Read Thado Chin 2 Corinth 5 Bible Online

2 Corinth 5 - Thado Chin bible

2 Corinth 5

¹Hiche pon in tobang kaleiset inu hi kiphelha jongle, khutna kisa hilou tonsot in, Pathen'a kona kisa indet chu van'ah kaneijuve, ti kaheuve.

²Keihon van'a kachenna dingu in chu kivon ding ngai tun tuna, hiche sunga hi peng penga um kahiuve.

³Chuche-a kakivon tengule, sagoh keova kaum lou dingu ahi.

⁴Ajehchu pon in'a kachen uva pohgih kapoh jeh uva peng penga kahiuve; hichu pon beija kaum nom jeh-u hilouva, athoa kakisil uva, thi theina hi hinna chun aval lhumna dinga peng penga joh kahiuve.

⁵Chule hiche dinga eigo uva chu Pathen ahin; khamgah na-a Lhagao eipeuva jong ahi.

⁶Hijeh-a chu lungngama kaum jingu ahi, chule hiche tahsa ina kachen laiseuva hi Pakaiya kona gamla kahiuve, ti kaheuve.

⁷(Ajeh chu keiho polam mu theija chon hilouva, tahsan vanga chona joh kahiuve);

⁸Lungngama kaumu ahi, tahsa-a um louva Pakai koma um kanomjouve.

⁹Hijeh-a chu umu jongleng, umhih jongu leng, kadoiju chu ama lunglhai na-a um kahatup tenu ahi.

¹⁰ Mitinin tahsa-a athilbol apha hile, ase hile, athilbol dungjui cheh-a atohman asan cheh theina dinga, eiho ibon chaova Christa thupi tanna anga chu ikilah cheh dingu ahi.

¹¹Hijeh-a chu Pakai kichat umje kahet jeh uva miho kajolleu ahi; ahivangin Pathen anga kilang jingin kaum naove; chule nangho sele pha hetna-a jong kakilang jingui, tin kakinemui.

¹²Ajehchu nangho henga keiho kichang vahchoi kit kahipouve; lungthim thua hilouva kamsung lama kisongte chu nadonbut theina dinguva, keiho lama kisonna naneina dingu phat kapehjoh nahiuve.

¹³Ajehchu kangol-ule Pathen'a ding ahin, kachih-ule nangho-a ding ahi.

¹⁴Christa ngailutna chun kachamlou uva eisolu ahi, hiti hin kagelui: mi jouse thi khela khat athia ahile, mi jouse chu athia ahitai;

¹⁵Chule ahingho chu amaho dinga hing hitalouva, athi kheluva thia thoukitpa ding joh-a hing ahi theina dinguva, mi jouse thi khela thia ahi.

¹⁶Chuti ahi jeh chun tukala lhah-in, tahsa lam dola koima kahetapouve; chuti chu ahin masangin Christa chu tahsa lam dolin he jonguleng, tunvang hitobang chun kahetapouve.

¹⁷Hijeh chun koi hile Christa-a um chu akisemthah ahi; alui chengse chu amang gama ahitai; veuvin, athah ahitai.

¹⁸Chule thil jouse hi Pathen'a kon ahin, Aman Jesu Christa jala eikicham piuva, chule kichamna thu lhachale-a chu eipansah-u ahi.

¹⁹Hitia chu Pathen chu Christa-a uma, vannoi leiset mite themona-a sun louva, amatoh kichamna aboljoh ahi; chule chuche kichamna thu chu keiho eipehdoh-u ahi.

²⁰Hiche jeh-a chu Keiho Christa palai kahiu ahin, Pathen'in keiho-a kona naheng uva angeh banga, Pathen toh kichamun tia, Christa thalhenga naheng uva kangeh-u ahi.

²¹Ama-a chu Pathen chonphatna ichan theina dinguva, chonset helouhelpa chu eiho khela chonsea asem ahitai.