Read Thado Chin Galatia 1 Bible Online

Galatia 1 - Thado Chin bible

Galatia 1

¹Mihem'a kon hilou, mihem vanga jong hilou, Jesu Christa le athi lah-a kona kaithouva Pa Pathen pansah solchah keima Paul,

²Chule kaumpi sopite chengsen Galatia'a um houbung ho hengah.

³Pa Pathen le I-Pakaiyu Jesu Christa-a konin lungset le lungmon nachung uva umhen;

⁴Ama chu i-Pathen'u le i-Pau lunggot bangtah-in, tulai vannoi phat louva kona hi eiho eihuh dohna dingun, eiho chonset manin ama akipetan ahi;

⁵Loupina chu a-imatih chanin ama-a hijinghen. Amen.

⁶Tule tu kahseh-a Christa milungsetna-a nakou paova kona thupha chombeh lama nakai jengu chu kidang kasa lheh jenge.

⁷Hichu thupha chomdang jong ahisampoi; ahinla mi phabep khat aumun, amaho chun nangho nasuh boijuva chule Christa Thupha hi akaleh-a hei ding agotnu ahi.

⁸Ahin keihon nangho henga kahung seiju Kipana Thupha hilou, akalvala thupha chomdang hung seija aumle, keiho hiuving, van'a hungkon vantil khattou hijeng jongle, ama chu sapset chang hen.

⁹Masanga kasei banguva kasei kit ahi, nanghon najopsao kipana Thupha chu hilouva, thupha chomdang naheng uva hung seija aumle, ama chu sapset changhen.

¹⁰Keima tu-a hi mihem jola kahim, Pathen jola kahim? Ole mihem lunglhaisah ding go-a kihabol kahim? Mihem lunglhaina ding holnalai kahile, Christa soh hilou kahi ding ahi.

¹¹Chuti chu ahin, sopite, keiman kahil Thupha thudol hi kahetsah nahiuve, hiche hi mihem lam dol thu ahipoi.

¹²Mihem'a kona kamu jong ahipoi, min eihil jong ahipoi, Jesu Christan aphondoh-a kona kamu ahibouve.

¹³ Malaija Juda mite houdan-a kachon laija kanunchan kakhanchan thu chu najakhataove, Pathen houbung chu teptena kalvala bolsea sumang dinga bola kahi;

¹⁴ Chule kapu kapate hou lama katompan behseh jeh-a, Juda te hou danthu lama kanam sunga kakhang golpi tamtah kakho khel ahi.

¹⁵ Ahivangin kanu oisunga kaum laija pat eisepkhena leh amilungsetna-a eikou Pathen'in,

¹⁶Kipana Thupha chidang namdangho lah-a kaphon jal ding adeija, achapa keija phondoh ding agotchun, keiman tahsaphe le thisan kadongpai jengpon,

¹⁷Jerusalem'a keima sanga solchah himasaho henga jong kachepoi; ahin Arabia gama kachen, chuin Damascus'a kahung kile kittan ahi.

¹⁸ Chujou kum thum nungin Jerusalem'a Peter toh kimuto dingin kagache touvin, chule nisom le ninga akomah kaga ume.

¹⁹Ahivangin solchah ho lah-a khatcha kamupoi, Pakai naopa Jacob bou kamui.

²⁰Thu hicheng naheng uva kahinsut hi, veuvin, Pathen maikoh-a kasei ahi, jou seija kahipoi.

²¹Chuche jou chun keima Syria le Cilicia gamkol sunga kachetan ahi.

²²Chule hiche geija chu Juda gama Christa-a um houbung ho mel het louva umnalai kahi;

²³Masanga eiho eibol sepao chun, tun khatvei suhmang dinga anagotsa tahsan thu chu alhang samlei, tibou chu ajah-u ahi;

²⁴Chule keima jeh-a Pathen achoi-atnu ahi.