Read Thado Chin Joshua 17 Bible Online

Joshua 17 - Thado Chin bible

Joshua 17

¹Manasseh phung dingin chan khat ana umin ahi, ajehchu ama Joseph cha masapen ahi. Gilead pa Manasseh chapa masapen Machir chu ahi. Hijeh chun ama galhat ahijeh-in Gilead le Bashan gama achenge, ajehchu amaho gal hat ahi.

²A-insungu dungjuija Manasseh chilhah dangho Abiezer chate, Helek chate, Asriel chate, Shechem chate, Hepher chate chule Shemida chate dingin jong chan khat anaume. Amahohi a-insungu dungjuija Joseph chapa Manasseh chapate ahiuve.

³Ahinla Manasseh chapa Machir, Machir chapa Gilead chapa Hepher, Hepher chapa Zelophehad'in achanute tilou chapa aneipon, achanuteu minho chu Mahlah, Noah, Hoglah, Milkah le Tirzah ahi.

⁴ Chuin amahon Eliazer thempu, Nun chapa Joshua chule pipuiho ang ahin naijun kasopihou lah-a goulo eipehna dingun Pakaiyin Mosi thu anapeh ahi, agatiuve. Hijeh chun Pakai thupeh dungjuijin Joshua'n apateo sopiho lah-a agoulo dingu anapetan ahi.

⁵Hitichun Jordan gal langkhatna um Gilead le Bashan tilouvin Manasseh chu chan som achange.

⁶Ajehchu Manasseh chanuten achapate lah-a gou alo khomun, chule Manasseh chapa dangho chu Gilead achang taove.

⁷Manasseh gamchu Ashera pat Michmethah changei ahin, Shechem masanga um agamgi chu lhanglam En-tappuah mite chenna gam geijin akikhosuh-in ahi.

⁸Tun Tappuah gam Manasseh achangin, ahinla Manasseh gamgi chinna um Tappuah kho chu Ephraim chate-a ahi.

⁹Chuin agamgi chu Kanah vapidung lhanglama chun akilhungsuh-in, hiche Ephriam khopiho chu Manasseh khopiho lah-a aumin, chule Manasseh gamgi ngahna jongchu vapidung sahlam pang ahin, chule twikhanglen changei ahi.

¹⁰Lhanglam sang chu Ephraim ahin, sahlam gam chu Manasseh'a ahin, chule twikhanglen chu agamgi ahi. Chule sahlama Asher chule niso lama Issachar gamchan chu ahi.

¹¹Chule Manasseh chu Issachar le Asher gama Beth-shean le akhopiho, Ibleam le akhopiho Dor'a chenghole akhopiho, Endorra chenghole akhopiho, Taanach a chenghole akhopiho, Negiddo'a chenghole akhopiho, agamhou thum geijin achangin ahi.

¹² Ahijeng vangin Manasseh chapate chun chuche khopi lenho-a chengho chu anodoh joupouve. Hitichun Kanaan mite chu hiche gama chun achengden taove.

¹³Ahijeng vangin ahitin ahi. Israel chate chu ahung hatdoh phatnun, amahon Kanaan mite chu kai apehsah-un, ahinla agama konin anodoh theng theipouve.

¹⁴Chuin Joseph chaten Joshua jah-a, tunigeija Pakaiyin phatthei eiboh jeh uva mipi hijatpi kahiu henasa-a ibola kalodiu vang khat, chan khatsehbou neipeh uham, atiuve.

¹⁵Chuin Joshua'n amaho chu adonbutnin, nangho natamlheh uva Ephraim lhanga chu natehbehseh tah uva ahile, Perizz mitele milen mihat ho gamsunga gammang lama nangho chetouvun lang gakituhchai taovin, ati.

¹⁶Chuin Joseph chate chun thinglhang gamchu keiho-a dingin alhingpoi. Jangcham gama cheng Kanaan mite jousele Bethshean le khopiho chengse chule Jezreel damjola chenghon thih kangtalai anei cheh uve atiuve.

¹⁷Chuin Joshua'n Joseph insung mite Ephraim le Manasseh henga, nangho mitamle thahat tahte nahiuvin chankhat sehbou chang pouvin nate,

¹⁸ahinla molsang hi nangho ding ahi, gammang ahijeh-in kivatchaijun lang, agamgijui chan chu nangho ding ahi. Kanaan mite chun thih kangtalai neijuhen hatlheh jongleu nanodoh dingu ahi tin aseipeh-e.