Read Thado Chin 1 Thessalonica 5 Bible Online

1 Thessalonica 5 - Thado Chin bible

1 Thessalonica 5

¹Ahivangin, sopiteho, hiche chu anikhole aphat thudol naheng uva hinsut ding angaipoi;

² Ajeh chu jana gucha ahung banga, Pakai nikho chu hung ding ahi, hichu nanghon kichenin naheuve.

³Mihon, Chamnale lungmon, chule bitna aume, tia asei laitah-ule, numei naoso nat banga, phulou helouva manthah na chu achunguva hung chu phung jeng ding ahi; hitia chu amaho chu iti nama jongle sohcha louding ahiuve.

⁴Ahivangin, sopiteho, gucha banga hiche nikho chu nachung uva ahung lhun ding chu, nangho muthima uma nahipouve;

⁵Nangho nabonchaovin khovahle sunlai chate nahiuve; eiho janle muthim mi ihipouve.

⁶Hiche jeh chun, sopiteho, midangho banga imu louvin, limgehchan kihongpha jingin umu hite.

⁷A-imuho khu janlebou imujia ahiuve; chule jukhamho jong janlebou akhamjiuve.

⁸ Eiho vang sunlai chate ihi jeh-un, tahsan leh ngailut ompho kivon thou hite, chule huhhinga um kinepna chu lukhuh-a neijin limgehchan hah jingin umu hite.

⁹Ajeh chu eiho lungsat chuhna dinga hilouva, I-Pakaiyu Jesu Christa vanga huhhing chu ichan theina dinguva, Pathen'in eipansah-u ahi;

¹⁰Eiho hah jing jongleu hen imu jongleu hen, Christa toh ihinkhomna dinguva, ama eiho dinga thia ahitai.

¹¹Hijeh chun nabol bangu chun khatle khat kitilkhou touvin, kisadohton umun.

¹²Sopiteho, naheng uva kahung tao ahi, nalah uva natong gima, chule pakaiya nachung uva kitunga nangho natilkhou ho chu heuvin.

¹³Amaho chu anatoh jal-u chun ngailutna-in hajan jabolun. Nangho kitohdel chehchan umun.

¹⁴Chule, sopiteho, kahintil nahiuve, angai dol louva chonho chu phohsalun, hilchah-un, alung doija tilkhou vun, ahatmo athadoi huvin lang, mijouse koma kido hatnun.

¹⁵Chingtheijun, koiman setna chu setnan thuh hihhen; ahin khatle khat chule mijouse phatna ding bolnan kihabol cheh-un.

¹⁶Kipah thanom jingun;

¹⁷tantih neilouvin taojingun;

¹⁸imajousea thangvah jingin umun; hichu Jesu Christa-a nangho chunga Pathen lunglam ahi.

¹⁹Lhagao Theng chu sumit hih-un.

²⁰Lhagao thu seidoh ho chu musit hih-un.

²¹Imalam jouse patep cheh-unlang apha chu tuhdet jingun:

²²aphalou jouse-a konin kikhin mangun.

²³Chule cham kona Pathen'in nangho kimkeijin thensah-un; chule I-Pakaiyu Jesu Christa hung tengle nangho chengse lhagao, nahinnao chule natahsao themona beijin koihen.

²⁴Nangho nakoupao chu tahsan umtah ahi, ama chun hichu bolpeh naovin nate.

²⁵Sopiteho, keiho dingin neitao peh-un.

²⁶Kibengchop thengin sopite jouse salam-un.

²⁷Keiman nangho Pakaiya kahahsela hiche thuhi kapeh nahiuve, hiche lekha hi sopithengte jouse angah anasimun.

²⁸I-Pakaiyu Jesu Christa milungsetnan umpiuvin, amen.