Read Thado Chin 2 Corinth 13 Bible Online

2 Corinth 13 - Thado Chin bible

2 Corinth 13

¹ Nangho henga kahung tu chunga hi athum veina ahi. Ahetoh ni ahim, thum ahim, kama thu ijakai tun dinga umding ahi.

²Amasanga kanaseisa ahi, chule aniveina-a kaum petna kanaseisa banga chu, tu-a kaum louva jong, tu masanga chonse hole adang dangho jouse henga kasut ahi, kahung kit tengle, khen nei lou ding kahi;

³Nanghon Christan keima-a thu asei photchena nahol jeh-u chun; ama chu nangho lama hatmoa ahipoi, nangho-a hattah ahi.

⁴Ijeh-inem itile hatmona jeh-a thingpel'a akikhetbeh jeng vangin, Pathen thahat vangin ahing jinge. Ajeh chu keiho jong ama-a hatmoa kahiuve; ahinla Pathen thahat vanga nangho lama amatoh hingkhom ding kahiuve.

⁵Tahsana um nahiu nahi louvu nangho kikholun; photchena dingin nangho kikholun. Ahiloule Jesu Christa nangho-a aum chu nangho tah-in helou nahiuvem? aphai tia lah hilou nahilou ngaluleh.

⁶Ahinla keiho hi aphai tia lah hilou kahilou hi nanghon nahet dingu kakineme.

⁷Ahivangin nangho thilphalou nabol louna dingun Pathen henga kataojiuve; hiche aphai tia lah kahiu chu kilahdohna ding hilouva, keiho aphai tia lah hiloutoh kabah jeng vangun, nanghon thil ja um chu nabolna dingu ahijoi.

⁸Ajeh chu keiho thutah-a ding tilou, thutah dounan ima kabol thei pouve.

⁹Ijeh-inem itile keiho kahatmo uva nangho nahat tengule kathanom jiuve, chule nachamkim na dingun jong, kataojiuve.

¹⁰Hiche jeh chun asuse ding hilouvin, houthu lama khantou sahna dinga Pakaiyin thuneina eipeh hi, kathunei bangtah-a kahung tengle, kabol khoh louna ding lungthima kahung masanga hicheng hi kahinsut ahi.

¹¹Achaina keijin, sopite, nangho kipah thanomun, chamkim keijun, lungmongun, lungkhat hiuvin, kitohdelin umun; chutile ngailutle lungmon kona Pathen'in naumpi dingu ahi.

¹²Thengtah-a kibeng chop cheh-in khatle khat kisalam un.

¹³Mitheng jousen nasalamui.

¹⁴Pakai Jesu Christa lungsetnale, Pathen ngailutna, chule Lhagao Theng kithopina chun nabonchaovin umpiuvin. Amen.