Read Thado Chin Joshua 11 Bible Online

Joshua 11 - Thado Chin bible

Joshua 11

¹Chuin ahitin ahi, Hezor lengpa Jabin'in hicheho chu ajah phatnin, Madon lengpa Jobab, Shimrom lengpa chule Achshaph henga,

²chule sahlang thinglhang gamle Chinnereth lhanglam phaichamle dam chule lhumlam Dor gamgi-a cheng lengho henga,

³chule solamle lhumlama Kanaan mi, Amor mi, Hit mi, Perizz mi chule thinglhanga um Jebus mi chule Mizpeh gam Hermon noilam Hiv mite henga mi asoltan ahi.

⁴Chule asepai jouseu toh mitampi atama tam, atam dannu chu luikama nel simsenlou jatjen sakol kangtalai tamtah toh akondoh taove.

⁵Chuin hiche lengho jouse chu akisuhkhom phatnun Israel doudingin Merom twipanga gebuh asongkhom taove.

⁶Chuin Pakaiyin Joshua henga, amaho jehchun kicha hih-in, ajehchu jing nikho tuphat donle amaho Israel masanga thagam dinga kapehdoh ding nahi. Nangman asakolu aja nabana akangtalaihou meija nahalvam ding ahi, ati.

⁷Hijeh chun Joshua'n agalsat miho jousetoh amaho satdingin phulou helouvin Merom twilah-a chun ahungun, amaho chu anokhom taove.

⁸Chuin Pakaiyin amahochu Israelte khutna apedoh-in, amahon amaho chu athatnun Zidon gei, Misrephoth-maim gei chule solam Mizpeh phaicham geijin adelun, khatcha khenlou helin athat gamtaove.

⁹Chule Pakai thupeh bangchun Joshua'n amaho chunga abolin, asakolhou ja abanin, asakol kangtalai hou meijin ahalvamtan ahi.

¹⁰Chuin Joshua hichepet chun akinunglen, Hazor chu alan, alengpa chu chemjamin athat tai. Ajehchu chuche masang chun Hazor chu chuche lenggam jouse chunga alenpen anahi.

¹¹Chuin chuche sunga um mihing jouse chu chemjamin athatnun, amaho chu asugam helun, khatcha ahinghoi pouve. Chule aman Hazor chu meijin ahal lhatai.

¹²Chuin chugama lengho khopi jousele alengteu jouse chu Joshua'n amanin chemjamin athat tai. Chule Pakai soh Mosi'n athupeh bangin amaho chu asumang heltai.

¹³Ahinla Joshua'n anahallhah Hazor seh tilouvin molvum'a dingjing khopiho chu Israel ten khatcha anahal lhapouve.

¹⁴Chuin chuche khopiho-a thilkichom jousele ganchaho chu Israel chaten galla kichom thilin akilah-un ahi. Ahivangin amahon amitakip asuhmang tokahseovin chemjamin athatnun khatcha jong ahinghoi pouve.

¹⁵Pakaiyin asoh Mosi henga thu anapeh bangin Mosi'n Joshua koma thu anapen, chutobangma chun Joshua'n abolin Pakaiyin Mosi thu anapeh jouse chu bolouva akhen khatcha aumpoi.

¹⁶Chutichun Joshua'n chuche gam jouse thinglhang gamho, lhanglam gamkai jousele Goshen gam jouse, phaichamle phaitong jouse chule Israel molle chuche molsanga damjol jouse alan,

¹⁷Seir lhang geija kikhotou Halak molsanga pat Hermon mol noilam Lebanon phaichama um Baalgad chan geijin alahpeh-in, alengho jouse amanin asatnin athatgamtan, ahi.

¹⁸Joshua'n chuche lengho chu phat sottah anakidoupin, ahi.

¹⁹Gibeon'a cheng Hiv miteho tailou Israel chate toh kichamna sema khopi khatcha jong aumpoi. Adang jouse galla chu alah ngenchangu ahi.

²⁰ Ajehchu Pakaiyin Mosi anathupeh bangin aman amahochu lungsetna beihela asuhmanghel theina dinga, amahon Israel ahung kidoupina dinguva alungu kitahsah chu Pakaiya kon ahi.

²¹Chuin chuphat chun Joshua ahungin molsang ho-a konchun Hebron, Debir le Anaba konin Judah molsangho jouse-a konle Israel moljouse-a konin Anakim te chu athatnin, Joshua'n amaho chu akhopihou pumin asumang heltan, ahi.

²²Israelte gamsunga chun Anakim te khatcha thalouva kihinghoi aumtapoi. Gaza, Gath, chule Ashdod nabou aumtaove.

²³Chutichun Pakaiyin Mosi henga anasei jouse dungjuijin Joshua'n gampumpi chu alan ahi. Chuin Joshua'n amaho aphungu kikhen dungjuijin hichu alodiuvin Israelte apetan ahi. Chule agamchu galla konin akicholdotai.