Read Thado Chin 2 Corinth 11 Bible Online

2 Corinth 11 - Thado Chin bible

2 Corinth 11

¹Kangolna themthema neinangai themleu chun kalung ahi; ahin neinangai themsam naove.

²Pathen tomlah na-a nachung uva katomlah ahi, nungah theng banga Christa khutna kapeh theina dinguva, nangho inneipu khatseh Christa dinga kaholsa nahiuve.

³Ahivangin gul chun alepthol doha-a Evi alheplhah bangchun, Christa lama nalungput dihnauva nalung gelu chu ijemtin suchavai getnun nate ti kakichai.

⁴Ajehchu keihon athu kasei louvu Jesu chom dang khat thu ahung seija auma, ahiloule nachankhah ngai louvu lhagao chomdang changa auma, ahiloule najop khah ngai louvu Kipana Thupha jop auma, ahile ama chu angai themleu chun aphai.

⁵Ijeh-inem itile solchah pipui chung nungho sanga neokhat chajong neojo-a kingaito lou kahi.

⁶Ahinla thuseija kalhahchom vangin hetna lama chun kalhachom poi. Ahin imalam jouse-a nangho henga tahlangin kaumun ahi.

⁷Ole, nangho choisanga naumna dinguva, keima kaki suhnema, lo beija nangho Pathen Thupha kahilu hi achonsea kahim?

⁸Nangho kinbolna dinga, houbung dangdang kachoma, amaho-a kona lo kasan ahi;

⁹Chule nangho koma kaum laisen kalhahsamna aum jongle, koima dinga gihsatna hilouhel kahi; ajeh chu Macedonia konin sopiho ahungun, kangaichat chengse ahung subulhittaove; chule imalam jouse-a nangho gihsatsah louna dinga kihongdoh jing kahin, kihongdoh jing ding kahi.

¹⁰Christa thutah jouse keima-a aum jehchun, Achaia gamkol sunga kakisonna chu koiman eikhahtan thei ponte.

¹¹Ipi jehham? nangho kangailut lou jehham? Pathen'in ahenai.

¹²Ahinla agomkom holteho chu, akisonao chu keiho tobangbang ahung hi theina dinguva, agomkom atokhah dingu chu kasuhhai theina dinga, kabol hi kaboljom jing ding ahi.

¹³Ijeh-inem itile chutobang miho chu solchah lhem ahiuve; doha bola milhemlha natong ahiuve; amaho Christa solchah ho lima kisema ahiuve.

¹⁴Hichu thu kidang ahipoi, ajeh chu Satan'in amatah jengin jong avah-a vah vantil mel aputji ahi.

¹⁵Chuti chu ahin, alhachahon chonphat lhachaho mel aput chu thupi ahipoi; ahivanga akichainiu chu athilbol dungjui cheh-u hiding ahi.

¹⁶Keiman kasei kit ahi, koiman angolin eingaito hihhen; ahin neingaito ujongleh, themkhat beh kakison theina dingin mingol bangin neisangun.

¹⁷Hicheng kasei hi Pakai thuseija kasei hilouva, hiche kisonna-a hi kisonga, mingol thusei banga kasei ahibouve.

¹⁸Mi tamtah tahsaphe lama akison jeh-a, kei jong kakison ding ahi.

¹⁹Nangho achinga nahi jeh uva, mingol ho chu kipahtah-a nangaithem-u ahi.

²⁰Nasohchan sah uva jong, nabah gamuva jong, gal hinga naman uva jong, ama le ama kichoisanga jong, chule nangeipheu benga jong, nangai themu ahi.

²¹Keiho hichea ding chun kalhasamui tia jahcha puma kasei ahi! Ahivangin ilam ilam thua hile, midang ngamna-a chun (Mingol thuseija kasei ahi)kei jong kangame.

²²Amaho Hebrew mi hiuvam? kei jong kahi. Amaho Israel mite hiuvam? kei jong kahi. Amaho Abraham chilhah hiuvam? kei jong kahi.

²³Amaho Christa lhacha hiuvam? (Mingol thuseija kasei ahi) keima kaha hidehjoi, na hatohgimin, songkul lut tamin, teptena kalvala kivoh tamin, thina thei setto tamin;

²⁴Ngavei Judah ho-a konin somli-a khat lhan eiki jepmin;

²⁵Thumveina molin eikivon; khatvei songin eikisepmin, thumveina kongke kathoh, jan khatle sunkhat twi thuh laija kaumin;

²⁶Kakholjin lena-a, tamtahvei luipi-a setto, gucha michoma setto, kanam chanpite-a kona setto, chidang namdang ho-a kona setto, khopi sunga setto, gamthip dunga setto, twikhanglen'a setto, sopi lhemho lah-a setto;

²⁷Tohgimle hesoh gentheijin, hah jinga imu louva umin, gilkel dangchah thoh-in, an ngola umin, khosih thoh-a pon sillouva umin, hicheng chu kaha hidehna ahi.

²⁸Hicheng vang chu chutitante, ahivangin apipenin houbung chengse kakhohsah hi niseh-a eidelpha-a ahi.

²⁹Koi hatmona kahatmopi lou umam? koi kiselhuh na-a katompi lou umam?

³⁰Kithang-at go-a hileng, kahatmona tamtah-a hi kakithang-at ding ahi.

³¹Jou sei lou kahi, I-Pakaiyu Jesu Christa Pa-le Pathen tonsot nunnoma chun ahenai.

³²Damascus-a Aretas lengpa noija gamvaipopan, keima man dingin Damascus miho khopi chu angasah jeng ahi;

³³Ahivangin bangkot homa bomin kulpanga eikhai lha uvin, akhutna konin kasohchatan ahi.