Read Thado Chin Galatia 6 Bible Online

Galatia 6 - Thado Chin bible

Galatia 6

¹Sopite, mi khattou suhkhel neija auma athemona kimandoh aumle, lhagao mi nanghon lungnem tah-in chutobang mi chu boldamun, nangma kiven ajole nangma jong lhepna-a lhakha nate.

²Nangho khatle khat pohgih kipohhu uvin, chutichun Christa danthu nit bukim sohkeijun.

³Mi khattou ikhat hia kingaito-a, imachala hilou chu, ama kilhemlha-a ahi.

⁴Ahin, mitinin ama ama natoh kipatep chehhen, chutile ama changa thua kisonna ding mun anei ding ahi, mi dang thua hilouvin.

⁵Ajeh chu mitinin ama ama poh cheh akipoh ding ahi.

⁶Pathen thu kihila mi chun ahilpa chu thilpha lam dol jouse chankhom pihen.

⁷Nangho dohan lha hih-un; Pathen chu nelpeh dan ahipoi; ajeh iham itile mihemin aman atu tu chu a-at ding ahi.

⁸Ajeh chu tahsa lam dola tupa chun tahsaphe-a kona kemmang thei ga alo ding; Lhagao lama tupa vang chun Lhagaova kona tonsot hin kemlou ga chu alo ding ahi.

⁹Thilpha bolna lamah chimtih nei louvin umu hite, ilhahdah louvule aphatcha ilo dingu ahi.

¹⁰Hiche jeh chun hungun, aphat achang agomkom inei bang dol cheh-in, mi jouse chunga thilpha boluhite; ahideh-in eima insung mi atahsanho chungah haboldeh uhite.

¹¹Veuvin, keima kakhut tah-in jem khoutah-in nangho henga lekha kahinsune.

¹²Atahsa vet hoisah goho chengsen cheptan dinga nabol khoh-u ahi; hichu imadang dinga ahipoi, Christa thingpel jala bolset chu athoh louna dinguva ahibouve.

¹³Ajeh chu cheptan tah mongho jeng jongin danthu anitdeh pouve, natahsao chu kisonna-a anei theina dinguva, cheptansah dinga nagotjiu ahibouve.

¹⁴Keivang I-Pakaiyu Jesu Christa thingpel tailou chu thu dang imacha song hihhel ingkate; Ama vanga chu vannoi keima dinga chule keima vannoi dinga thingpel'a kikhenbeh kahitai.

¹⁵Ajeh iham itile cheptan chu imacha ahipoi, cheptanlou jong imacha ahipoi; Christa Jesu'a kisem thah bou chu thu ahi.

¹⁶Chule chuto bang chona-a chonte chunga le, Pathen mi Israelte chungah lungmon chule lungset umhen.

¹⁷Tu-a kalvang koiman eisulung gim tahih hen; ajeh chu kati chunga hi Pakai Jesu melchihna pole-a kahi.

¹⁸Sopiteho, I-Pakaiyu Jesu Christa milungset chu nangho lhagaotoh umhen. Amen.