Read Thado Chin Ephesia 5 Bible Online

Ephesia 5 - Thado Chin bible

Ephesia 5

¹Chuti ahi jeh chun chate dei bangtah-in, Pathen umchan jom hiuvin;

² Chule Christan nangho nangailut bangu chun, ngailutna-in chonun; ama nangho dinga Pathen lama maichama thilpeh gimnamtui banga kipe-a ahi.

³Ahin mithengte chonna doltah-in, jon thule thenlouna tintang chule papset nalah uva kiphapoh hihhen;

⁴Chule jamo, thumotsei, totthanghoi, hicheng jong chu nalah uva um hihhen; Pathen thangvahna umjohen.

⁵Ajeh chu Christa le Pathen gam sunga chu mi jonpan, mi thenglou, mi papse, milim hou, hicheng chu ima achan dingu aumpoi, ti chu kichenin naheuve.

⁶Mohthu ahomkeovin koima kilhep lhahsah hih-un; hitiho jeh chun thua nunglou chateho chungah Pathen lunghan achujin ahi.

⁷Hijeh chun nanghon chutiho chu kikoppi hih-un.

⁸Ijeh-inem itile nangho khatvei chu muthim nahiu ahin, tu vangin Pakaiya khovah nahiu ahitai; khovah chate bangin chonun;

⁹Ajeh chu Lhagao ga chu phatna jouse, chonphatna, chule thutah ahi;

¹⁰Pakai lunglhaina ding lam photoh-un;

¹¹Ahin muthim natohho ga neilou chu kikoppi hih-un; amaho chu sosalun phohsal jovin;

¹²Ajeh chu amaho guhthim natohho chu sei ding jong jachat umleu ahi;

¹³Ajeh chu ijakai phongjala khovah ahijeh chun, akisosal jouse chu khovah chun aphongjal jitai.

¹⁴Hijeh chun aman, Vo imumil, khangin, chule athi lah-a konin thoudoh-in; chutengle Christan nangma nasalvah ding ahi, ati.

¹⁵Hijeh chun iti nachonum, chingtheijun kihongphauvin; mi lung beiho banga chon louvin, michingho bangin chonun;

¹⁶ Tulai nikho hi aphat lou jeh hin, phat kijen petcha hi kichoh-un.

¹⁷Hiche jeh chun lungthim beijin um hih-un, Pakai lunglam ipi ahi heuvin.

¹⁸Chule lengpitwi jin kham hih-un; hichea chun setna aume; ahin Lhagaovin dimset jovin;

¹⁹ Tumging toh tho lan, hou lan chule lhagao lan kihoulimun; nalunggilun Pakai dingin kitohdelin longdelin la saovin;

²⁰Imatih chanin imalam jouse-a dingin I-Pakaiyu Jesu Christa minin Pa Pathen thangvah jingun;

²¹Pathen janan khat thun khat nungun.

²² Numei ho, nangho Pakai thu noija bangin na-inneipu chengu thu noija umun;

²³Ajeh iham itile Christa houbung luchang ahi banga chu, inneipu jong numei luchang ahi; ama tahsa huhhing-a jong ahi.

²⁴Ahin houbung Christa thu noija aum bang chun, numei ho jong imalam jouse-a a-inneipu cheh-u thunoija um cheh-u hen.

²⁵ Inneipu ho Christan houbung angailut bangle, ajeh-a ama akipehdoh jeng bangtah chun, nanghon jong na-inneipite chengu ngailuvin;

²⁶Aman twija asilngima, thua asuhthengna dinga, ama kipedoh jeng ahi.

²⁷Hichu boh beh louhel le avoi kom beihela, thengtah le nolna beihela, a houbung chu loupitah-a ama anga aumsahna dinga ahi.

²⁸Chuti ahi jeh chun innei puhon jong a-inneipite chengu, ama ama tahsa banga angailut dingu ahi. Koi hile a-inneipi ngailu-a chu ama kingailua ahi.

²⁹Ajeh chu imatih chanin koiman ama tahsa ahotbol khapoi; avah khangin ahebol bouve. Pakaiyin houbung abolna bang chun.

³⁰Ajehchu, eiho aphele agu-a kon, atibah ihiuve.

³¹ Hijeh-a chu min anu apa adalhah-a ajia beh ding ahi, chule amani chu tikhat hilhon ding ahi.

³²Hiche thugil hi giltah ahi; ahivangin keiman Christa le houbung thua kasei ahi.

³³Hijongle nangho changval cheh-in na-inneipi chengu nangma naki ngailut bangin ngailuvin; chule inneipi chun a-inneipu aja ding sumil hihhen.