Read Thado Chin Ephesia 2 Bible Online

Ephesia 2 - Thado Chin bible

Ephesia 2

¹ Chule nangho nathemmo naole nachonset naova nathi pettah uva Pathen'in nahinsah-u ahitai.

²Hichenga chu hiche vannoi leiset chon ngai dola hinga, vanlaijola thuneitah vaipo, tulai thua nungloute lah-a natonga lhagao, puilea chu masang laise-a chu anachonle-a nahiu ahi;

³Hicheho lah-a chu eiho jong ibon chaova tahsaphe lamle ilunggot chan suhbukima, tahsaphe ngaichat thu lama inachonu ahi; chule adang dangho banga apen monga lunghanna chate inahiu ahi;

⁴Ahivangin mihepi khotona haotah Pathen'in ngailutna lentah-a eingailutnu ahi.

⁵Hiche jeh-a chu themo-a ithi laitah uva Christa toh thakhatna einahin sah-u ahitai; lungsetna vanga huhhing-a umna naneiju ahitai;

⁶Chule Christa Jesu vanga eihepiu hi, khonunga phat hung lhung dinga chu amilungset hao chungnunje phongdoh dinga,

⁷Hiche nadinga chu Christa Jesu vanga amatoh thakhatna eikaithouvu ahitai, chule vanmun ho-a eitousah-u ahitai.

⁸Lungset mana tahsan vanga huhhing-a uma nahitaove; hichu nangho-a kon ahipoi, Pathen thilpehjoh ahibouve;

⁹Koimacha kison thei louna dinga, hichu thilbol vanga hilou ahi.

¹⁰Ajeh chu eiho ama khutsoh ihiuve; chule ichonphatna dinguva, masanga patna Pathen'in agotsa chuche chonphatna dinga chu Christa Jesu'a kisema ihiuve.

¹¹Hiche jeh chun tahsaphe dola chidang namdang mi, tahsa-a khutna cheptana kona cheptan min poho lah-a cheptanlou tia kisei nangho,

¹²nangho masang laija chu Christa-a kona achom nahiu ahin, Israelte toh kitimat lou nahiuvin, thutep chonna danho chengsetoh kinepna beile Pathen beija hiche vannoi leisetna hi uma nahiuve, hichu geldoh-un.

¹³Tu vangin masanga nagamlat vangun, Christa Jesu'a naum jeh uva Christa thisan vanga chu anaija nahitaove.

¹⁴Ajeh chu ama chu eiho kichamna ahi, aman daltanna banglai chu aphetlhah-a, ania chu pumkhat aso ahitai,

¹⁵ Chonna ngaidan thupeh chu, kidouna chu atahsa-a asuhbei ahitai; chutia chu aman ama-a mi ni chu mi thah khat asosahna dinga asuhcham ahi;

¹⁶ Chule chutia chu kidouna chu thingpel'a atha-a, ania chu Pathen'a dinga akichamsahna dinga abola;

¹⁷ Chule ama hunga, gamlatah nangho hengle anaiho henga chamna ahung seile ahi;

¹⁸Ajeh iham itile ama vanga chu eiho iloiniuva, Lhagao khatna Pa anga umna thei thu ineiju ahi.

¹⁹Hiche jeh chun tu-a kalin nangho maljinle khopem nahitapouve; mithengte chenkhompi, chule Pathen insung mite nahitaove;

²⁰Chule Christa amatah inning song ahin, solchah ho le themgaoho songset chunga nangho kisadoh nahiuve;

²¹In kisa jouse chu amatoh kijop cheh ahin, houin theng hidinga Pakaiya khangtou in nahiu ahi;

²²Ama-a chu nangho chengse jong thakhatna kisakhom nahiuvin. Lhagaova Pathen chenna khat hidoh-a nahiuve.