Read Thado Chin PHILIPPIANS 2 Bible Online

PHILIPPIANS 2 - Thado Chin bible

PHILIPPIANS 2

¹Hijeh chun Christa-a kitilkhou na auma, lungmonsah thei ngailutna auma, Lhagao pankhompina auma, lungnema lungsetna le khoto lainatpina auma ahile,

²Kakipana hi subukimun, chutichun Lungthim kithakhat, ngailut kithakhat hiuvinlang, thukhat kisaovin, lungkhat hiuvin;

³Kilung douna le kiloupisah na-a kona imacha bol louvin, lungnem heochan khatnin adang chu ama sanga phajoa gel cheh hiuvin;

⁴Amitakipmin nangma nangma-a cheh ding jenga thil ve louvin, adangho ding jong veuvin.

⁵Christa Jesu'a uma hiche lungput chu nangho sunga jong neijun;

⁶Ama chu Pathen lima uma ahin, Pathen toh kikottena aum chu, kikolchah jing jeng lung angaitopoi;

⁷Ahin ama akisunem min, soh limin aumin, mihem bangin akisemtan ahi;

⁸Chule alimso amelput umchan mihem'a bang bangin aumin, ama le ama akineosah-in, thina gei, thingpel'a thina geisanin thun anunge.

⁹Hijeh-a chu Pathen'in sangtah-a achoisanga, chule min jouse sanga min chungnung chu apeh ahitai:

¹⁰ Hitia chu Jesu mina mijouse van'a cheng hihen, leisetna cheng hihen, leinoi'a cheng hijongle, akhup uva dilsu uva;

¹¹Pa Pathen loupina dinga lei jousen Jesu Christa chu Pakai ahi ti aphondoh ding ahi.

¹²Hijeh chun kangaitah te, nanghon sei nangai jing bangu chun, keima um petna bang hilouvin, tu keima umlou pet hin kicha le kithing thingin huhhing-a na-umnao chu tongdoh-un.

¹³Ajeh chu alung deilam tupna dingle tohdoh nadinga nasunguva natonga chu Pathen ahi.

¹⁴Phunchel louhel le kinel baotam louhelin imajouse bolun;

¹⁵ Chutia chu nolna beile suhsetbei Pathen chate nahidoh theijuva, khang lamvaile vahkoiho lah-a nolna beihela naum uva, vannoi'a alah uva meivah banga kilang nahina dingun,

¹⁶Hinna thu chu dom sangun; chutia chu moh lhaija kahilou, moh tohgim jong kahilou chu Christa nikho nileh kisonna kanei theina dingin.

¹⁷Ahi, na ganlhaina chungu le natahsan pehdohna uva chun todoh-in um jongleng kipah ding kahi; chule nangho jouse toh kakipa ding ahi.

¹⁸Chule chutima chun nangho kipah-un, keima jong neikipa piuvin.

¹⁹Nangho umchan kahettoh-a keima jong kalungmon nadinga chomkhat joule Timothy naheng uva hinsol dinghi Pakai Jesu'a kakinepna ahi.

²⁰Ajehchu keima tobanga lungtheng sela nangho khankho ding gel ama tobang koima aumpoi.

²¹Ijeh inem itile mijousen Jesu Christa-a ding hol louvin, amaho deilam cheh aholun ahi.

²²Ahin nanghon ama chu kipatepma aphat kiphochen ahi chu naheuve, hichu chapan apa atohhu banga ama hi keimatoh kitho-a Kipana Thupha jala natong ahi.

²³Chuti ahi jeh chun ikati akihet phat phatle ama hi hinsol leng tin kakineme;

²⁴Keima jeng jong chomkhat joule hunginge ti hi Pakaiya katahsan lheh jenge.

²⁵Ahivangin kangaichat koma eijenlea pang nangho thupole, kasopi, kanatoh na-a kakithopi, kasepai chanpi Epaphroditus, ama hi naheng uva hinsol khoh kasatai.

²⁶Aman jong nangho nabon chaova mu alunggot lheh jeng ahi; nanghon ama anai ti thu najah-u chu alunghimo lheh jenge.

²⁷Chule tahtah-a na-a thita vang ahi: ahivangin Pathen'in alungsetnin; ama chang jeng hilouva keima jong eilungset ahi; achuti loule keiman kagenthei hesohna chunga genthei hesoh kathoh ding ahi.

²⁸Hijeh-a chu nanghon ama namu kitnuva nakipa theina dingu le, kalung hesoh jong alhomdomna dinga ama hi kahinsol loi jeng ahi.

²⁹Hijeh chun kipana kimkeijin Pakaiyah analemun, chule hitobang mi hi jabolun;

³⁰Ajeh chu keima neijenlenao lhinglou bangkhai chu subulhit dinga ama habola kibola, Christa natohna-a ahinkho jengjong khohsa louva thidehchet ahi.