Read Thado Chin 2 Corinth 7 Bible Online

2 Corinth 7 - Thado Chin bible

2 Corinth 7

¹Hijeh chun, sopi ngaite, thutep hicheng chu ineiju ahi jeh chun, lhagao le tahsa kisuh bohna jouse-a konin kisuthengu hitin, Pathen gingin thenna-a chamkimin umu hite.

²Keiho-a dingin nalungthimu hongun; keihon koimacha alam louvin kabolpouve, koima kasuse pouve, koima dohan kalhemlha pouve.

³Nangho themmo sahna dinga hiche hi kasei ahipoi; ithile thikhomsap, ihinle hingkhom dingin kalungsung uva nacheng uve tia, masanga kaseisa ahitai.

⁴Nangho lama kahakat lheh jenge, chule nangho lama kakisonna jong anasai; chuti chun kahesohna jouseuva lungmonna kadimsetnin, chule kipana-in kaletset jingin ahi.

⁵ Ijeh-inem itile Macedonia gama kahungu jong chun, tahsa-a choldona neilou kahiuve; hoima lam jouse-a hesoh genthei toh jinga umjing jeng kahiu ahi; polama eidouva, lung sunga kichat kanei jing jengjiu ahi.

⁶Ahinla mi kisunemte lungmonsah Pathen'in, Tita hung lhun vang chun eilung monsah taove;

⁷Chule ama hung vang jenggoh jong hilouvin, aman nangho-a lungmonna anei, hiche lungmonna chun eilung monsah taovin ahi; nanghon neingaichat jeu, neilhaset piu, kei dinga nagunchujeu, thu ahung seijin ahile, hichea chun hatah-in kakipah kathanom lheh jengtan ahi.

⁸Ajeh chu keiman kahin lekhathotna chu nangho kasuh lunghem jeng vangun kakisihpoi; kana kisih jeng vangin; ajehchu kalekhathot chun nangho chomkhat kahsung hijongle, nalunghemsah lheh jengun ahi;

⁹Keima tun kakipah kathanome, nangho suhlunghema naum jeh-u chu hilouvin, nalunghem nao chun lungheina aso jeh chu ahi. Ijeh inem itile nanghon keiho-a hakamna imacha nanei louhelna dinguva, Pathen lam dola kisu lunghema nahiu ahi.

¹⁰Ajeh chu Pathen lam dola lunghem chun huhhing-a umna dinga lungheina asoji ahi; hichun kisihna asojipoi; vannoi leiset lam dola lunghem chun thina asojin ahi.

¹¹Ajeh chu, veuvin, Nalunghem nao chu Pathen lunglam dol ahi; nangho-a itobanga kihatup chehna asodoh hitam! nangho dingin: nakisuh thengnao, lungsouna, kichatna, ngaichatna, gunchuna, chule phulahna, asodoh-in; hiche thiljouse-a hi nangho thengsoh nahiu chu naphot chetnu ahitai.

¹²Hiche naheng uva kahinsut jeng vang chun, alam louva bolpa jeh-a kahinsut ahipon, alam louva kibolpa jeh-a jong kahinsut ahidehpoi; Pathen mitmu-a nachunga kagun chujeu chu naheng uva akiphon dohna dinga, kahinsut joh ahibouve.

¹³Hijeh chun nalungmon naova lung mongin kaum taove. Chule Titus kipana-a kaha kipa cheh-un ahi; nanghon nabon chaova alung nakidosah jeh-u chun.

¹⁴Ajeh chu ama komah nangho-a kakisonna ima a-umtah jeng jongle, jachatnan kaneitapoi; ahin nangho henga kathu sei jouseu thutah ahi banga chu, Titus anga kakisonao jong chu thutah mong ahi.

¹⁵Chule nangho nathu nunnao, itobanga kichatah le kithing thinga nanalem jengu hitam, ti ageldohjile nangho nakhoto nao anasacheh cheh jengin ahi.

¹⁶Hijeh chun thiljouse-a nangho chunga tahsana kanei hi kakipah thanomin ahi.