Read Thado Chin PHILIPPIANS 4 Bible Online

PHILIPPIANS 4 - Thado Chin bible

PHILIPPIANS 4

¹Chuti ahi jeh chun kasopi deitahteho le kangaitah teho, kakipana le kalukhuh, sahtahteho, hiti hin Pakaiyah umdet jingun.

²Keiman Euodias le Suyntyche chu Pakaiya lungkhat hi dingin kajole.

³Kanam koljon putkhompitah, nangma jong kangeh nahi, nangman hiche numei ho chu anahun; ajeh chu amaho hi Kipana Thupha-a keimatoh kitho-a tonggim ahiuve. Clement le katoh khompi dang danghon jong chutia chu abolu ahi, amaho min chu hinna lekhabua kisuna um ahi.

⁴Nangho Pakaiyah kipah thanom jingun; ti kitleuvinge, Kipah thanom jingun.

⁵Nangho nachonnemu chu mi jouse het hihen. Pakai anaije.

⁶Imacha lungkhamna nei hihhelun; ahin imalam jouse-a taonale thumna mangin, thangvah toh thon, nathum jouseu chu Pathen hetsah-un.

⁷Chutengle Pathen lungmonna, hetna jouse khokhel sohkeija chun, nalungu le nalungthimu Christa Jesu'a ahon ding ahi.

⁸Achaina-in, sopiteho, thutah chacha, ja umdol chacha, adihlam chacha, atheng chacha, dei um chacha, seiphat chacha, phatna nei ima auma chule pachat channa auma ahile, hitiho dol chu lung gelun.

⁹Nanghon keija kona nakihil uva najopsao, najahsao, namusao chengse chu bolun: chutile lungmonna Pathen chun naumpi jing jeng dingu ahi.

¹⁰Hitih chanpi nunga ka phatna ding nangaito nao nahin thahbol kitleuvu hi Pakaiya hapan kakipah lheh jenge; hiche dinga chu nagotsao vang ahinan, ahivangin hiche pet chun agomkom namupouve.

¹¹Kalhahsam mana hichu kasei ahipoi, ajehchu keima itobanga iti kaum-em, kaum bang banga lunglhaija umje kakihet ahitai.

¹²Nemcha umje jong kahen, haotah-a ninglhinga umje jong kahei; imajousele thil jouse-a, vatah-a umle keltah-a umje, ninglhinga umjele lhasama umje thuguh chu kakihetdoh ahitai.

¹³Eihat sahpa Christa vanga chu ijakai bol thei kahi.

¹⁴Ahi jeng vangin kagenthei hesohna-a neikithopiu hi nabol pha lheh jengui.

¹⁵ Chule nangho Philippi'a miho, Thupha hung lhun tila keima Macedonia gama kona kapotdoh lai chun, nangho tailou houbung khatcha jong pehle lah thudola eikithopia aumpoi ti nanghon nahenaove.

¹⁶ Ajeh chu Thessalonica kho-a kaumlai jong chun, kalhah samna khatvei jeng hilouvin kakhohna nagelun eihunan neithot kit leuvun ahi.

¹⁷Thilpeh chu kahol ahipoi, aga nangho lama apung ding chu kaholjoh ahi.

¹⁸ Ijakai kaneikime, kahaove; nangho-a kona thil gimnamtui doija kilha-a Pathen lah theidol le lunglhaina chu Epaphroditus khutna kanamun, hiche chun kaning lhingset tan ahi.

¹⁹Chule ka-Pathen'in loupina-in Christa Jesu'a ahao dungjuijin nangaichat jouseu pekim naovin nate.

²⁰Tun i-Paule i-Pathen'u chu atonsot atonsot geijin loupi jinghen, Amen.

²¹Christa Jesu'a um mithengte chengse kasalam anapeuvin. Kaumpi sopitehon salam napeuve.

²²Mithengte jouse, ahideh-in Ceasar insung mitehon salam napeuve.

²³Pakai Jesu Christa milungset chun nabonchaovin umpiuvin. Amen.