Read Thado Chin 1 Thessalonica 1 Bible Online

1 Thessalonica 1 - Thado Chin bible

1 Thessalonica 1

¹ Paul, Silvanus chule Timothy'n, Pa Pathen le Pakai Jesu Christa-a um Thessalonica houbung mite hengah: i-Pau Pathen le Pakai Jesu Christa-a kon lungsetna le chamna naheng uva umhen.

²Katao chanun nangho kamin phah uvin, nangho nabon chaova dingin Pathen kathangvah jingjiuve;

³Keihon tahsana nathilbolu, ngailutna-a nathohgimu, chule I-Pakaiyu Jesu Christa-a kinepna neija nathohhatnau chu i-Pathen'u le i-Pau anga sumil louhelin kageldoh jingui.

⁴Pathen'a sopi deitahho, lhendoh nahiu chu kaheuvin,

⁵Kathu hilu Kinepna Thupha hi thu keo jenga nahengu hung lhunga hilouvin, thilbol thei thahat le Lhagao Thenga hetna kichentah-a hungjoh ahi, keiho nangho dinga itobang mi kahiu nanghon nahenaove.

⁶ Chule nangho hesoh gentheina nasatah lah-a Lhagao Theng Kipana-a thu chu anasanga, keihole Pakai umchan tho-a nahitaove.

⁷Chutia chu Macedonia le Achaia gama um atahsanho dinga vettoh-a jui dinga uma nahitaove.

⁸Ajeh chu nangho-a kona Macedonia leh Achaia gam sunga Pakai thu chu jaldoh ahi, chule hiche jeng chu hilouvin, Pathen lama natahsan jeu chu gamtinah akithangtan ahi; keiho seisei angaipoi.

⁹Ajeh chu amahotah-in keiho umchan thudol nangho kom kahung lutjeu umchan, chule nangho Pathen hingle dihtah chu hou dinga,

¹⁰chule khonunga hung lhung ding lunghana kona eihuhdoh uva Achapa Jesu, athia kona akaithou chu, van'a kona ahung ding ngah dinga, milim houva kona Pathen lama nakiheijiu chu ahillhangleu ahi.