaum lou tenguva lekha-a thu banga chu, kaumu jongle thilbola chutima chu kahiuve.

¹²Ajeh iham itile amachang kivahchoi mi abang khattouho toh kisimtha dingle kitekah ding kangampouve; amaho vang chu amahole amaho akitekah jiuvin, imacha helou helin aumui.

¹³Keiho vang eikitepeh kalvalun kisong pouvinge, Pathen'in gamkol eitepeh bang bangabou kisong ding kahiuve, gamkol chun nangho jong nahomui.

¹⁴Ajeh chu keiho nangho kom hung lhunglou toh kabah jeng vangun, eikitepeh kalvala kilhonsao kahipouve, ajeh chu Christa Kipana Thupha hille-a, nangho kom geipeh jong kahung lhunu ahi;

¹⁵Eikitepeh kalvaluva midang tohnasa-a kisonga kahipouve; natahsanu akhantoule kavai hom dungjuiju hin nangho vangin hatah-a keh let cheh-in umunge, ti kakineme.

¹⁶Nangho gam kalpeh geija Kipana Thupha hi kaseiphongle theina dinguva, kakhut uva dinga gotsa um thil dola hi mi gamkol sung kason louna dingu, katiu ahi.

¹⁷ Ahin khattou akisonga aumle Pakaiyah kisonghen.

¹⁸Ajeh chu ama kiseipha-a chu hilouvin, Pakai seiphat chubou apha tia kisei ahi.