Read Thado Chin Joshua 13 Bible Online

Joshua 13 - Thado Chin bible

Joshua 13

¹Tun Joshua chu ateh-in, akumjong atamlheh tan, chule Pakaiyin ajah-a nangla natehkem tan, nakum atamlhehtan, gamtamtah lahding aumnalaijin ahi, ati.

²Lahmoh chu hiche gamhohi ahi. Philistine le Geshur gamgichin jouse,

³Egypt masanga um Shihora pat sahlam Kanaan mihon atouphao Ekron gamgidung geija umho, Philistine te leng ngaho, Gazeth te Ashdod te, Eshkalon ho, Gitt ho, Ekron ho chule Avi te jong ahiuve,

⁴Lhanglama Kanaan miho gam jouse chule Sidon miho koma um Meareh apat Aphek lama Amor miho gamgi changei,

⁵chule Gibli miho gamle Lebanon pumpi, nisolam sanga, Hermon lhangnoija Baal-gad'apat Hamath lutna changei ahi.

⁶ Lebanon'apat Misrephoth-maim changei, thinglhang gam cheng jousele amaho chu Israel chate masanga kona kadeldoh ding ahi. Sidon miho jouse, nangma kathupeh bangchun vangvet na-a konin Israel chate henga achenna diuvin ahoppeh poupouvin ahi.

⁷Hijeh chun tun hiche gamhi phung ko hole Manasseh phung kehkhat ho henga agoulo diuvin hoppeh-in ati.

⁸ Amaho chutoh Reuben te le Gad te chun Jordan sahlama achan dinguva Mosi'n anapeh chu anakisan taovin, Pakai soh Mosi amatah-in anapeh bang ngeichu ahi.

⁹Arnon vapidung panga um, Aroer le vadung lailunga um khopi medeba phaicham jouse-a pat Dibon changei,

¹⁰chule Heshbon'a lengchang Sihon, Amor mite lengpa khopi jouse Ammon chate gamgi gei,

¹¹chule Gilead le Geshur mite chule Maachath'te gamgisungho leh Hermon lhang pumpi chule Bashan pumpi Salcah changei,

¹²Milen mihat amoh umnalai, Ashtaroth le Edrei leng Bashan na Og lenggam jouse, hicheho jeh-a hi Mosi'n amaho ana douva anadeldoh ahi.

¹³Ahijeng vangin Israel chatehon anadeldoh pouve. Geshur mite ahilou jongle Maachath mite, Geshur mitele Maachath mitechu tuni geijin Israelte lah-a acheng nalai juve.

¹⁴ Aman amaho koma ana seibang chun, Levi phunga miho vangchu chenna ding gam ana kipepoi. Israel Pakai Pathen'a dinga meija kigou ganlhainaho bouchu amaho gou ahi.

¹⁵Chule Mosi'n Reuben chateho chu a-insungu dungjui cheh in chenna ding gam anapei.

¹⁶Chule amaho gamding chu Arnon luipanga um Aroer'apat chule alailunga um khopilen Medeba phaicham jouse jong ahi.

¹⁷Heshbon chule phaichama um akhopilen hochu Dibon le Bamoth-baal chule Beth-baal-meon,

¹⁸chule Jahezah le Kedemoth chule Mephaath,

¹⁹chule damjolla um lhang chunga Kirjathaim le Sibnah chule Zareth-shahar,

²⁰chule Beth-peor le Ashdoth-pisgah chule Beth-jeshimoth,

²¹chule phaichama um khopilen jouse Heshbonna leng Amor mite lengpa Sihon lenggam jouse Mosi'n Midia ho leng chapa jousetoh anathakhom, Evi, Rekan, Zur chule Reba chuche gama cheng Sihon leng noidouho chu ahiuve.

²²Beor chapa Balaam doithempa jong chu Israel chaten midang atha nalah uva chun chemjamin anatha thaovin ahi.

²³Reuben chateho gamgi chu Jordan le anaivelse chu ahi. Hiche khopihole khohohi Reuben chate a-insungu dungjuija achenna dinguva alou gam chu ahi.

²⁴Chule Mosi'n Gad phunga Gad chateho ngeichu, a-insungu dungjuijin achenna dingu gam anapen, ahi.

²⁵Chule agamsunga chu Jazer le Gilead khopilenho jouse, Ammon chateho gam akehkhat Aroer geile masanga Rabbah changei ahi.

²⁶Chule Heshbon'a pat Ramath-mizpeh le Betonim chule Mahanaim apat Dabir gamgi gei ahi.

²⁷Chule damjol Beth-aram, Beth-nimrah, Succoth chule Zephon, Heshbon lengpa Sihon lenggam sunga amoh jouse Jordan le agamsung, Chinnereth twikhanglen pamchin geija gal langkhat Jordan solam chan ahi.

²⁸Hichehi Gad chate a-insung dungjuija agoulo dinguva kigotpeh khopilen hole akhoneoho chu ahi.

²⁹Chuin Mosi'n Manasseh phung kehkhat chu alodiu gam anapei. Chule hichehi Manasseh chate phung kehkhatnin a-insungu dungjui cheh a analo chu ahi.

³⁰Chule hiche Mahanaim apat, Bashan pumpi gamsung Bashan leng Og gam jousele Bashan gama Jair khopi jousetoh, hichu khopilen somgup ahi.

³¹Chule Gilead gam kehkhat le Ashtaroth chule Edrei Bashan Og lenggam khopi lenho Manasseh chapa Machir chateho-a ahin, Machir chatedia a-insungu dungjui cheh a kigotpeh ahi.

³²Hichehohi Moab phaicham ho-a, Jordan gal langkhatna Jericho solam sanga Mosi'n achenna diuva ana hoppeh gamho chu ahi.

³³ Ahinla Mosi'n Levi phung chu goulo gam khatcha anapepoi. Ahenguva ana seibangin, Israel Pakai Pathen chu agoulou ahijenge.