Read Thado Chin Colossia 2 Bible Online

Colossia 2 - Thado Chin bible

Colossia 2

¹Ajeh chu nangho le Laodicea umho, chule tahsa-a kamel muloulai ho chengse dinga keima nasatah-a kaki habol hi heleu chun kalung ahi;

²Chutia chu alungu lhep lungmonga aumuva, ngailutna-a akikhi gom theijuva, hetchenna dimset gouva chu ahaodoh theijuva, Pathen thugil, Pa le Christa chu ahetdoh theina dingun;

³Ama-a chu chihnale hetna gou jouse kisela ahi.

⁴Hiche hi koiman seithema nalhep lhah louna dinguva kasei ahi.

⁵Tahsa-a nalah uva kaum lou jeng vangin lhagaovin kaume, kipahtah-in nachondih jeule Christa-a natahsan detjeu kamu jinge.

⁶Chuti ahi jeh chun nanghon Christa Jesu, Pakai chu, nalah bangu chun, ama jengah chonun;

⁷Ama-a chun jungkhovin chule kisadoh-un, chule natahsan naova chun kiphut doh-un, nakihilu bang chun, hichea chun thangvahna dimin umun.

⁸Chingtheijun, achuti louva ahile khat touvin Christa thua tobang hilouvin, mihem thugouchin le vannoi leiset lekhajem bul ho-a kon chihgut lekha themna le doha lhahna moh thua nasuse getnunte.

⁹Ajeh chu Ama-a chu Pathen hina jouse chamkimna tahsa-a banga cheng ahi;

¹⁰Chule nangho hichea chu kisuchamkima nahiuve, ama chu piputle thuneina jouse luchang ahi.

¹¹Ama-a chu nangho khutna cheptan hilouva cheptan nahiu ahi, tahsaphe chonset naho tahsa chu ponsil pailhah banga kipai lha-a, Christa-a cheptan nahiu ahitai.

¹² Na baptize chanuva chu amatoh lhana kivuitha-a nahitaove, chuche baptize chan vang mama-a chu athi lah-a kona ama kaithouva Pathen thilbol tahsan vanga amatoh kaithoutha-a um nahitaove.

¹³ Chule suhkhelna leh tahsa-a cheptan louva thia nangho chu, Pathen'in nathemmonao jouse angaidama, thakhat tah-a ama chutoh nahinsah thau ahitai.

¹⁴ Chule eidoudal uva ichunguva batna lekhasut danthua kisun chu anoimanga, athingpela thingkila akhetbehtha-a asuhbei ahitai;

¹⁵Chule piputna le thu neina jouse alelhah-a, hichengse chu ajoa, amaho chengse chu kilangtah-a avetsah ahitai.

¹⁶ Chuti ahi jeh chun anneh thua ahim, don thua ahim, kut nikho thua ahim, lhathah nikho thua ahim, chule cholngah ni thua ahimin, koiman nangho na-oimo daohen.

¹⁷Hitiho jouse chu khonunga hunglhung ding thudol lim ahibouve: ahin tahsa chu Christa-a ahi.

¹⁸Nasan dingu tohphat man chu chonnemna lhem le vantil ho hou, athil mulou houva chengdena, atahsa lungu ahomkeova kimoh choisang,

¹⁹ Atahsa pumpi kivah khangna, agu kisuhto na-a kikilmat tona, Pathen khansah-a akhana aluchang chu atuhdet louva mihem koimacha chom mangsah hihhelun.

²⁰Chutia chu vannoi leiset lekhajembula kona chu Christa toh thitha nahitah uva ahile, leiset hinna-a hingnalai banga ibola danthu noija lutna,

²¹(Tham hih-in, tep hih-in, tongkha hih-in tiho;

²²Hichengse chu imanchah laija mangthah jeng ahi;) mihem thuhil hole thupeh noija um nalai nahiuvem?

²³Hiche thilho hin lungchama hou, chonnemna, chule tahsa khoto louna thilbola chihna aneijin; ahinla tahsa ngaichat kitimna lama imacha phatchomna aneipoi.