Read Thado Chin Galatia 3 Bible Online

Galatia 3 - Thado Chin bible

Galatia 3

¹Vo lungthimbei Galatia miho, namitmu tah uva Jesu Christa thingpel'a akikhetbeh chu kichentah-a nalah uva kiphongdoh ahitai; thutah-a nunlou nadia koiham najol lha uva?

²Keiman nangho-a konin hiche thu maicha hi kahet nome, Lhagao nachanu chu danthua chona konham, tahsan thu najah uva konham?

³Nangho chutobang loma chu lungthimbeija nahiuvem? Lhagaova kipanna tahsa phe-a kichaija nahiu hitam?

⁴Nanghon mohjen seh-a hesoh genthei nathoh-u hitam? hitichu ahile, moh jenseh tahbeh ahi.

⁵Lhagao napeuva chule nalah uva thilbol kidang boljia chun, danthua nachon jeh uva abol jiha, tahsan thujah jeh-a abolji ham?

⁶ Chutia chu, Abraham'in Pathen atahsana ahile, hichu ama dinga chonphat tia kisuna ahitai.

⁷ Hiche jeh chun atahsanho chengse chu Abraham chate ahiuve, ti heuvin.

⁸ Pathen'in chidang namdangho chu tahsan vanga them achansah ding ahi ti chu ahemasan, Pathen lekhabun, Nangma-a kona chitinle namtin phattheina chang ding ahi, tia masang peh-a hiche thupha hi Abraham ana hetsahsa ahitai.

⁹Chuti ahi jeh chun tahsana kon chengse chu mi tahsan umtah Abraham chutoh phattheina chang khoma ahitaove.

¹⁰ Ajeh chu danthua chon chengse chu sapset changa ahiuve; ajeh chu hitin akisune, Koi hile danthubua kisun chengse nitjom jinglou chu sapset chang ding ahi.

¹¹ Ahivangin danthua chonin Pathen anga koima them achangpoi, ti akichene; ajeh chu, Michonpha chu atahsan vanga hing ding ahi, kitia ahi;

¹² Chule danthu chu tahsana kon ahipoi; ahinla danthu-a chona chu hichea chu hing ding ahi.

¹³ Christa chun danthu sapset chana-a kona eiho eihung lhatdoh-u ahitai, ajeh chu ama eiho khela sapset hung changa ahi; ijeh-inem itile, Thinga kikhai sang tapou chu sapset chang ahi, tin akisune;

¹⁴Hichu Abraham phatthei chu Christa Jesu'a chidang namdangho heng alhuna, eihon tahsan vanga Lhagao chu ichan theina dinguva ahi.

¹⁵Sopite, keiman mihem thu seija kasei ahi; mihem kitepna mai mai ahivangin, min aphudet nungle koiman moh ahisah jipoi, chule koiman jong abelap jipoi.

¹⁶ Chuti ahi, thutep ho chu Abraham le achilhah kipe-a ahi. Aman tamtah seina bangin, Chule nachilhah ho, atipoi; khatseh seina bangin, chule nachilhah, atibouve; hichu Christa ahi.

¹⁷ Tun hiche hi kasei ahi, Pathen'in amasanga kitepna khat Christa-a aphudetsa ahin, hichu kum jali le kum somthum nunga umdoh danthu chun kitepna chu moh ahi louna dingin, ason mangpon ahi.

¹⁸ Goulo ding chu danthu vanga ahile, thutep vanga hilouhela hi ding ahi; ahinla Pathen'in thutep vangin Abraham apetan ahi.

¹⁹Chuti ahile danthu hi ipi phatchomna ham? Thutepna chilhah chu ahung kahse-a dinga, suhkhel jeh-a hichu kibelap ahi; hichu vantil teho kimanga palai khat khutna kitungdoh ahitai.

²⁰Palai chu khat changa dinga palai ahipoi, Pathen vang khatsehbou ahi.

²¹Chuti ahile, danthu hi Pathen thutep douvaham? Chuti ahipoi. Hinna pethei danthu kipe-a hile, dih tah-a chonphatna chu danthua kon hitei ding ahi.

²²Ahin Jesu Christa tahsan vanga thutep chu atahsanho akipeh theina dinga, Pathen lekhabu thu chun ijakai chonset noija akhachah ahitai.

²³Tahsan thu hung lhun masanga chu danthu noija eina kikoijuve, ahung kilang dinga um tahsan chu ngana-a kikha khuma inahiu ahi.

²⁴Hitia chu tahsan vanga chonphat ichan theina dinguva, Christa henga eipui dinguva, danthu chu eikaihoi juva anapanga ahibouve.

²⁵Tahsan thu hunglhun kal vang hin, chuche eikaihoi juva noija chu ihi tapouve.

²⁶Christa Jesu'a natahsan uva kona chu nangho nabon chaova Pathen chate nahiu ahi.

²⁷Nangho Christa-a baptize chang chengse chun nabon chaova Christa chu nakivonu ahitai.

²⁸Hichea chun Juda mi Greek mi aumtapoi, soh leh sohlou aumtapoi, chule numei le pasal jong aumtapoi; Christa Jesu'a chun nabon chaovin pumkhat nahitaove.

²⁹ Chule nangho Christa-a nahiule Abraham son nahiuve, thutep bangtah-a chu gou lo ding nahiuve.