Read Thado Chin Ephesia 1 Bible Online

Ephesia 1 - Thado Chin bible

Ephesia 1

¹ Pathen lungchama Christa Jesu solchah Paul'in Ephesia'a um mithengho chule Christa Jesu'a tahsanteho hengah.

²I-Pau Pathen le Pakai Jesu Christa-a konin lungsetnale lungmon naheng uva umhen.

³I-Pakaiyu Jesu Christa Pale Pathen vahchoijin umhen; aman eiho lhagao phattheina tintangin Christa-a vanho-ah phatthei eichanui;

⁴Ajeh chu aman vannoi bul phudoh masanga pat, ama anga ngailutna le thenga chule nolna beihela i-um theina dinguva, eiho einalhen dohsao ahin;

⁵Jesu Christa vanga alamcha dinga einagot masahsao ahi; hichu ama lunggotle lungdeilam bang dungjuija,

⁶Amilungset loupi vahchoi dinga, hichea chu adeitah te hidinga, lahtheija eisemu ahitai.

⁷ Hiche alungdei vanga chu eiho, athisana kilhatdoh ihiuva, lungsetna ahao dungjuija, ichonsetnao jouse ngaidam ichanu ahitai;

⁸Hiche lungsetna-a chu, aman chihnale lunggel themtah chu eivuhdimu ahitai.

⁹Chutia chu aman alung ngaitole alung deilam dol dungjuija, alunggil thuguh chu eiho eihetsah-un, aphat lhin tenga dinga ama-a gotsa akoi ahi;

¹⁰Hichu van ho-a thil chengsele leija um thil chengse, ania Christa-a gop khomsohna dinga ahi.

¹¹Chule masanga patna Christa-a kinema kingaija eiho, eihoa kona ama loupi vahchoina aso theina dinga,

¹²Alunggot dungjui tah-a ijakai bolpa chun, ama lunggot dolla einagotsao ahijeh-in, eihon jong ama jal-in goulo theina imutaove.

¹³Ama chu nanghon jong thutah, huhhing-a umna Thupha chu najah uva, ama natahsan uva, thutepsa Lhagao Thenga mohor kinama nahitaove;

¹⁴Hichu, achohsa ho lhatdoh nikho kahse-a, aloupi vahchoi dinga, igoulo diu khamgahna ahi.

¹⁵Hijeh chun Pakai Jesu'a natahsan naole, mithengte nangailut nao thu kajan,

¹⁶keiman jong nangho jal-in katao chanin tang louvin kathangvah jinge;

¹⁷I-Pakaiyu Jesu Christa Pathen, loupina Pa chun, ama hetna lama chihnale, thukilah hetdoh them theina lhagao napehna dingun,

¹⁸Eikounao kinepna hi ipi ahi, mithengho lah-a goulo ding loupina ahaoje chu ipi ahi,

¹⁹atahsana eiho dinga athahat, athilbolthei chungnunje nahet theina dinguva, nalung mitnu vahsah-a auma, athahat athilbol theina dungjuija,

²⁰ Aman Christa-a abola, athiho lah-a kona akaithouva van ho-a ama jet lama atousah ahitai;

²¹Vaipipu hi, thuneina, thahat thilboltheina, vainei, chule min kisah jouse chunga chungnung pen ahi, tu hiche vannoi leiset jenga hilouva, khonunga hung lhung dinga jong ahi;

²² Chule aman thil jouse ama thu noija akengto noija akoisoh ahi, chule houbung chu thil jouse luchang hina apeh ahi;

²³ Hichu ama tahsa ahia, ama dimset banga ijakaija ijakai adimsah ahi.