Read Thado Chin Ephesia 4 Bible Online

Ephesia 4 - Thado Chin bible

Ephesia 4

¹Chuti ahi jeh-a chu Pakaiya sohchang keima naheng uva kahung tao ahi, Nangho nakikou naotoh kitoh-in chonun;

² Chonnemna bukimin, lung nemtoh, thohhattoh thon chonun; ngailutna-in khatle khat kingaithemun,

³Chamna-in kikanun, Lhagaova pumkhat hina dingin kihabolun.

⁴Tipum khat ahin chule Lhagao khat ahi; hiche banga chu nakikouvu jong chu kinepna khatna kikou nahiuve;

⁵Pakai khat, tahsan khat, baptize chan khat ahi,

⁶Chule mi jouse Pa leh Pathen khatsehbou ahi; ama imajouse chunga ahin, hoima jouse-a um ahi, chule nangho sung jouse-a um ahi.

⁷Ahinla Christa thilpeh teptena dan dungjuija eiho khat cheh lungsetna eipeh-u ahitai.

⁸ Hijeh chun Pathen lekhabun aseije, Ama chung sanga akaltou chun, Gal-hinga kiman mihonpi gal hingin akaitan ahi, Chule miho jong thilpehho apen ahi.

⁹Ahile, Akaltouvin, ati hi leiset noinung geijah akumlha masan ahi, ti lou adang ipi kisei naham?

¹⁰Akumlha-a chu ijakai subukipsoh dinga vanho jouse chung vuma kaltouva ahi.

¹¹Chule aman abang solchah, abang themgao, abang Kipana Thupha lhangsam, abang chinghoi kaihoi, abang mihil hina apeh ahi;

¹²Hichu lhacha natong dinga mithengho pi lhinsahna ding, Christa tahsa chu khantousahna dinga,

¹³Eiho tahsan thakhat ihiuva, Pathen Chapa thudola hetna ineijuva, mi khan kilhit ihiuva, Christa pilhin dungchan iphah masangseuva dinga ahi.

¹⁴Chutia chu miho gitlou lungthim doha lha-a suhkhelna dinga, puichat vaija uma chule thuhil hui lhoh lonle chapang ihi thei lou dingu ahitai;

¹⁵Chuti sang chun luchang hija Christa ama-a chu imalam jouse-a ikhan touna dingun, ngailutna-in thutah seijuhite;

¹⁶ Ama-a kona tahsa pumpi hi kitoh cheh-a kisuto-a kikilmat khom ahin, hichea chu gu kisuhtona chengsen tibah dangdang ho natohna apeh dan dungjui cheh-a, tahsa pum chu ngailutna-a kisadoh dinga akhantousah ahi.

¹⁷Hijeh-a chu hiche hi kasei ahi, Pakaiya hiche hi kahettohsah nahiuve, chidang namdang ten lungchavai aput dungjuijuva achon bangun chonta hih-un;

¹⁸Amaho chu ahetna lungu thima ahin, Pathen hinna peh chu chang lou ahitaove, asunguva het louna auma, alungu tah jeh chun;

¹⁹Amaho lungmoh hiuva ahile, thilthenglou tincheng bolna dinga, lop lamle papset lama kipe-a ahiuve.

²⁰Nangho vang chutia chu Christa kihilla nahipouve,

²¹Jesu'a uma thutah dungjuija chu athu chu jatasa nahiuva ama-a kihila nahiule;

²² Chutichun nanghon masang laija chonna dol lama chon, doha lheplhah, gitlou lung gula haset chehcheh mi lui chu pailhauvin;

²³Chule chutichun nalhagao lungthimun kithah semun,

²⁴ Chule Pathen lim banga chonphatna le thenna dihtah-a kisem mithah chu kivonun.

²⁵ Hijeh chun nanghon jou pailhauvin, amitakip aheng akomtoh thutah jengchan kihou cheh hen; ajeh chu eiho khat khat hi khat tibah hicheh ihiuve.

²⁶ Lung chu lunghangun, ahin chonse hih-un; nalunghan nao chu nisan lhumkhum hihhen.

²⁷Chule diabol chu mun ot hih helun.

²⁸Agucha-a gucha kit ta hihhen; ahin alhasama ato theina dingin, akhut tah-in napha tong gimhen.

²⁹Nakam uva konin thuse soh hihhen, ahin aja chan lungsetna hop theina dingin, ngaichat doltah-a hou thu lama khantou theina dingin thupha sohjohen.

³⁰Lhatdoh nikho-a dinga mohor nakinam nao Pathen Lhagao Theng chu, lungphat mosah hih-un.

³¹Lung damlouna jouse, lunghan, lungsat, kinah, kitaitom, hichengse chule gitlou engsetna jouse nangho-a konin koimangun;

³² Chule nangho kihepito cheh-un; lungnemun Pathen'in Christa-a nangho nangaidam bangu chun, khatle khat kingai damun.