Read Thado Chin Colossia 3 Bible Online

Colossia 3 - Thado Chin bible

Colossia 3

¹ Hijeh chun nangho Christa toh kaithoutha-a um nahiule, Pathen jet lama tou jinga Christa umna chung lam thu jengbou chu ha holun.

²Leiset thu geldaovin, chung lam thu jengbou gelun.

³Nangho athisa nahiu ahin, nahinnao chu Christa toh Pathen'a kisela ahi.

⁴Ihinnao Christa ahung kilah tengle, amatoh thakhat tah-a nangho jong loupitah-a kilangdoh ding nahiuve.

⁵Hijeh chun nanghon leiset chunga natibah chengseu: jon, thenlou, huh, gitlou lungtup, papset, hichu milim hou ahin, hicheng chu thisah gamun.

⁶Hicheng jeh chun thua nunglou chate chunga Pathen lungsat achujin ahi.

⁷Masanga nangho chuchenga nahin laijuva chu, nangho jong chutihoa chu anachonjia nahiu ahi.

⁸Ahin tun lungsat, lunghan, mitthip, houset, taitom, kam sunga kona thujahmo sei, hicheng jong chu paimangun.

⁹ Khatle khat thujouvin kihou hih-un; ajeh chu nanghon hicheng chu anatoh puma mi lui chu ponse lelhah banga nalelhahsao ahitai.

¹⁰ Chule nasempao lim banga hetna-a kona kisemthah mithah chu nakivonu ahitai.

¹¹Hichea chu Greek mi le Juda mi, cheptan le cheptanlou, paomah hammah, Scythia mi, soh le ongthol umlouva ahitai; Christa chu ijakaija ijakai ahi.

¹² Hiche jeh chun Pathen lhenchom mithengte le deitahte bangtah-in, khotona, hepina, kineosah, nunnem na, thohhat, hicheng chun kivonun;

¹³ Nangho khatle khat kidemdaito cheh-un; khatnin khat chunga themosahna ding thu naneijule kingaidam touvin; Christan nangho nangaidam bangu chun nanghon jong ngaidamun;

¹⁴Hicheng jouse chunga chun ngailutna kivonun; hichu kikankhomna chamkimpen ahi.

¹⁵Chule Pathen lungmonna chu nalunguva vaihom hen; hiche dinga chu nangho tipum khatna kikou nahiuve; chule thangvahna dimin um jingun.

¹⁶ Chihna jouse-a Christa thu chu nasunguva cheng dimset jinghen; tumgingtoh tho lan, hou lan, chule lhagao lan khatle khat kihilun kitilkhou touvin, lungsetna thua nalung gilun Pakai choiatnan la saovin.

¹⁷Chule thu lam ahin, natoh lam ahin, nabol chanu Pakai Jesu minin bolun; chule ama vangin Pa le Pathen thangvah jingin umun.

¹⁸ Numei ho, Pakaiya lomtah-in napasal teo thunoija umun.

¹⁹ Pasal ho, na-inneipiteu ngailuvin, chule nunbol hih-un.

²⁰Chateho, nangho imalam jouse-a nulepa thun nungun; hichu Pakai lunglam ahi.

²¹ Pateho, nanghon nachate chengu phin lunghang hih-un, ajole lunglhah nan neiget unte.

²² Sohteho, nangho mitvet soh banga mihem lunglhaina hilouvin, lung thengsel le Pathen ging pumin, tahsa lam thudol ijakaija napakai te chengu thun nungun:

²³nabol chanu chu mihem dinga bol tobang hilouvin, Pakai dinga bol bangin lung gilin tah-in bolun;

²⁴Pakaiya kona goulona thilpeh nachan dingu chu heuvin; ajehchu Pakai natong nahiuve.

²⁵ Amavang koi hijongle thil dihlou bola chun athilbol dihlou man chu asan ding ahi: hichea hin maiphavet na aumpoi.