Read Thado Chin 1 Thessalonica 2 Bible Online

1 Thessalonica 2 - Thado Chin bible

1 Thessalonica 2

¹Chuti chu ahin, sopiteho, naheng uva kahungu chu moh ahipoi, ti nangho tah-in nahenaove;

² Ahin amasanga Philippi khopi-a hesoh genthei kathoh-a chule jachat umtah-a eikibol jenga jong, hichu nahetsao ahi; hangsana no-a Pathen Thupha chu nangho jah-a sei dinga ka Pathen uva hangtah-a kanapan-u ahi.

³Ajeh chu kathu hilu hi suhkhela kon ahipoi, thenlouva kon jong ahipoi, doha-a jong ahipoi:

⁴Ahin Pathen'in aphai tia eitahsan jeh-a thupha vopsah dinga eigot bangtah-a thu kaseiju ahibouve; mihem lunglhaisah louva kalung sungu photoh Pathen lunglhaina kaseiju ahi.

⁵Imatih chana pachat lhem pan lou kahiuve, hichu nanghon naheuve, papset khuna-a jong mangji lou kahiuve, Pathen ahetoh ahi;

⁶Christa solchah kahiu hi, thu neitah hiding kahiuvin, ahivangin nangho nahiuvin, mi dang ahin koimacha-a konin ginle ja kahol pouve.

⁷Nalah uva nunnem tah numei anaonoi pelaijin achate akhoukhah banga,

⁸nangho kakhoto jeh uva Pathen Thupha jeng hilouva, nangho kadeitah-u nahitah jeh uva, keihon kahinna chengu kisana nangho peh ding kalungu ahi.

⁹Ajeh chu, sopiteho, katohgimle kagun chunao nalunguva aumnai; nangho koima chunga pohgih pohsah louna dinga, asun ajana na katoh jiuva najah uva Pathen Thupha kaseijiu ahi.

¹⁰Chule atahsan nangho lah-a thengtah-a, chonphatah-a, themona beija iti kachonum, ahetoh-a nangho nahiuvin, Pathen jong ahi;

¹¹Chule Pathen gama dingle aloupina-a dinga nakou paova dinga lomtah-a nachonna dingu tia apan achate ahil banga,

¹²Keihon jong nangho amichangkima thu kahiluva, katilkhoujiuva, chule kahet tohsahjiu nahiuve, hichu nanghon naheuve.

¹³Chule hiche jeh jong hin tang louhelin Pathen kathangvah jingui, nanghon keiho-a kona thu, Pathen thu najah uva chu, mihem thu ahi tia hilouva, Pathen thu tia nalah-u ahibouve; hichu tahmong ahi, chujongle hiche chun atahsan nangho lah-a na atonge.

¹⁴ Ajeh chu, sopiteho, nangho Juda gama Christa-a um Pathen houbung ho umchan joma nahitaove; amahon Juda miho-a kona athoh banguva nanghon jong nagam miteuva kona chuto bangma chu nathoh-u ahitai:

¹⁵ Amaho chun Pakai Jesu jong athemgaohou jong athaova, chule keiho jong einomangu ahin, Pathen alunglhaisah louvu ahi, chule mi jousetoh kilekal ahiuve:

¹⁶Amahon keiho chidang namdangho huhhing-a aumna dinguva, thu kaseipeh dingu eikhamui; achonsetnao bukip molso jing ahiuve; ahinla lunghan khonna achunguvah achunai.

¹⁷Ahin, sopiteho, lunga hilouva tahsa lama nang hotoh kikhena kaum tahdi jeh hin, kangai lutnun namaiju mu ding kaki habol chehjin ahi.

¹⁸Hichena ding chun, keiho ahideh chu keima, Paul, khatvei, nivei nangho heng lama hung ding kakigot ahitai, ahin Satan'in eisumojin ahi.

¹⁹Ajehchu I-Pakaiyu Jesu ahung tengle a-angsunga kakinepnao, ahiloule kakipanao, ahiloule loupina lallukhuh chu ipi hiding ham? nangho nahi lou uham?

²⁰Ijeh inem itile tahbeh-in kaloupinaole kakipana dingu nangho nahiuve.