Read Thado Chin Colossia 1 Bible Online

Colossia 1 - Thado Chin bible

Colossia 1

¹Pathen lunggot lama Christa Jesu solchah Paul chule sopi Timothy'n,

²Colossia'a um mithengte le Christa-a sopi ginchat tahho hengah, i-Pau Pathen le I-Pakaiyu Jesu Christa-a konin nachung uva lungset le chamna umhen.

³Keihon I-Pakaiyu Jesu Christa Pa Pathen chu kathangvah-un, a-imatih chanin nangho dingin katao jingjiuve,

⁴Christa Jesu'a natahsanu chule mithengho jouse ngailutna naneiju thu chu kajauvin;

⁵Masanga kipana Thupha thutah-a kona najahsao, nangho dinga van ho-a kinepna koisa ahi jeh-a;

⁶Hiche kipana thupha chu najah niuva pat le Pathen milungsetna chu thutah-a nahet niuva pat, vannoi leiset pumpi kom alhuna ga asodoh banga, nangho-a kom jong hung lhunga ga asohdoh ahitai:

⁷ Hiche thutah chu kasahtah-u, kasohchan khompiu Epaphras'in nahilsao ahitan; ama hi nangho dinga Christa lhacha tahsan umtah ahi;

⁸Ama mama hin lhagaova ngailutna naneijeu chu keiho henga aphondoh ahi.

⁹Hiche jeh-a hi thu kajah pat niuva patna chu keiho jong nangho dinga taopeh le thumpeh tang louhel kahiuve; chutia chu nangho chihna le lhagao lam hetna tinchenga ama lunggot lam hetna-a nadim uva;

¹⁰Chule hichea chu Pakaiya dinga kiloma imalam jouse-a dei um lama nachon uva, thilpha bolna tintanga naga uva, chule Pathen hetna lama nakhantou uva;

¹¹Kipah thanoma thohhat le lungdehat phong dinga, aloupi athahat dungjuija nahatdohna dingun;

¹²Vah-a cheng mithengte chan, chan khompia loma eiho eisemuva Pa chu thangvah jingun:

¹³Ama chun muthim thahat thunei na-a kona eihuhdoh uva, Achapa ngailut gam mi eisou ahi;

¹⁴ Ama-a chu eihon athisan vanga kilhatdohna ineijuva, chonset ngaidamna jeng jong ineiju ahi.

¹⁵Ama chu mutheilou Pathen lima um ahin, thilsem jouse lah-a apeng masapen ahi;

¹⁶Ajehchu ama-a chu thil jouse kisema ahi, van chunga hihen, leiset chunga hijongle, muthei hihen mumo hijongle, laltouna hihen, vaihomna gam hihen, piputna hihen, thahat thuneina hijongle: thil jouse ama sem ahin, ama-a dinga kisema ahi;

¹⁷Chule ama thil jouse masanga anaum jingsapeh ahi, chule ama-a chu thil jouse umsoh ahi.

¹⁸ Ama chu tahsa (hichu houbung) luchang ahi; ama chu abul ahin, imalam jouse-a chungnung pen ahina dinga, athiho lah-a apeng masapen ahi.

¹⁹Ijeh ham itile ama-a chu chamkimna tincheng aum ding chu Pa lunglam ahi;

²⁰ Chule athingpel thisana chu chamna asema, ama vanga leija um thil jouse hihen, van'a um thil jouse hijongle, amatah-in amatoh suhchama aumsah ahi.

²¹Chule nangho, masang nachon gitlounao jeh-a ama-a kona pampaija uma, nalung sungva melma nahiu ahin, hijongle tun,

²²Ama mitmu-a athengle, boh beh louhel, chule nolna beija nadinsah theina dinguva, ama tahsa athi jala nakichampiu ahitai:

²³Nangho tahsanna-a chu najung khouva, naki phudet uva, nanghon najahsao chule vannoi'a thilsemho jouse henga kiseiphong, chule keima Paul alhacha le-a kapana hichea kipana thupha kinepna'a kona hi kichondoh louva naum uva ahileh nadinsah dingu ahi.

²⁴Tun keiman nangho dinga hesoh genthei kathoh hi kakipapin, chule Christan atahsa, hichu houbung ahin, khohsahna jala ahesoh genthei thoh bangkhai chu kasa-a hin kabulhit jingin:

²⁵Pathen thu subulhit dinga, nangho-a dinga keima eikipe Pathen gouchin dungjui bangtah-a, chuche lhachale-a chu eikipansah ahi;

²⁶Chuche thugil chu akhang akhanga ki-ima thuguh chu ahin, tu-a vang amithengte henga kiphong jala ahitai.

²⁷Chidang namdangho lah-a chuche thuguh gou loupi chu ipiham ti chu Pathen'in amaho henga hetsah nom ahi; hiche gou loupi chu nangho-a um Christa chu ahi, ama chu kinepna loupi ahi.

²⁸Ama thu chu kahilu ahi, mi jouse hi Christa Jesu'a aphat chamkima Pathen anga kadinsah theina dinguva, kachihna jouseuva amitakip kapholeuva ami jouse kahilu ahi:

²⁹Chutia chu keima-a nasatah-a athilbol thei thahat dungjuija chu, keima jong thohgima hatah-a kiseh kahi.