Read Thado Chin Colossia 4 Bible Online

Colossia 4 - Thado Chin bible

Colossia 4

¹ Pakai teho, nanghon jong van'a Pakai khat naneiju chu heuvin lang, nasohteu dihkeicha le hoikeichan bolun.

²Nangho taona-a pangdet jom jingin, thangvah toh thon kiging jingin umun.

³Chujongle ajeh-a henna kaumna Christa thugil hi kaseiphong theina diuva Pathen'in kot eihonpeh nadingun keiho dingin jong neitaokop jingun;

⁴Chutile kaseiding bangtah-a kaphonjal thei ding ahi.

⁵ Chule phat kijenpet chu kichoh unlang, polama um miho lama chun chingtheijin chonun.

⁶Chule mijouse chu iti donbut ding ahi chu nahet theina dingun, nakihounao chu lungset thu beh jinghen, chi altoh bang jinghen.

⁷ Pakaiya sopi deitah chule lhacha tahsan umtah le kasoh hikhompi Tychicus hin kaumchan jouse nangho hetsah naovin nate:

⁸ Kaumchan thu nahetna dinguva, chule ama hin nalungu amonsah theina dinga, hichena dinga chu ama hi naheng uva kahinsol ahi;

⁹ Nangho lah-a khat, tahsan umtah le sopi deitah Onesimus toh kahin solthan ahi. Amanin hikom thu umchan ijakai nahetsah naovinte.

¹⁰ Kasoh chanpi Aristarchus'in salam napeuve, chule Barnabas tupa Mark jongin salam napeuve, (ama chungchang thua thupeh namutaovin; ama naheng uva ahunga ahile analemun;)

¹¹Chule Justus kiti Jesu'n jong salam napeuve, amaho hi cheptanho lah-a kon ahiuve. Hiteho bouhi Pathen gam chalna dinga kakithopi ahiuve; kalung monna amaho hi ahiuve.

¹²Nangho lah-a khat Christa soh Epaphras'in salam napeuve; nangho Pathen lunglam jouse-a bukimle tahsan kichenna napandet theina dinguva, ama nangho dinga taona-a ponpan tah ahi.

¹³Ajeh chu nangho dingle Laodicea chule Hierapolis'a umho dinga ama hi gunchu lheh jeng ahi, ama thudol kahettohsahna hichu ahi.

¹⁴Louthem deitah Luke le Demas'in jong salam napeuve.

¹⁵Laodicea um sopiteho, chule Nymphas le a-in'a kikhom houbung chu salam anapeuvin.

¹⁶Chule nangho koma hiche lekha nasimjou tengule, Laodicea-a um houbung jong anasim sah-un; chutobang chun nanghon jong Laodicea'a kona lekha jong chu anasimun.

¹⁷Chule Archippus jah-a, Nangman Pakaiya namu lhacha natoh chu namolsona dingin chingtheijin, tin ana seijun.

¹⁸Kasalam bohna hiche lekha hi keima Paul'in kakhut tah-a kasut ahi. Nanghon kabulput hi geldoh jingun. Lungsetna-in na-umpiu hen. Amen.