Read Thado Chin 2 Corinth 8 Bible Online

2 Corinth 8 - Thado Chin bible

2 Corinth 8

¹ Sopiteho, Macedonia houbung ho kipe-a Pathen lungsetna chu nangho kahetsah nahiuve.

²Ajeh chu hesoh gentheija kipatepna nasatah lah jenga jong akipanao adimin, avaichat thuhlheh jeng vangun, athilphal uva kon aletset jengtaovin ahi.

³Keiman kahet tohsah-a kasei ahi, amahon athao toh kithuh-in, athaovin ajokalvalin jong, amaho lungcham tah-in apeuvin;

⁴Athilto-u chu kasan nadingu leh, mithengte lhachakin bolna-a akithokhom theina dingun eino gangun ahi

⁵Chule hichu kakinepna bangu hilouvin, Pathen lunglamin amaho-a Pakaiyah akipe masaovin, chuin keiho henga akipeuvin ahi.

⁶Chutichun Titus'in masanga abol pat banga chu, tu-a jong chuche lungsetna chu nangho lah-a abulhit sohna dingin katiltil jiuvin ahi.

⁷Amavang, tahsanna, seidohna, hetna, gunchuna jouse le keiho ngailutna nanei letset banguva chu, hiche lungsetna jong hi nanei letsetna dingu gelun.

⁸Hiche hi thupeh bangtah-a kasei hilouvin, midangho kihabolna-a kona, nanghon ngailutna tahbeh naneiju chu patepna-a kasei ahibouve.

⁹Ajeh chu ama vaichat vanga nangho nahaodoh theina dinguva, ahaonasa nangho jala vaicha jenga, hiche Pakai Jesu Christa lungset chu nanghon naheuve.

¹⁰Hiche thudola hi lungthim kapehbou nahiuve; achuti chu nangho dinga apha ahi; kum khat masanga bol pan masa nangho nahiuve, nabol pat jenggoh-u hilouva bol jong nabolphat nomu ahi.

¹¹Ahin bol ding nalung got bangu chun, than ajochanin bulhit sohkeija aum theinan, tun jong bol bulhingun.

¹²Ajeh chu lung got masah auma ahile, aneija chu anei dungjuija, chule aneilou chu aneilou dungjuija kilajia ahi.

¹³Mi dang noma aumuva nangho hesoh-a naum dingu katina ahipoi;

¹⁴Chamgola umna ding ahi, amaho nei letset chu nangho lhahsam bulhitna-a ahung hi theina dinga; tu-a nangho neiletset hi amaho lhahsam bulhitna-a chamgola umna dinga kitoh ahibouve;

¹⁵ Hitia chu, atam lokhoma chu aval aum chomdehpon, chule alhom lokhoma jong chu alhasampoi, tia kisun bang chu ahi.

¹⁶Ahin Tius lungsunga chutobanga gunchu tah-a nangho khotona neisah Pathen chu thangvah-in umhen.

¹⁷Ajeh chu keiho tilkhouna jop chu ahinan, ahinla amatah mong lunggut tena ama lung chama nangho henga hunga ahi.

¹⁸Chule Kipana Thupha lama houbung ho jouse lah-a akipachatna kithangsoh chu, amatoh lhon dingin kahinsol thaove.

¹⁹Chuti jenggoh chu hilouvin; Pakai loupina dingle, kalunggot tenjiu hi vetsahna-a alhachalea kapanu, hiche lungsetna thu lamdola hi kalhonpile dinguva, houbung in agotsa mongu jong ahi.

²⁰Alhachalea kapanu hiche thilpeh letset thudola hi koiman eidem louna dinguva, chingtheitah-a chona kahiuve;

²¹ Pakai mitmu jenga hilouva mihem mitmu-a jong thil ja umdol chu kangaitou ahi.

²²Chule keihon tamtah vei thil tamtah-a agunchuje kaphottohsao isopipao chu, amaho toh kahinsol thaovin ahi, ahin tun nangho-a tahsan dettah anei jeh-in ahagunchu cheh jengtan ahi.

²³Titus thudol hi kiseile, ama hi nangho chungchanga kakivopi le katoh khompi ahi; chule sopi niteni vanghi, houbung ho solchah chule Christa loupina ahi lhone.

²⁴Chuti ahi jeh chun nangailut nao le nangho jeh-a kisonna kaneiju photchetna chu, amaho kom le houbung ho angsunga amaho chu kivetsah-un.