Read Thado Chin 2 Corinth 2 Bible Online

2 Corinth 2 - Thado Chin bible

2 Corinth 2

¹Ahin keima changtumin hiti hin kangaitoi, tukallin lungphamon naheng uva hungtaponge.

²Ajeh chu keiman nangho lung phatmo sahleng, kalung phatmo sahte tailou chu keima eikipasah dinga koiham?

³Keima kipana-a nangho kipah uvin nate ti kagingchan, eikipasah dingho chengse chun kahungteng eilung phatmosah khante tia, hiche thu chu kahinsut ahitai.

⁴Chule nalung phatmona dinguva hilouvin, keiman nangho kangailut jeu hi nahetdohna dinguva, lunghesoh, lungkham chule mitlhi tamtah puma hiche thu chu kahinsut ahi.

⁵Ahinla, lung phatmo sah-a mi khattou auma ahile, keima eilung phatmosah ahipoi, kahabol khoh behseh louna dinguva, ichanham khatna nabon uva nalung phatmo sah-u ahi.

⁶Mi atamjoa kona chutobang mihemin talent amuchu, ama dinga phaset ahi.

⁷Chuti ahi jeh chun nanghon nangaidam uva, nalungmonsah joh uva pha ahi; ajole chutobang mi chu lungphatmo behseh-in val lhum getninte.

⁸Hijeh-a chu naheng uva katao ahi, nanghon ama nangailut nao chu sudetnun.

⁹Nangho imalam jouse-a thungai nahiule, nahilouvu photchetna dinga jong kahinsut ahi.

¹⁰Nanghon nangaidamu chu keiman jong kangaidam ahi. Keiman kangaidam-a ahile, Christa maikoh-a nangho jala kangaidam ahi;

¹¹Hichu Satan'in ichunguva machalna thei agomkom atokhah louna ding ahi; ajeh chu eihon ama doha lungthim ihaiju ahipoi.

¹² Christa Kipana Thupha hila Troas'a kahunga, chule Pakaiyin keima dinga kot khat ahon chun,

¹³Kasopi Titus chu kamudoh lou jeh-in, lung olna kaneipon ahi; ahin amaho-a konin kakilha doh-in, Macedonia gam lama kachetan ahi.

¹⁴Ahin a-imatih chana keiho Christa-a galjona-a eipuile jinguva, Pathen chu thangvah-in umjing hen; aman keiho eimangun ama hetna gimnam chu muntin-ah aphong jallen ahi.

¹⁵Huhhing-a umhole amangthahho dingin, Pathen lama Christa gimnamtui kahiuve;

¹⁶Loi khat dinga thina-a kona thina gimnam kahiuvin, loi khatte dingin hinna-a kona hinna gimnam kahiuve. Chule hicheng dinga lhinga koiham?

¹⁷Mi tamtah-in Pathen thuhi miho doha bola sumkolveinan amang chaovin, keiho vang chutobang kahi pouve; kitahtah-a Pathen thupeh bangbanga, Christa-a Pathen mitmu-a thu kaseiju ahi.