Read Thado Chin Galatia 5 Bible Online

Galatia 5 - Thado Chin bible

Galatia 5

¹Soh ihi louna dinguva Christan eilhatdoh-u ahitai: chuti ahi jeh chun dingdet jingun, soh namkoljona chun kihen oh kit hih-un.

²Veuvin, kei Paul'in kahinsei ahi, nanghon chep natan uva ahile, Christa chu nangho dinga imacha aphatchom sah louding ahi.

³Cheptan ho chengse hettohsah na-a kahinsei ahi, ama chun danthu apumpia bol ding abat jing ahi nalaije.

⁴Nangho danthua chonphat chan goho chengse chu, Christa-a kona kisepkhen nahitaove; nangho lungsetna kona pul lha-a nahitaove.

⁵Ajeh iham itile eiho Lhagao vanga tahsana chonphat chan kinema ngah ihiuve.

⁶Ajeh chu Christa Jesu'ah cheptan hi aphatsahna aumpon, cheptanlou jong hi ima ahidehpoi; ahin tahsan ngailutna-a tonga chu phachoma ahibouve.

⁷Nangho nalhaiju aphaname; thutah thua nun louna dinga koiham nasumovah?

⁸Hitobanga kijol lhah hi nakou paova kon ahipoi.

⁹ Chol themkhat chan changbong lum apumpia apomsah ahi.

¹⁰Nanghon lung adang imacha neipouvinate, tia Pakaiya katahsan lheh nahiuvin ahi; ahinla nangho nasulonguva chu koi hile, achunga thu kitanna talen athoh tei ding ahi.

¹¹Sopite, tu-a hi keima cheptan thu dol seile-a hileng, ibola bolsetna hi kathoh dingham? chutileh thingpel'a kipal lhuhna hi kisubei ding ahi.

¹²Nangho sulonga pangho chu amahole amaho kitanbongleu pha kasai.

¹³Sopite, nangho soh hilou ongthol dinga kikou nahiuve; amavang soh nahilounao na-onthol nao chu tahsa lama dingin agomkomin neidaovin, ahin ngailutna-in khatle khat kijento uvin.

¹⁴ Naheng nakoma nangma bangtah-in ngailun, ti thua hi danthu jouse bukimsoh keija ahi.

¹⁵Amavang nangho kiketto saosaole kivalto saosao nahiu vangle, khat bola khat namanthah louna dingun chingtheijun.

¹⁶Keima vangin, Lhagaovin chonun, kati ahi, chutile tahsaphe lam lungtup chu subulhit lou ding nahiuve.

¹⁷ Ijeh-inem itile tahsaphe lam lungtup chu Lhagao douna ahin, Lhagao tup tahsaphe lam douna ahi; chutia chu nanghon nalunggot bangu chu nabol louna dinguva, hiteni chu kidouva ahi lhone.

¹⁸Ahin nangho Lhagao pui nahiu vangle, danthu noija um louva nahiuve.

¹⁹Chule tahsaphe lam thilbol chengse vang chu akilange; hichu miji toh jon, jonthanhoi, thenlou, huh,

²⁰Milim hou, doichoi, kidou, kinah kinel, kimitthip, lunghan, kiloset, kibungkhen, tahsan dihlou,

²¹Kithangset, toltha, jukham, eltol golnop bol, chule chutobang adang dang jong chu ahi; hichenga chu masanga kahilchah banguva chu masang peh-a kahilchah masah nahiuve, chutobanga chonho chun Pathen gam alo lou dingu ahi.

²²Lhagao ga vang chu ngailut, kipa, cham, thohhat, mihepi, phat, tahsan umtah hi,

²³Lungneng, amachang kitim, hicheng hi ahi; hitobangho chunga vang danthu aumpoi.

²⁴Christa-a hiho chengse chun tahsaphe chu alungtuple, angaichat puma thingpel'a akhetbehthao ahitai.

²⁵Eiho Lhagaova hinga ihiule, Lhagaovin chonuhite.

²⁶Khatnin khat lunghan sah-in, chule khatle khat kithangset ton, panna beijin hoitho pouhite.