Read Thado Chin Joshua 10 Bible Online

Joshua 10 - Thado Chin bible

Joshua 10

¹Tun ahitin ahi, Jerusalem [1] lengpa Adonizedek'in Joshua'n Ai kho alah a asuhmanghela Jericho khopi le alengpa asuhmang banga Ai khole alengpa abol chule Gibeon'a chenghon Israel toh kichamna asemuva alah uva aum ajah phatchun,

²Akichalheh jengun, ajehchu Gibeon hi lengte khopiho khat banga khopi lenkhat ahin, hichu Ai kho sangin jong alenjon asunga chengjouse hattah ahiuve.

³Hijeh chun Jerusalem lengpa Adonizedek chun Hebron lengpa Hoham le Jarmuth lengpa Piram chule Lachish lengpa Japhia chule Eglon lengpa Debir henga mi asolin,

⁴Hungun lang eihung kithopiuvin, Gibeon sumangu hite. Ajehchu Joshua le Israel chatetoh kichamna asemtaove, ati.

⁵Hijeh chun, Amor te leng ngaho: Jerusalem leng, Hebron leng, Jarmuth leng, Lachish leng chule Eglon leng akikhom khomun, amahole asepai janel jouse akontouvun, Gibeon koma gebuh asemun, akisatpi taove.

⁶Chuin Gibeon mihochun Gilgal gebuh-a Joshua henga mi asolun, nasohte-a dingin nakhut lhang thase hih-in. Kahenguva hungtou loijinglang nei hung kithopiuvin, neihuhhing jengun ati. Ajehchu thinglhanga cheng Amor te lengho jouse keiho doudin akikhom taove.

⁷Chutichun Joshua Gilgal'a konchun amale agalsatmi jouse, mihat mihangho jouse chu akontou taovin ahi.

⁸Chuin Pakaiyin Joshua henga amaho chu kicha hihbeh-in, amaho chu nakhutna kapehdoh nahitai, namasanga miho khatcha dingjou louding ahi, ati.

⁹Hijeh chun hetman louvin Joshua Gilgal'a konin ahenguva jankhovah in achetouvin, ahi.

¹⁰Chuin Pakaiyin amaho chu Israelte masanga chun amaimoh sah-in, chule Gibeon'a chun mitamtah athatnun ahi. Bethhoron jottouna lampi lhungkeijin adeltaovin, Azekah le Makkedah geijin agathatnun ahi.

¹¹Chuin ahitin ahi, Israelte masanga ajammuva Beth-horon lama achesuh petnun, Pakaiyin Azekah geijin van'a konin achunguva gel len tahtah alhahsah in athiuvin ahi. Israel chaten chemjam'a atha sangun gel selih chu atamjon ahi.

¹²Chujouvin Pakaiyin Amor mite chu Israelte khutna apehdoh nichun Joshua'n Pakai jah-a, hitin aseijin, Israel chate mitmun; Nisa nangma Gibeon chunga dingdenin, chule lha jong Aijalon damjola dingdenin, ati.

¹³ Chuin mipi chun amelmateu chunga phu alahjou masang seochun nisa chu adingden tan, chule lhajong chu aumden tai, hiche hi Jasher lekhabua kisuna hilouham? Hitichun vantham jola nisa ading denin, nikhat lhumkei tobang lhumvah louvin aumin ahi.

¹⁴Chule chuche masang ahiloule chuche nungin jong chutabong nikho, Pakaiyin mihem khat aw angaipehna aumkhapoi. Ajehchu Pakaiyin Israelte dinga gal anasat ahi.

¹⁵Chuin Joshua le aumkhompi Israel jouse Gilgal gebuh a akilekit taove.

¹⁶Ahin chuche leng ngaho chu ajamun Makkedah songkoa akisel taove.

¹⁷Chuin Joshua henga hiche leng ngaho chu Mekkedah songko khatna akiseluve, tin ahungseipeh taove.

¹⁸Chuin Joshua'n songko kotna chun song len tahtah tanglut unlang amaho ngahtup din mi koijun ati.

¹⁹Chule nangho umden louvin, nagalmiteo nungdelun, chule amaho lah-a anungthop ho geijin thatnun amaho akhopi houva lutsah hih-un. Ajehchu Pakai na Pathen'in amaho chu nakhut uva apehdoh ahitai, ati.

²⁰Chuin ahitin ahi, Joshua le Israel chaten amaho chu asuhmanghel nadiuvin hathan athatnun, amoh chengchu kul kikai khum khopiho-a chun aluttaovin ahi.

²¹Chuin mijouse chu Mekkedah gebuh a Joshua henga lung mongtah-in akileuvin ahi. Koiman Israel chate chung kitimong monga akam akeh tapouve.

²²Hiche jouchun Joshua'n songkotkhah chu hongunlang leng ngaho chu kahenga hinpuijun, atin ahi.

²³Chuin chutichun abolun songkoa konchun leng ngaho Jerusalem lengpa, Hebron lengpa, Jarmuth lengpa, Lachish lengpa chule Eglon lengpa chu ahenga ahinpui taove.

²⁴Chuin ahitin ahi, hiche lengho chu Joshua henga ahinpui phatnun, Joshua'n Israel mipi jouse chu akouvin, amatoh kilhon galmi lamkaiho jouse jah-achun hung naijun lang hiche lengho ngong nakengun chonun ati. Chuin amaho ahung naijun amaho ngong chu akenguva achon taove.

²⁵Chuin Joshua'n ajah uva, kicha hih-un, lungjong lunglha hih-un, hatnunlang hangsan uvin ati. Ajehchu Pakaiyin nakisatpiu namelma teu jouse chu hitia chu abolding ahi, ati.

²⁶Chule hiche jouchun Joshua'n amahochu asatnin, athatnin thingphung nga chunga akhaijin ahi. Chule amahochu thingchunga nilhah geijin akhaijun ahi.

²⁷Chuin nilhum dingkonin ahitin ahi, Joshua'n thu apen, amahochu thingleh-a konchun alalhauvin, akiselnao songkoa chun alehlutnun ahi. Songho chu song lenpipin asingun, hichu tunigeijin jong aumnalaije.

²⁸Chuin chuche nichun Joshua'n Makkedah chu alan, hichu chemjamin asumangin, mihing jouse asugamhelin khatcha jong ahinghoipoi. Chule Jericho lengpa chunga anabol bangchun Makkedah lengpa chunga jong aboltai.

²⁹Chujouvin Joshua'n aumpi Israel chate jousetoh Makkedah'a patnin Libnah lama acheuvin, Libnah chu asat taove.

³⁰Chuin Pakaiyin Libnah le alengpa chu Israelte khutna apedoh-in, asunga cheng miho jouse chemjamin athat gamin, khatcha jong ahinghoipoi. Chutichun Jericho lengpa abolna bang chun chuche lengpa jong chu aboltan ahi.

³¹Chuin Joshua'n Libnah'a konin aumpi Israel jousetoh Lachish'a acheuvin, chuin gebuh asongun asattaove.

³²Chuin Pakaiyin Lachish chu Israelte khutna apedoh-in, hichu nini channin alan ahi. Libnah anabolna jouse bangchun akhopile asunga cheng mihing jouse chu chemjamin asumangtai.

³³Chujouchun Gezer leng Horam chu Lachish kithopi dingchun ahung touvin ahile, Joshua'n amale amite chu khatcha khen neilou helin athatgamtai.

³⁴Chuin Lachish'a konin aumpi Israel jousetoh Joshua chu Eglon'a acheuvin, gebuh asongun asat taove.

³⁵Chuin chuche nichun amahon alauvin, chule asunga mihing umjouse chu chemjamin asatnun, hiche nikho mama chun Lachish abolna bangun athatgam heltai.

³⁶Chuin Joshua chu aumpi Israel jousetoh Eglon'a konin acheuvin Hebron ho chu asat taove.

³⁷Chule amahon hichu alauvin, Eglon anabolna jouse bang chun, Hebron le alengpa aumpi jousele, asunga cheng mihing jouse chu chemjamin athatgam heltan ahi.

³⁸Chuin aumpi Israel jousetoh Joshua Debir lama acheuvin, asatnun,

³⁹Aman Debir le alengpa chule khopi jouse chu alan, chule amahon amahochu chemjamin asatnun, asunga cheng mihing jouse chu athatnun, khatcha ahinghoi pouve. Hebron abolna bangle Libnah le alengpa abolna bangchun Debir le alengpa jongchu aboltan ahi.

⁴⁰Hitichun Joshua'n lhanglam gam hihen agam pumpin, sim gamho phaigam chule twiputna chana lengte jouse chu asugam sohkeijin, Pakai Israel Pathen thupeh bangin khatcha khenlouvin, ahaithei jouse athat gamheltan ahi.

⁴¹Chule Joshua'n Kadesh-barne'a pat Gazah channin, Goshen gam jouse toh Gibeon channin asumang heltan ahi.

⁴²Pakai Israel Pathen'in Israel dinga gal asat jeh-in, Joshua'n hiche lenghole agam jouseu chu khatvei lah-in alatai.

⁴³Chuin Joshua aumpi Israel jousetoh Gilgal gebuh-a chun ahung kilekit taove.