Read Thado Chin Joshua 16 Bible Online

Joshua 16 - Thado Chin bible

Joshua 16

¹Chule Joseph chate vang chuhna chu, Jericho koma Jordan'a pat solama Jericho twi umnagei, Jericho a kipatna gamthip geija kikhotou Bethel mol pumpi chu ahi.

²Chule Bethel'a pat Luz geija akikhodoh in, Archi gamsung Ataroth geijin akikhopeh in, ahi.

³Chule lhumlam panga Japhleti mite gamgi Beth-horon lhang nemjo gamsung Gezer channin akikhosuh in, hichu twikhanglen'a alutnin ahi.

⁴Hitichun Joseph chate Manasseh le Ephraim'in agam chu alotaove.

⁵Chule a-insungu dungjuijin Ephraim chate gamgi chu hitihi ahi. Solam sanga agoulou gamgi Ataroth-addar a pat Beth-horon sahlam gei ahi.

⁶Chule gamgi chu twikhanglen sahlam sanga Michmethah geijin akikhodoh-in, chule solama Taanath-shiloh geijin ahung kikhodoh-in, hichu ajotpeh-in, solama Janoah chan akikho lhungpeh-in ahi.

⁷Chuin hiche Janohah'a pat Ataroth le Naarah changei akikhosuh-in, Jericho ahopan chule Jordan'a akikholutne.

⁸Gampumpi chu Tappuah konin lhumlam sanga Kanah vapidung geijin akilhungdoh-in, hichu twikhanglen'a akikholutne. Hichehi Ephraim chate phung a-insung dungjuijuva agoulou gamchu ahi.

⁹Chule Manasseh chate goulah-a Ephraim chate goulo ding khopilen kikhendohho chu akhopilen jouseule akhodang dangho chu ahi.

¹⁰ Chule amahon Gezer'a cheng Kanaan miho chu ananodoh pouve. Hijeh chun Kanaan miho chu Ephraim mite lah-a tuni geijin achengun kai apeovin, ajenun ahi.