Read Thado Chin 2 Corinth 9 Bible Online

2 Corinth 9 - Thado Chin bible

2 Corinth 9

¹Mithengte kinbol thudol vang naheng uva kahinsutlo angaipoi;

²Ijeh-inem itile nalunggot danu chu kahenai, hiche dol chu, Achaia kigosa aumna kumkhat ahitai, tia Macedonia mite anga nangho kapaopi ahi; chule hiche nagunchu nau chun mi tamtah achoh thouvin, agunchu sahtan ahi.

³Hitilam thudola nangho kakisonpinao chu ahomkeo ahi louna dinga, kasei banga chu kigosa dema naumna dingun, tia sopiho phabep khat kahinsolu ahitai.

⁴Achuti loule ajole Macedonia mi khattou kei lhonpi dingin hunghen, kigo louva na-umu hungtoh tale, keiho chang jenggoh hilouva, kinep pitah nangho dinga jong jachat umding ahi.

⁵Hijeh-a chu masanga pat nakitep nasao thilpeh kitoh chu cham louva lah hilouva, hongphal tah-a peh ahia, gotsadema nakoina dinguva; aphat masanga naheng uva hung dinga sopiho chu tilkhou angaije tia kageltoh ahi.

⁶Ahivangin hiche thudola hin alhom tu-a chun alhom at ding, chule atam tu-a chun atam at ding ahi.

⁷Lung phatmo pumpumle peh louva, phamo tia pe louvin, nalung got bangtah cheh-in peuvin; ijeh-inem itile lunglhai sela pe-a chu Pathen'in angailui.

⁸Chule imalam jouse-a imatih chana ijakaija bulhingsoh nahiuva, natohpha tintang natoh theina dinguva, Pathen'in lungsetna letset nangho napeh theiju ahi.

⁹ Hiche thudol chu hitihin akisune, Aman athejalin, mivaichate atoi; Achonphatna chu a-imatih chana umjing ahi.

¹⁰ Chule muchi tu-a chu muchi pe-a chule anneh dinga changlhah pepa chun, nangho muchi napeuvintin apunsah ding, chule nachon phatnao ga chu akhantou sah ding ahi.

¹¹Thil phal dinga imalam jouse-a haodoh-a nahitaovin, alhacha-a keiho vangin Pathen vahchoijin aume;

¹²Ajeh chu hiche phatna dingbol lhachale-a panna vanga hi, mithengte lhahsamna bulhinsah jenggoh hilouva, thangvahna tamtah-a kona, Pathen lama jong letset jenga ahitai.

¹³Hiche lhacha kin kibola kon, nangho Christa Kipana Thupha phondohna dinga nathu man-ule, amahole adangho jouse tona-a nathilpeh-u jehchun amahon Pathen avahchoijui.

¹⁴Amahotah jong nangho dingin Pathen henga atao ataovun, nachung uva Pathen lungset lentah chuh jeh chun nangai lheh jengui.

¹⁵Athilpeh sei theilou jeh hin Pathen thangvah-in umhen.