Read Thado Chin Joshua 2 Bible Online

Joshua 2 - Thado Chin bible

Joshua 2

¹ Nun chapa Joshua'n Shittim'a konin mini guhthimin gam velhi dingin asollin, chelhon inlang gamchu adeh-in Jericho gave lhonin tin aseipeh-in ahi. Chule amani amin Rahab kiti notinu in'a chun ahunglhonin, ageh lhontai.

²Chule veuvin, tujanhin gam velhi dingin Israel chilhah ho hikoma ahunguve, tin Jericho khopi lengpa chu thu ahilun ahi.

³Hichun Jericho lengpan nahenga na-inna hunglut miteni chu hinpui doh-in; ajehchu amani gamjouse velhi dinga hunglhon ahi ti seidingin Rahab henga mi asolle.

⁴Chuin numeinu chun miteni apuidoh-in, asellin, henge kahenga mini ahunge, ahinla hoija hungkon ahilhon vang kahepoi, tin aseije.

⁵Chule ahitin ahi, kotpi khachah phat don, khothim phatnin, miteni chu achedoh lhontan, hoija achelhon kahepoi. Mangang tah-in amani chu nungdelun, ajehchu phapaovin nate ati.

⁶Ahinla amanun, amani chu in chunga apuitouvin, akisetoh changpol lah-a chun aseltai.

⁷Chuin mihochun miteni chu Jordan kaimun lampi geipeh chun anungdellun, chule anungdelho chu apotphatnun kul kotkhah chu akhah taovin ahi.

⁸Chuin amani ahung kumlhon masangin in chunga amanu akaldoh-in,

⁹chule amanun Pakaiyin hiche gam napeh-u ahitai, nangho gin nahi kachunguva achun, chule nangho jeh-a hiche gama chengho jouse kihotlhugam dingu ahitai ti kahei, tin miteni chu aseipehtai.

¹⁰ Ajehchu Egypt'a kona nahungpot doh uva Pakaiyin twipisan chu nangho dinga iti akansah-a, chule nanghon nathagamhelu Jordan gal langkhatna um Amor leng teni Sihon le Og chunga ipi nabolu chu kanajaove.

¹¹Chule hichehi kajahjah-un kalungu ajunlha tai, nangho jeh-in koimacha chunga hanna himhim aumtapoi. Ajehchu Pakai na Pathen'u chu chunga leh noija Pathen ahi.

¹²Hijeh chun tun kangeh nahi lhone, Pakai minin kahenga kihahsel lhonin, keiman nangni lungsetna kamusah tah jeh-in, Nangnin jong kapa insung chunga lungsetna neimusah lhoninlang, melchihna dihtah neipe lhonnin.

¹³Chuti chun, kanule kapa, kasopi numei ho le pasal ho, chule aneijouseu neihinghoi peh-un lang, kahinkhouhi thina-a konin neihuhdoh peh-un, ati.

¹⁴Chuin miteni chun amanu jah-a, kathilbol lhonhi naseidohlouva ahile nanghodin kahinna tohlhoninge. Chule hung hitiding ahi, Pakaiyin hiche gamhi eipeh tengule lungsetna neitahle dihtah-in nangma nabollunge tin adonbut lhone.

¹⁵Chujouvin amanun amani chu bangkotna konin khaovin akhailhatai. Ajehchu amanu in chu khopi kulchunga kisa ahin, chule ama kul chunga chu chenga ahi.

¹⁶Chuin amanun, amani jah-a, mol langa lampia khun chelhonin, nanungdel hon mugetnun nate. Chule nanungdel ho akilekit kahseovin nithum sung gakisel lhonin, chule chujou tengle chethei lhontan nate.

¹⁷Hichun miteni chun amanu jah-a, neiki hahsel sah nalhon kitepna achun mona neilhon hih inge.

¹⁸Vetan, keiho hiche gam kahunglut tengule, hiche neikhai lhah nalhon bangkotna hi patkhao santhip nakhiding, chule nanule napa nasopi pasal ho, chule napa insungmite jouse na-inna anapuikhomin,

¹⁹chule hitiding ahi. Koi hijongle na-inna kona kholaija potdoh aumleh mona thisan chu aman akipoh ding, keiho themmo hilouding ahi. Chule koihile na-inna naumpi chunga khutlha aumle athisan chu kaluchunguva chuhen,

²⁰chule kathilbol lhonhi naseidoh a ahile, neiki hahsel sah lhon kitepna-a kona chu mo kachan lhon louding ahi atilhone.

²¹Chuin amanun nasei bang banglhon chu hitahen, ati. Chuin amanun amani chu asolmangin apotdoh lhontai. Chuin amanun pat santhip chu bangkotna akhaitan, ahi.

²²Chuin amani mollama chun achelhonin, anungdelho akinungle kahseovin chua chun nithum agaum lhone. Chuin anungdelho ahung kinungle uvin lamjousea aholun amutapouve.

²³Hichun miteni chu molla konin ahung kumsuh lhonin, agalkai lhonin akilekit lhontai. Chuin Nun chapa Joshua henga ahunglhonin, achung lhona thilsoh jouse chu ahenga aseipeh lhontai.

²⁴Chuin amanin tahbeh-in Pakaiyin gamjousehi ikhutnuva eipehdoh-u ahitai. Ajeh chu agama cheng jouse chu eihojeh-in akihot lhugam taove tin Joshua henga aseipeh lhone.