Read Thado Chin Ephesia 6 Bible Online

Ephesia 6 - Thado Chin bible

Ephesia 6

¹ Chateho, Pakaiyah nanu napau thun nungun; hichu chondih ahi.

² Nanu napa jabolin; hichehi thutep togoma thupeh masa ahi;

³Chutile naphat theija leiset chunga nahinkho sotding ahi.

⁴ Chule pateho, nanghon nachate chengu sulunghang hih-un; Pakai thuhila chon kichuhna le tilkhouna lamin seiletsah jovin.

⁵ Sohteho, nangho Christa thu noija naum bangu chun, kichatle kitihot pumpumin, lung jangkeijin tahsa lama napakai te chengu thu noija umun;

⁶Mihem lunglhaisah nadinga mitmu soh hilouvin, lungsunga kona Pathen lunglam bola Christa soh bang hiuvin;

⁷Mihem lama hilouvin, Pakai lama phatna lunggela napha tong hiuvin;

⁸Amitakip, soh hihen, soh hilou hijongle, koi hile thilpha bol chan chun, hiche mama chu Pakaiya kona asan kit ding chu heuvin.

⁹ Chule pakaiho, chutobangma chun amaho chu bolun, amahole nangho nagom uva na-Pakaiyu chu van'ah aumin, chule aman mi koima datle langkaina aneipoi, ti heuvin lang, hutum gihsal boldaovin.

¹⁰Achai nakeijin, sopite, Pakaiyah chule athahat athilbol theina-a chun hatnun.

¹¹Diabol lungthim gilou tincheng masanga nadin jou theina dingun, Pathen galvon chengse kivonun,

¹²Ajeh chu eiho tahsaphe le thisantoh kibon ihipouve; pipuho toh, thahat thuneiho toh, hiche vannoi muthim vaipoho toh, vanmun ho-a lhagao gilou engsehotoh kibonjoh ihiuve.

¹³Hijeh chun nikho phalounia nalethuh jouna dingule, ijakai nabukip sohkeijuva nadindet theina dingun, Pathen galvon chengse panun.

¹⁴ Hiti chun thutah-in kong kigah-un, chonphatna ompho kiah-un;

¹⁵ Chule gotsa chamna Kipana Thupha kengchot kiseuvin dingun;

¹⁶Chucheng chunga chun tahsan lum panun, agiloupa thalpi meikong tobang ho jouse chu nasuhmit jouna dingun.

¹⁷ Chule huhhingna lukhuh chu kilah-un, Lhagao chemjam panun, hichu Pathen thu ahi.

¹⁸Taona jousele thumna tintangtoh thon a-imatih chanin Lhagaovin tao jingun, chule hichena ding chun mithengte jouse dingin thohhat le thumna jouse thon hichea chun kiging jingun.

¹⁹Chule keima dingin jong paodohna dingdola thuseidohna eikipeh theija, chutia chu Kipana Thupha thugil hi hakat tah-a kaseiphonga, kahetsah theina dingin, neitaokop jingun;

²⁰Hiche dinga chu thihkhaova kihena leng palai natonga kahi, hichea hi hakat tah-a kaseidol kasei theina dingin.

²¹ Keima thudol, iti kaum ipi kabol, nahetna dingun Pakaiya lhacha tahsan umtah sopidei Tychicus, ama hin ijakai nahetsah naovinte.

²² Keima umchan dol thu nahetna dingule, aman nangho nalhamon theina dinguva, hiche lungngaito-a chu keiman ama hi naheng uva kahinsol ahi.

²³Pa Pathen le Pakai Jesu Christa-a konin, sopite henga lungmonle tahsan chule ngailut umkhom hen.

²⁴I-Pakaiyu Jesu Christa kemthei louva ngailuho chengse chu lungsetna hin umpihen, Amen.