Read Thado Chin Joshua 1 Bible Online

Joshua 1 - Thado Chin bible

Joshua 1

¹Pakai soh Mosi athijouvin ahitin ahi, Mosi lhacha Nun chapa Joshua henga Pakaiyin hitin ati.

²Kasoh Mosi athitan, hijeh chun tun kipat in, nangmale hiche mipi jouse, amaho Israel chate dinga kapeh gam jondingin hiche Jordan hi galkaijun lang cheovin.

³ Mosi henga kana seibangin, nakengton achotphana chanchu nang kapeh nahitai.

⁴Gamthiple hiche Lebanon apat Euphrates vadunglen, Hit mite gamjouse chuleh nilhum lama twikhanglen gei nangma gamsung hiding ahi.

⁵ Nahinlai sungse-a koimacha namasanga ding joulou ding, Mosi kana umpi banga nangma jong kaumpi ding nahin, nangma nadalha pongting, nujong nanuse ponge.

⁶ Hatninlang hangsanin, ajehchu apateu pehdinga kana kihahsel gam chu alodiuva hiche mitehohi nahoppeh ding ahi.

⁷Kasoh Mosi juidinga kapeh dan jouse nabola nachintup theina dingin, nangma hatpou pouvin lang hangtah-in umin. Nachena channa naphattheina dingin, chua kon chun jet le veija kihei mang loujenin.

⁸Hiche danthupeh buhi nakamtoh kikhenkah hih hen, amavang asunga kisunho dungjuija nabola nachintup theina dingin sunle jan-in lunggiltah-in ngaiton. Chutile nalampi lamjangpeh a nalolhinsah ding ahi.

⁹Keiman nangma kanathupeh hilouham? hatninlang hangin, kicha hih-in, lungjong lungthoi hih-in. Ajehchu Pakai na Pathen'in nachena chana naumpi jinge.

¹⁰Chuin Joshua chun mipi vaipoho jouse chu thu apen aseije,

¹¹Gebuh lailunga cheovinlang mipi jah-a nehlechah kigot tupmun, ajehchu Pakai na Pathen'in lodinga napeh-u gamchu che-a galodinga, nithum sunga hiche Jordan hi nagalkai dingu ahi, tin mipi thu gapeuvin, ati.

¹² Chule Reuben mite, Gad mite chule Manasseh phung akehkhat ho henga Joshua'n hitin aseijin,

¹³Pakai na Pathen'un nakicholdo sah un, chule hiche gamhi napetaove, tia Pakai lhacha Mosi'n nangho henga napeh-u thuchu geldoh un.

¹⁴Na-inneipiteu, nachasenhou chule nagancha hou Mosi'n napehnao Jordan gal hilama umden hen. Ahinla manchah choi miho galhangho jouse, masanga anacheuva, amaho na kithopi diu,

¹⁵nangho napeh banga Pakaiyin nasopi hou akicholdosah masangse-a, chule Pakai na Pathen'in amaho apeh-u gamchu alo masangseuva naki thopi diu ahi. Chujoule Jordan solama umna gam nalo diuva Pakai soh Mosi'n napeh-u gama chu nakile uva nalodiu ahi.

¹⁶Chuin amahon neithupeh jouseu chu bolungting neisolnao channa cheovinge tin Joshua adonbutnun ahi.

¹⁷Imajousea Mosi thu kanangai bangun nangma thujong lunglut tah-in ngai uvinge, Pakai Pathen'in Mosi aumpi bangin nangma jong naumpi teihen atiuve.

¹⁸Nathupeh douva chule nathupeh ngailou koi hijongle kithat ding ahi, hang pou pouvin lang hattah-in umin, atiuve.