Read Thado Chin 2 Corinth 4 Bible Online

2 Corinth 4 - Thado Chin bible

2 Corinth 4

¹Hiche jeh-a chu keiho hepina kachan uva, hiche lhacha-a panna kaneiju hi, keiho kalhadah hihhelui;

²Ahin jachatna thil kisel chengse kapai lhaovin, doha lungthimin kachonpouvin, chule Pathen thu chu mi lhep lhahnan kamangpouve; ahin thutah chu kaphongjalun, Pathen mitmu-a amitakip sele pha hetna henga kaum chanu photchena musah kahiuve.

³Chule kakipana Thupha jong hi maikhu kikhua ahile, amangthahho dinga maikhu kikhua ahin;

⁴Pathen lima um Christa Kipana Thupha loupitah chun amaho chu asalvah louna dinga, amaho sunga chu hiche vannoi pathen'in atahsan louho lungmit asuhchot ahi.

⁵Ajeh chu keihon keiho hilouva, Christa Jesu chu Pakai ahi tia, chule keiho Jesu jala nangho soh kahiu chu kalhang sapleu ahibouve.

⁶ Ajehchu, Muthim lah-a kona vah hung vahdoh dinga thupeh neijachu Pathen ahin, Jesu Christa maija Pathen loupi hetna chu avahdohna dinga, ama chun kalungu asalvah ahi.

⁷Ahivangin thilboltheina chungnung tah chu keiho-a kon hilouva, Pathen'a konjoh ahina dinga, hiche gou chu keihon leibela kachinu ahi.

⁸Hoima lam jouse-a nehchinton kaum un, ahinla kisudongin kaumpouve; lungdongin kaumuvin, ahinla kalunglha pouve;

⁹Suh gentheijin kaumun, ahivangin dalhah-in kaumpouve; eikivolhu vin, ahivangin suhset helin kaumpouve.

¹⁰Kavalena chanuva katichung uva Jesu hinna chu akiphon theinan, katichungu vah Pakai Jesu thina chu kapole jingui.

¹¹Ijeh-inem itile keiho ahing chengse hi katahsao thi theija hi Jesu hinna akiphondoh theina dinga, Jesu jala athi dinga pehdoh jinga um kahiuve.

¹²Chutia chu keiho-a hi thinan na atoh ahin, nangho-a hinnan atoh ahi.

¹³ Katahsan jeh-a thu kasei ahi, tia kisun banga chu, hiche tahsanna lhagao mama chu kaneijuva, keihon jong katahsan jeh uva thu kaseiju ahi.

¹⁴Pakai Jesu kaithouva chun, keiho jong Jesu toh thakhatna eikaithou dingu, chule nang hotoh a-anga eidinsah dingu ahi chu kaheuve.

¹⁵Ajehchu mi tamtah thangvahna jala Lungsetna ahapuna, Pathen choi-atna-a aumna dinga, imajouse nangho jala kibol ahi.

¹⁶Hijeh chun kalhadah hihhelui; kami ponungu akem jing jeng vangin, kami sungnungu aniseh-in athah cheh athah cheh jon ahi.

¹⁷Ijeh-inem itile chomkhat jengcha dinga kathohjiu hesoh gentheina jangkhai hin, tonsot kemlou loupina chu hasema eisempehbe jing jengu ahi;

¹⁸Muthei thilho ve louvin, mulou thilho chu kave jouve; muthei thil chu chomcha khat dinga ahin, mulou thil vang chu tonsotna dinga ahi.