Read Thado Chin PHILIPPIANS 3 Bible Online

PHILIPPIANS 3 - Thado Chin bible

PHILIPPIANS 3

¹Achaina keijin, kasopite ho, Pakaiyah kipah thanomun. Thu thakhat mama chu hinsut kit ding hi keima kachimpoi; nangho dingin jong aphachome.

²Uichate holah-a chun chingtheijun, kihongphauvin, achon gilou lah-a chun chingtheijun kihongphauvin, chule kitumsahho lah-a chun chingtheijun kihongphauvin;

³Ajeh iham itile eiho Lhagaova Pathen hou ihiuvin, chule Christa Jesu'a kipah, tahsa lama kingai lou cheptan chu ihiuve;

⁴Keima tahsa lama kingai jeng jongleng kingai thei kahi; midang tahsa lama kingai theija akingaitoa ahile chuche sanga chu keima kingai thei cheh ding kahi.

⁵ Keima niget ni-a chepkitan, Israel chi, Benjamin phunga mi, Hebrew miho lah-a Hebrew; danthu lama Pharisai;

⁶ Tomlahna lama houbung bolsele-a; chule danthu dola chonphatna-a themona neilou kahi.

⁷Ahivangin phatchomna kanei chengse chu Christa ding lama hakamna-a kangaito ahitai.

⁸Ahi, tah mong mongin ka Pakai Christa Jesu hetna aphat jeh chun abonchan hakam nanbou kagel jing jenge; ama jala chu imajouse hakamna kathoh ahi, chule Christa chu phatchom na-a kanei theina dinga, hichu eh tobanga kagel ahitai.

⁹Ama-a chu keima eikimudoh-a, danthua kona hidoh keima chonphatna chu nei louva, Christa-a tahsan vang, tahsana vanga Pathen'a kon chonphatjoh chu kaneija;

¹⁰Chutia chu amale athokitna thilboltheina thahat chu kahet theija, athohgim naho chu kikoppia kahia, chule ama thitoh kithakhat kahidoh theija;

¹¹Ijem tia athia kona thokitna chu kachan khah theina ding kati ahi.

¹²Keiman tu-a hi kanei ahitai, chule achamkima kahitai kati ahipoi; Christa Jesu'n keima eimat bangma chu keiman jong hichu kamat theina dinga hadela kadel ahi.

¹³Sopiteho, keiman kamantai tin kakigel hih laije: ahin hiche thilkhat hi kabole, nung lama um thil chengse chu kasumilin, masang lama um thil chu kadelin ahi;

¹⁴Jesu Christa-a Pathen kouna sang lama hatman sanna dinga abimun chu hadela del kahi.

¹⁵Chuti ahi jeh chun eiho apilhingsa chengse hitobang lung chu vop cheh-u hite; chule ijem tia lungchom vop na-umule hi jong chu Pathen'in nangho chungah phongdoh nante.

¹⁶Hijongle eihon iphahna chan chengseu hin chonu hite, hiche chu lunga vop jinguhite.

¹⁷ Sopiteho, nanghon keima umchan thovin, chule navetkah dinguva um keiho, keiho banga chonho chengse chu veuvin.

¹⁸(Ajehchu mi tamtah achombeh-in achontan ahi: amaho umchan chu najah uva kasei matchetsa ahitai, tu-a jong kap pumpuma kaseipeh nahiuve, amaho chu Christa thingpel douva ahiuve;

¹⁹Amaho chu akichainao manthah ahi, atumpiu chu amaho Pathen ahi, aloupinao chu ajachat naova uma ahi; amaho chun leiset thubou agelui).

²⁰Ijeh-inem itile eiho vangam mite ihiuve; chule chua kona chu huhhing-a I-Pakaiyu Jesu Christa chu ahung ding kinema ngah jinga ihiuve.

²¹Aman athilbol theina-a ijakai athua anunsah thei ahi, hiche dungjuija chu eiho tahsa manmo hi akhela ama tahsa loupitah lima chu aumsah ding ahi.