Read Thado Chin Joshua 18 Bible Online

Joshua 18 - Thado Chin bible

Joshua 18

¹Chuin Israel chate kikhom pumpi chu Shiloh a akikhom khomun, chua chun houkhom ho houbuh atungdoh-un ahi. Chule amasanguva gamchu athunoijuva aumtai.

²Chule Israel chate lah-a agou chanding muloulai phung sagi aum nalaijun ahi.

³Chuin Joshua'n Israel chate jah-a, Pakai napateu Pathen'in napeh-u gam galo ding chu itihchan nahsah louva na-umsahdiu ham?

⁴Nalah uva phungkhat cheh-a konin mi thum lhengdoh-un, chule keiman amaho kasola amaho kipat uva gamchu agachotnuva, alodiu dungjuija agasuh chetnuva kahenga hungkilekit dingu ahiuve.

⁵Chule amahon hichu hop sagi-a ahopdiu, Judah lhanglam gamsunga umding, Joseph insungin sahlam gamsung alodiu ahi.

⁶Hitichun gam umchan chu hopsagi-a photchetna nanei uva, Pakai i-Pathen'u anga nangho dinga vang kavetpeh theina dinga hiche photchetna chu kahenga nahin lhut dingu ahi.

⁷Ahinla Levi miten nalah uva chan aneipouve, ajehchu Pakai thempu natoh chu amaho chan ahijenge. Chule Gad le Reuben chule Manasseh phung kehkhat vang chun Pakai lhacha Mosi'n apehnao gam Jordan gal solam chu alodiu ahi.

⁸Chuin mihochu akipat doh-un, achetauve ahi. Gam phochenna cheho chu Joshua'n thu apen, cheovin, gamchu gachonun, gapho chenun lang hiche Shiloh-a hi nangho dinga Pakai anga vang kavet theina dingin kahenga hung kile kitnun, ati.

⁹Chuin mihochu acheuvin, gamchu agachon sohkeijun, khopilen hochu lekhabua asunlutnun, mun sagin akhenun ahi. Chule Shiloh lama chun alhonpiuvin Joshua henga ahungkile kitnun ahi.

¹⁰Chuin Joshua'n Shiloh-a Pakai masanga amaho dingin vang asantan ahi. Chule chuachun Joshua'n gamchu Israel chate kihop khen dungjuijin ahoppehtan ahi.

¹¹Chule Benjamin phung chilhah ho chan chu a-insung dungjuijin ahungdohtan, achandiu gamsung Judah chatele Joseph chate gam kikah chu ahung hikhatan ahi.

¹²Chule Sahlama agamgiu chu Jordan'a pat sahlam sanga Jericho lhang panga akikho touvin, Lhumlam molla chun akikho lutnin, Beth-aven gamthipma akilhung lutnin ahi.

¹³Chule gamgi chu chu-a konchun Luz lam, lhanglama Luz kiti Bethel lhang panga akikhon, hichu Beth-horon noilam lhanglam sanga Ataroth-adar lama achesuh-in,

¹⁴chuin agamgi chu chua konin akikhon Beth-horon toh akigalsai lhanglam sanga um molsanga pat twipilen ning chu lhum-lhanglam sanga akikho kimvelin, Judah chate khopi khat Kirjath-baal, Kirjath-jearim kiti chu ahi. Hichu nilhumlama agamgiu chu ahi.

¹⁵Chule lhanglama agammu chu Kirjath-kearim monga kipat in agamgiu chu lhumlama akikhon Nephtoah twikulho-a akikholutnin ahi.

¹⁶Chule agamgiu chu sahlama milen mihat ho damjola um Hinnom chapa jangcham masanga um molsanga akikho doh-in, lhanglam Jebus lhangpang Hinnom gom geijin akikhon Enrogel'a akikholutne.

¹⁷Chule sahlama konin akikho kimvelin, Enshemesh-a akilhung lutnin, Adummin gam kentoh kigalsai Gelioth lama akilhungin chule Reuben chapa Bohan songphu-a akikholutne.

¹⁸Chule Arabah sah lamsang toh kigalsaijin akilhungpeh in, chule Arabah'a ahung kilhunglhan,

¹⁹chuin agamgi chu Bethhoglah sahlam panga ahung kilhungin, chule gamgi akilhung doh hochu Jordan mong lhanglam chi twipi pang sahlama aumin, hichu lhanglam gamgi ahi.

²⁰Chule Jordan chu solam sanga gamgi ahi. A-insung dung juijin hiche gamgi jousehi Benjamin chate goulo ding chu ahi.

²¹Tun a-insungu dungjuija Benjamin chate phunga khopi lenho chu Jericho, Beth-hoglah, Keziz phaicham,

²²chule Beth-arabah, Zemaraim le Bethel,

²³chule Avim, Parah le Ophrah,

²⁴chule Chephar-haammonai, Ophi le Geba khopilen somlenile akhoneo hotoh,

²⁵Gibeon, Ramah le Beeroth,

²⁶chule Mizpeh, Chephirah le Mozah,

²⁷chule Rekem, Irpeel le Taralah,

²⁸chule Zelah, Eleph chule Jebus hichu Jerusalem Gibeath le Kirjath ahin khopilen somleli le akhoneo hotoh ahi. A-insung dung juija Benjamin chaten alodingu chu ahi.