Read Thado Chin Galatia 4 Bible Online

Galatia 4 - Thado Chin bible

Galatia 4

¹Ahin keiman kasei chu, goulo ding chu chapang ahi laisen, imajouse pakai ahi jeng vangin, ama chu sohtoh imachom ahipoi;

²Ahin apan athutep alhin phat kahsen, akaihoile a-inngahho thu noija aumjin ahi.

³Eiho jong chutobanga chu ichapan laijuva, vannoi leiset lekhajem bul noija sohchanga ina-umu ahi;

⁴Ahivangin phat ahung lhintah-in, Pathen'in achapa chu numei sunga soh, danthu noija peng dingin ahin soltan;

⁵ Chapate hina ichan theina dinguva, danthu noija umho lhatdoh dingin.

⁶Chule nangho chate nahi jeh uva chu, Abba, Hepa, tia kouji Achapa Lhagao chu Pathen'in nalung sunguva ahinsol ahi.

⁷Hiche jeh-a chu nangma soh hita louva, chapa nahi ahitai; chule chapa nahile, Christa vanga Pathen goulo ding jong nahi.

⁸Ahi jeng vangin Pathen nahet lou laijuva chu, apen umchana pathen hilouho soh nanahiu ahi.

⁹Ahin tun Pathen nahet nunguva, ahiloule Pathen hetjong nahi nunguva, i-atileh lekhajem bul hatmotah soh-a lutkit dinga nakihei kit jenguham?

¹⁰Nanghon ni, lha, kum kihei, kum nanit jiuvin ahi.

¹¹Nangho dinga katohgimna ijem tin moh hinte, ti nangho dingin katijan ahi.

¹²Sopite, keima nangho banga kaumtah banghin, nangho keima bang hin umun tia kangeh nahiuve. Nanghon ahilouvin neibol pouvin ahi.

¹³Ahin katahsaphe hatmo jeh-a amasa-a Kipana Thupha nangho kahil chu nanghon naheuve.

¹⁴Kasa chunga nangho dinga lhepna um chu nahsahmon nabolpouvin, the jong nathe pouve; Pathen vantil khat bangle, Christa Jesu bang helin neinalem jouvin ahi.

¹⁵Chuti ahile chuche laija naseiju vangpha nakisah nao chu hoilam hitam? Na-umchan dol thu-u kahettohsah-a kasei ahi, hi theile namitchang sanu nakaldoh uva neipeh dingu ahi.

¹⁶Chuti ahile keiman najah uva thutah kasei jeh-a hi, nagalu kahi hitam?

¹⁷Amahon apha lama tompan tah-a nangho naholu ahipoi; nanghon amaho nahol theina dinguva, nangho chu polama kha khumden ding angaitou ahibouve.

¹⁸Ahin a-imatih chana apha lam hola tompan hi aphai; nakom uva kaum pet jenga hilouvin, imatih chanin aphai.

¹⁹Kanaote, nangho-a Christa lim asodoh kahse-a, keiman nangho dinga naosonat kathoh kit ahi;

²⁰Chule tun nangho koma hunga aw chombeh-a thusei kanom ngeijin ahi; ajeh chu nangho chungchang thu kadatmoi.

²¹Vo danthu noija umnom teho, seijun, nanghon danthu hi najah khah lou uham?

²² Hitin akisune, Abraham'in chapa ni aneijin, asohnu sunga peng khat ahin, khat chu soh hilounu sunga peng ahi.

²³Sohnu-a chu tahsaphe lam dola peng ahin, chamlhatnu-a vang chu thutep vanga penga ahi.

²⁴Hiche thuhi tekahna ahi; ajehchu hiche hi kitepna ni ahi; khatjoh chu Sinai mola kon chule soh-a vul dinga cha hinga ahi; hichu Hagar ahi.

²⁵Arabia gama min Hagar kiti chu Sinai mol kiseina ahi; chule tulaija um Jerusalem jong khu aseina ahi; amanu chu achate toh soh hitha-a ahi.

²⁶Chunga um Jerusalem vang chu ongthola chamlhatnu chu ahin; hichu ipiu ahi.

²⁷ Ajehchu hitin akisune, Achinga chasoh lounu nangma kipah-in; Naosonat thoh lounu sangtah-in khosamin; Pasal neijonu sangin ahomkeova umnu chate atamjoi.

²⁸Sopite, eiho jong Isaac banga thutep chate ihiuve;

²⁹ Amavang chulai tahsaphe lam dola pengpa chun lhagao lam dola pengpa chu suhmang agot ahin, tu-a jong chutobang chu ahi.

³⁰ Ahinla Pathen lekhabun ipi atim? Sohnu chu achapatoh kaidohtha tan; ajehchu sohnu chapa chun chamlhatnu chapatoh gou lokhom ponte, ati.

³¹Chuti ahi jeh chun, sopite, sohnu hin chate ihipouve, chamlhatnu hin chatejoh ihiuve.